2 Kô-rinh-tô 10

1Kadih xăk gô, Phao-lô — laa manih ju pơh pơơl tuôôy tavơh mot đom katul oh ay, bơh laay kôk kalh dii oh ay tuôôy wăngq mot — ahmưk nhăk oh ay bơơn varơuq xuum hwêêt ji hien lơyq ku Lôôk Wơơt Dêh. 2Gô apôôy vôôch đaneq, tuôôy e mot, yôôych gô hnoq be duh kôk kalh dii varơuq tuôq kajưk đơu gô đong biit laa pheq dơơp kalh ti tachơơl dii taleq adro ăm đaneq 'wot đaji dang đong tawaak hooy tyauq xăk xamơk. 3Vii ju riirh đom xăk xamơk, bơh 'wot be hmơt jăk tyauq xăk xamơk. 4Vii kaluh khêêl jaauq hmơt jăk ku 'wot leh aalq laa xăk xamơk, đơu laa taay yaak đom Kơy Plêêk deng ka varơuq pahyaak ka'lăk kaluh đôôn hôôm, hmơt hrưp kaluh apok tagêh 5kung tôôy varơuq katơơk galơh dưk tok tachơơl hlê varơuq hlolh xet truh Kơy Plêêk, ji rôp jư tôôy iq biit rawiit xuq varơuq tameng tyauq Lôôk Wơơt Dêh; 6ji e xuum talăng jăk xôq khienq tôôy varơuq dơơp lưp tameng pheq bla jaq, tuôôy varơuq tameng tyauq ku oh ay heq jah xaleep.

7Oh ay đong 'yo varơuq măn tol pi mot. Atoh akơyq tuôq kajưk aduq xăk xamơk đaneq xăk thuôk xuq Lôôk Wơơt Dêh, yôôych adro nưq dayh biit 'yo hlê varơuq neq truh kadih xăk, đaneq: adro nưq thuôk Lôôk Wơơt Dêh đaleq yôôych 'wot kung đanưq. 8Vii pheq đnooy atoh gô e pa ưưt varơuq kajoq athêêp 'ngưng truh qwuyen da uh ku gô, laa qwuyen da uh Lôôk heq kahniq deng ka varơuq rôôk đơ đơu leh aalq ka varơuq pahyaak hrưp oh ay, yôôych gô hnoq be huq kamưưl, 9xôq gô be vlôh kaveeh đaji dang khienq oh ay pheq varaal yôq bơơn thư ku gô. 10Vii e adro đnooy: “Ju taleq hla thư ku kơy nưq apok parêq ji kôk kalh, bơh tuôôy e mot bơơn khiêk bơơn hlek măn đnen yôôych pơh pơơl, ji apok đnooy be ra kajoq.” 11Adro đanưq dayh biit 'yo varơuq neq, tuôôy wăngq mot 'wot laa đaleq đom apok đnooy hlê kaluh hla thư, yôôych tuôôy e mot varơuq dơơp ku 'wot kung đanưq.

12Vii 'wot leh hôôk xađong long taso 'wot dii muuyq vaarq adro galơh tok kadih xăk. Bơh khơl adro nưq — tuôôy wolh oot aduq kadih oot, ji taso kadih xăk dii kadih oot — yôôych be hlolh xet kajoq. 13Wih hlê, 'wot hnoq leh pa ưưt truh kaluh kajoq qwaq mưk, bơh laa tyauq ka mưk đom kawah nưq đơu Kơy Plêêk heq aklah ahlook ka 'wot, muuyq ka mưk heq lơy truh aduq oh ay. 14Vii 'wot be aalq đong kadih galơh qwaq mưk, đaji tuôôy koq hmưq tawaak truh oh ay, vii pheq đnooy, 'wot heq hooy adroyq truh aduq oh ay bơơn Hêêl Kaxay ku Lôôk Wơơt Dêh, 15be pa ưưt truh kaluh kajoq qwaq mưk aduq kaluh kông pơơl ku khơl kadrơy, bơh vii e xuum takôô gamưh aduq oh ay, tuôôy xuum tuôq ku oh ay jah athêêp tok, xôq kaluh kông pơơl tyauq aduq nưq ku 'wot jah dong kôt truh mưk raah jôh, 16xôq padoh taboon Hêêl Kaxay aduq kaluh dêh kach xangưưy oh ay — klơlh pheq pa ưưt truh kaluh kajoq heq jah ralauq 'miêh đom aduq nưq ku khơl kadrơy.

17“Bơh akơyq pa ưưt xăk, dayh pa ưưt xăk đom Lôôk.”

18Vii be aalq adro kadih ayuôôt laat kadih xăk yôôych adro nưq e varơuq kông nhonq, bơh laa adro đơu Lôôk ayuôôt laat.