1 Jăng 5

1Atoh kơyq tuôq đaneq Lôôk Jê-xu laa Lôôk Wơơt Dêh yôôych jah pahleh vlôh xing Kơy Plêêk, ji atoh kơyq xiaq Kơy heq pahleh vlôh ni yôôych kung xiaq adro heq jah pahleh vlôh bơyh Kadraq. 2Gamưh varơuq neq, haay xet đaneq haay xiaq koot xau Kơy Plêêk laa tuôôy haay xiaq Kơy Plêêk ji tameng jư kaluh ganeen ku Kadraq. 3Vii neq laa varơuq xiaq kul Kơy Plêêk, nưq laa haay tameng jư kaluh ganeen ku Kadraq. Kaluh ganeen ku Kadraq be aalq laa gengq parêq. 4Vii atoh kơyq jah pahleh vlôh xing Kơy Plêêk yôôych jay iaq dêh araak. Ji neq laa varơuq jah jay, 'ngưq xuum tuôq ku haay, laa varơuq heq jay iaq dêh araak. 5Đơu kơyq laa adro jay iaq dêh araak, atoh leh aalq manih tuôq đaneq Lôôk Jê-xu laa Koot Kơy Plêêk? 6Nưq laa Kơy heq truh gamưh daak ji vahaap: Lôôk Wơơt Dêh Jê-xu — leh vơ gamưh daak, bơh laa gamưh daak ji gamưh vahaap. Ji Kơy Phool Hiel laa Kơy dơơp xanưk, vii Kơy Phool Hiel laa varơuq dik. 7Vii anưq, e pe varơuq dơơp xanưk: 8Kơy Phool Hiel kung dii daak ji vahaap, đơu dêq pe raay laa pato truh muuyq varơuq. 1 9Atoh haay nhonq apok xanưk ku koot manih, yôôych apok xanưk ku Kơy Plêêk laa kôt galơh iaq. Vii neq laa apok xanưk ku Kơy Plêêk, nưq laa Kadraq heq dơơp xanưk truh Koot Kadraq. 10Kơyq tuôq aduq Koot Kơy Plêêk yôôych e apok xanưk nưq đom adro nưq. Kơyq leh tuôq Kơy Plêêk yôôych 'yo Kadraq laa dro đnooy pa ôôh, vii adro nưq leh tuôq aduq apok xanưk đơu Kơy Plêêk heq đnooy vlôh truh Koot Kadraq. 11Ji neq laa apok xanưk, nưq laa Kơy Plêêk heq kahniq ka haay varơuq riirh đơơy đơơy, ji varơuq riirh nưq măn đom Koot Kadraq. 12Kơyq e Koot yôôych e varơuq riirh. Kơyq leh e Koot Kơy Plêêk yôôych leh e varơuq riirh.

13Gô heq valơk taleq apok neq ka oh ay, laa ka khơl adro tuôq aduq yal Koot Kơy Plêêk, xôq oh ay xet đaneq haay e varơuq riirh đơơy đơơy. 14Măn neq laa varơuq tuôq kajưk đơu haay e ka aduq Kadraq, nưq laa atoh haay apôôy vôôch muuyq varơuq leq nưq tyauq iq trôôch Kadraq, yôôych Kadraq tameng haay. 15Ji atoh haay xet đaneq Kadraq tameng haay long ju haay apôôy vôôch varơuq kajoq, yôôych haay xet đaneq haay nhonq jah kaluh varơuq apôôy đơu haay heq apôôy vôôch xing Kadraq. 16Atoh kơyq hloq adro oh ay ni lôp muuyq kadrôôp leh truh mưk kaxêêt, yôôych adro nưq hnoq apôôy vôôch, ji Kơy Plêêk hnoq kahniq varơuq riirh ka adro oh ay hơq, laa adro lôp kadrôôp leh truh mưk kaxêêt. E muuyq kadrôôp truh mưk kaxêêt; gô leh đnooy đaneq adro nưq duh apôôy truh kadrôôp nưq. 17Tôôy varơuq leh hyioh jăk laa kadrôôp maroh, ji e kadrôôp leh truh mưk kaxêêt.

18Haay xet đaneq atoh kơyq jah pahleh vlôh xing Kơy Plêêk yôôych leh raxôôt lôp kadrôôp, bơh Kơy 'miêh pahleh vlôh xing Kơy Plêêk jư 'yo adro nưq, ji kamuuych leh ik đungq truh ni. 19Haay xet đaneq haay thuôk xuq Kơy Plêêk, măn dêq hloay dêh araak kul 'laarq kamuuych. 20Bơh haay xet đaneq Koot Kơy Plêêk heq truh ji heq kahniq ka haay hlolh xet, xôq haay hnoq ik nhonq xet Kơy Dong Dik. Ji haay măn đom Kơy Dong Dik, 'ngưq đom Koot Kadraq, laa Lôôk Wơơt Dêh Jê-xu. Koot nưq laa Kơy Plêêk dong dik, ji laa varơuq riirh đơơy đơơy. 21Khơl koot lơơy, dayh jư xăk klơlh vangưl.