Cua Bible Literal Text
2 Phi-e-rơ 1
Si-môn Phi-e-rơ, xapok ji adro jah rơơlh ku Lôôk Wơơt Dêh Jê-xu, atăq khơl adro heq nhonq xok kung muuyq xuum tuôq quiq bauq đaji 'wot đom varơuq hyioh jăk ku Kơy Plêêk ji Wơơt Lôôk haay, laa Lôôk Wơơt Dêh Jê-xu: Apôôy vôôch vanong kaxay ji varơuq hrok hrol 'ngưng athêêp iaq đnoyq ka oh ay đom varơuq nhonq xet Kơy Plêêk ji Lôôk Jê-xu, Lôôk haay. Vii heq kahniq ka haay tôôy varơuq wih truh varơuq riirh ji varơuq kuh kul tyauq yaak qwuyen ku Kadraq, gamưh varơuq nhonq xet Kơy heq tawooyh taayh haay xing tađnah tađnaak ji varơuq xuum kaxay ku Kadraq, đơu gamưh tađnah tađnaak xuum kaxay nưq, Kadraq heq kahniq ka haay kaluh apok tavek quiq jaq ji kôt galơh, xôq gamưh đnư oh ay jah jêêk vlôh khơl adro e phon xuum katik kơy plêêk, xaloot klơlh đơơy riirh hư hlơơp đom dêh araak bơyh xuum hmưch trôôch, đơu bơyh kakơq nưq, atêq tuôôy dơơp tyauq dêq hloay varơuq garơng talăng jăk, oh ay dayh athêêp ka xuum tuôq haay xuum kaxay; athêêp ka xuum kaxay hlolh xet; athêêp ka hlolh xet katik jư xăk; athêêp ka katik jư xăk paraat chiuq uunq; athêêp ka paraat chiuq uunq varơuq kuh kul; athêêp ka varơuq kuh kul xuum xiaq trôôch oh ay; athêêp ka xuum xiaq trôôch oh ay xuum xung xiaq. Vii tuôôy kaluh varơuq nưq kahnoq ji e raah jôôh đom oh ay, yôôych varơuq xalih truh tol oh ay leh hnoq laa varơuq văch xiap long be vlôh play đom varơuq nhonq xet Lôôk haay laa Lôôk Wơơt Dêh Jê-xu. Bơyh kaluh varơuq nưq leh kahnoq đom adro leq, yôôych adro nưq kadih laa biq apul vơơl, pa hno, pang waq muut varơuq tawol varơuq pa xarêh kaluh kadrôôp ku ni adroyq neq. Anưq yôôych, wơơy oh ay, dayh talăng jăk iaq đnoyq xôq dơơp kajưk apok taayh ji varơuq jah rơơlh ku oh ay, vii tuôôy dưk dơơp kaluh varơuq nưq, oh ay kajưk dik hnoq leh dong leq xatôôlh gưlh. Gamưh anưq, varơuq tawaak muut đom daak plêêk đơơy đơơy ku Lôôk ji Wơơt Lôôk haay, laa Lôôk Wơơt Dêh Jê-xu, hnoq jah ăm kach raah jôh ka oh ay.
Vii anưq, gô hnoq hloay talăng jăk hmưk nhăk oh ay truh kaluh varơuq nưq ju oh ay heq xet ji jah dơơp kajưk đom varơuq dik đong kahnoq aduq oh ay. Bơh long dong leq gô hloay e măn đom raap đơ neq, gô biit varơuq troq nhưk duh dơơp laa ahluk anhơơu oh ay xing varơuq hmưk nhăk, vii xet đaneq varơuq tơq pơ raap ku gô laa varơuq jeq xalih vlôh, dang đaji Lôôk haay, Lôôk Wơơt Dêh Jê-xu kung heq kahnoq vlôh ka gô. Ju anưq, gô kung hnoq raanq paraat đom tôôy kawah, xôq dơơp ka oh ay hloay văch kaluh varơuq neq atêq varơuq vlôh hooy ku gô. Vii 'wot heq be kahnoq ka oh ay bơyh xatyauq kaluh varơuq biit ravơq kheoq đnooy pahnhiq truh taay yaak ji varơuq rama truh ku Lôôk haay, laa Lôôk Wơơt Dêh Jê-xu, bơh vii heq jêêk vlôh khơl adro ka kangưưr dưk xanok varơuq ra uk ku kadih Kadraq. Vii Kadraq heq nhonq xok varơuq vado ji tađnah tađnaak xing Kơy Plêêk, laa Vaq, tuôôy apok xanoh đaneq heq jah đnooy vlôh truh Kadraq bơyh Kơy Taay Yaak Tađnah Tađnaak: “Neq laa Koot Gô, Koot xung xiaq ku Gô, Gô thier hlah xuum truh Koot nưq.” Kadih 'wot kung heq tameng apok đnooy nưq jah đnooy vlôh xing plêêk, đong tuôôy măn dii Kadraq tol đoot vah. Lunưq, 'wot e apok hlit thier kajưk, laa varơuq đơu oh ay đong dơơp troq tuôôy văch 'yo truh, đaji laa văch 'yo gooy đeen ahnhe đom aduq kamơng jaluk, dong truh tuôôy ka hngơy hrưng tađnah ji xalok maai vlok tok đom xuum oh ay, bơyh xet varơuq neq adroyq nhưk, đaneq tôôy apok hlit đom Rahlăp Vah leh truh xing varơuq padoh hlolh đêh ku kơyq nưq. Vii leh dong leq e apok hlit leq jah đnooy vlôh bơyh iq trôôch ku koot manih, bơh tuôôy jah jarooy trôôk bơyh Kơy Phool Hiel, oot heq đnooy vlôh xing Kơy Plêêk.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.