2 Kô-rinh-tô 9

1Truh varơuq dơơp hơu varơuq deng ka khơl vah, yôôych neq laa varơuq raah jôh xôq gô pheq valơk ka oh ay. 2Vii gô xet varơuq 'miêh xuum ku oh ay, laa varơuq đơu gô thay mot oh ay pa ưưt dii khơl tuôq Ma-xê-đoan, đaneq tayuup vah aduq A-chai heq ralauq xing muuyq xanưm adroyq, ji xuum talăng jăk ku oh ay heq anhơơu talơ 'ngưng adro iaq. 3Bơh gô heq patăk dăt taleq oh ay hơq, xôq apok pa ưưt ku 'wot truh oh ay be biq xalôônq xalaaoq đom dong varơuq neq, xôq ka oh ay hnoq ik ralauq đaji gô heq đnooy. 4Bơơn leh, atoh taleq adro tuôq Ma-xê-đoan hnoq ik hooy kung gô ji hloq varơuq leh ralauq aduq oh ay, yôôych 'wot biq kamưưl — nưq laa koq đnooy truh oh ay — vii varơuq tuôq kajưk nưq ku 'wot. 5Lunưq gô heq biit ahluk hluul khơl oh ay nưq laa varơuq duh dik, xôq ka oot hnoq ik truh adroyq dii oh ay ji ralauq 'miêh kaluh kadrool heq tavek neq ku oh ay, xôq e varơuq palauq ralauq tyauq kach nưq đaji muuyq vanong, đơu leh đaji varơuq băt eep.

6Panưh kadrơy, gô đnooy varơuq neq: akơyq paraay kach axit yôôych hnoq goch kach axit, ji akơyq paraay aduq kaluh vanong kaxay yôôych hnoq goch aduq kaluh vanong kaxay. 7Tôôy adro tơơk tưp tyauq đaji xăk heq đinq adroyq đom xuum, leh vlôh xing varơuq hlu rơu long xing varơuq raanq eep, vii Kơy Plêêk xiaq adro hlah xuum tơơk tưp. 8Măn Kơy Plêêk e qwuyen khienq tôôy vanong kaxay raah jôh tol oh ay, xôq hloay hloay đom tôôy varơuq, vii e đu dêq varơuq duh jung, oh ay hnoq ik raah jôh đom tôôy varơuq kaxay. 9Đaji e valơk:

“Akơyq ahlook aklah kua ăm hloh, akơyq palo ăm ka khơl adrah,

yôôych varơuq hyioh jăk ni măn hlê dong truh đơơy đơơy.”

10Panưh kadrơy, Kơy ahlook kalook adrek ka adro paraay ji tôôp xôq dơơp tuôông xa hnoq atăq ăm kach thier 'ngưng, hnoq dơơp kalook adrek ku oh ay athêêp 'ngưng, ji hnoq khienq kaluh raak play ku varơuq hyioh jăk aduq oh ay athêêp tok, 11tuôôy jah raah jôh đom tôôy panưh xôq dêq xuum ranưh ranơơy, laa varơuq xagook truh apok kuh kway Kơy Plêêk gamưh haay, 12vii varơuq dơơp hơu varơuq neq leh vơ laa atăq ăm đu tol kaluh varơuq duh ku khơl vah, đơu măn dơơp ka viik galaay bơơn 'ngưng apok kuh kway Kơy Plêêk, 13tuôôy ayuôôt laat Kơy Plêêk gamưh bơơn xanưk ku varơuq dơơp neq gamưh tol varơuq tameng tyauq aduq apok xưng vlôh ku oh ay đôôyq dii Hêêl Kaxay ku Lôôk Wơơt Dêh ji gamưh tol xuum ranưh ranơơy đom varơuq tagumq hlê deng ka oot ji ka tôôy manih, 14hloay đom apok apôôy ku oot truh oh ay, thier trôôch takôô oh ay vii vanong plêêk thier kôt ku Kơy Plêêk tol oh ay. 15Varơuq kuh kway tưp tok Kơy Plêêk vii kadrool leh aleq atoh ik ku kadraq!