2 Jăng 1

1Khơl draq atăq khơl mo jah rơơlh kung khơl koot ku mo, laa khơl adro đơu gô xung xiaq đom varơuq dik — ji leh vơ đêh gô, bơh dêq hloay khơl leq heq 'yo xet varơuq dik kung anưq — 2vii varơuq dik đong măn đom haay ji hnoq măn dii haay dong truh đơơy đơơy. 3Vanong plêêk, xuum angơuq, ji varơuq hrok hrol xing Kơy Plêêk, laa Vaq ji xing Lôôk Wơơt Dêh Jê-xu, Koot ku Vaq, hnoq măn dii haay đom varơuq dik ji xung xiaq.

4Gô thier ra hlah hlaak vii kơq gô hloq muuyq sôôq koot xau ku mo tawaak hooy đom varơuq dik, dang đaji haay heq nhonq xok ganeen xing aduq Vaq. 5Wơơy mo, juneq gô apôôy vôôch mo — leh aalq đaji đong valơk ka mo muuyq ganeen đơơu, đơu laa varơuq haay heq e xing kapa tep — đaneq haay duh pheq xung xiaq mamuuyq. 6Ji xuum xung xiaq laa đaneq, nưq laa haay duh pheq tawaak hooy tyauq kaluh ganeen ku Kadraq. Neq laa ganeen, dang đaji oh ay heq tameng xing kapa tep, nưq laa oh ay duh pheq tawaak hooy đom xuum xung xiaq. 7Vii 'ngưng dro pa ôôh aluut heq truh đom dêh araak, laa khơl dro leh xưng nhonq Lôôk Wơơt Dêh Jê-xu truh đom xăk xamơk. Nưq laa dro pa ôôh aluut ji dro tachơơl hlê Lôôk Wơơt Dêh. 8Kadih oh ay dayh 'yo rơơt xôq oh ay leh dơơp hlơơp kaluh varơuq đơu haay heq pheq galeh galal, tađôôy muut đnư oh ay nhonq jah xaleep kadrool. 9Dro leq raxôôt vlôh xangưưy đơu leh kưq măn đom apok pato ku Lôôk Wơơt Dêh yôôych leh e Kơy Plêêk. Kơyq kưq măn đom apok pato, adro nưq e hloay Vaq ji Koot. 10Atoh kơyq truh dii oh ay đơu leh taway tyauq apok pato nưq, yôôych te jarooy dro nưq muut hnhư ji te đnooy dii ni: “Xiin vôôch hrok”. 11Vii kơyq đnooy dii adro nưq: “Xiin vôôch hrok”, laa jưq phon muut kaluh varơuq xơk ku ni.

12Vii e 'ngưng varơuq gô leh trôôch valơk ka oh ay bơơn jơyq ji phôôm. Bơh gô trôôch truh dii oh ay ji đnooy tajauq mot hyioh mot, xôq xuum hlah hlaak ku oh ay jah xaleep. 13Khơl koot xau adro oh ay jah rơơlh ku mo atăq apok vôôch hlơq mo.