1 Jăng 4

1Oh ay xung xiaq, te tuôq tôôy yaak, bơh pheq thư kaluh yaak xôq 'yo oot e jơq be laa xing Kơy Plêêk, vii 'ngưng kơy hlit pa ôôh heq hooy loch đom dêh araak. 2Gamưh varơuq neq, oh ay nhonq xet Yaak ku Kơy Plêêk: yaak leq đơu xưng nhonq Lôôk Wơơt Dêh Jê-xu heq truh đom xăk xamơk, nưq laa xing Kơy Plêêk, 3măn yaak leq đơu leh xưng nhonq Lôôk Jê-xu yôôych leh aalq xing Kơy Plêêk. Nưq laa yaak ku dro tachơơl hlê Lôôk Wơơt Dêh đơu oh ay heq tameng đaneq đong truh, ji juneq măn đom dêh araak yôôch. 1 4Khơl koot lơơy, êêp koot thuôk xuq Kơy Plêêk, ji heq jay iaq oot, vii Kơy măn đom êêp koot kôt iaq dro đom dêh araak. 5Oot thuôk xuq dêh araak. Vii kơq nưq, oot đnooy tyauq dêh araak, ji dêh araak tameng oot. 6'Wot thuôk xuq Kơy Plêêk. Kơyq xet Kơy Plêêk yôôych tameng 'wot. Kơyq leh thuôk xuq Kơy Plêêk yôôych leh tameng 'wot. Gamưh varơuq nưq, haay nhonq xet yaak ku varơuq dik ji yaak ku varơuq hyaak hyul.

7Oh ay xung xiaq, haay duh pheq xung xiaq mamuuyq, vii xung xiaq laa xing Kơy Plêêk, ji atoh kơyq xiaq yôôych jah pahleh vlôh xing Kơy Plêêk ji nhonq xet Kơy Plêêk. 8Kơyq leh xiaq yôôych leh xet Kơy Plêêk, vii Kơy Plêêk laa xung xiaq. 9Xung xiaq ku Kơy Plêêk heq jah kahnoq vlôh katul haay đom varơuq neq, nưq laa Kơy Plêêk heq patăk Koot Muuyq ku Kadraq pôôt dêh araak xôq haay jah riirh gamưh Koot nưq. 10Xung xiaq măn đom varơuq neq, nưq be aalq haay heq xiaq Kơy Plêêk, bơh nưq laa Kadraq heq xiaq haay, ji patăk Koot Kadraq dơơp kuah lêh bla kadrôôp vii kadrôôp maroh ku haay. 11Oh ay xung xiaq, atoh Kơy Plêêk heq xiaq haay đanưq, yôôych haay kung pheq xung xiaq mamuuyq. 12Koq ekơyq hmưq 'yo hloq Kơy Plêêk. Atoh haay xiaq mamuuyq, yôôych Kơy Plêêk kưq măn đom haay ji xung xiaq Kadraq jah xaleep măn đom haay. 13Gamưh varơuq neq haay xet đaneq haay đong măn đom Kadraq ji Kadraq đom haay, nưq laa Kadraq heq kahniq ka haay Kơy Phool Hiel Kadraq. 14'Wot kung heq hloq ji đong dơơp xanưk đaneq Vaq heq patăk Koot dơơp Wơơt Lôôk ku dêh araak. 15Paq kê kơyq xưng nhonq đaneq Lôôk Jê-xu laa Koot Kơy Plêêk, yôôych Kơy Plêêk kưq măn đom adro nưq, ji adro nưq măn đom Kơy Plêêk. 16Haay heq xet ji heq tuôq xung xiaq đơu Kơy Plêêk e đom haay. Kơy Plêêk laa xung xiaq, ji kơyq kưq măn đom xung xiaq yôôych kưq măn đom Kơy Plêêk, ji Kơy Plêêk kưq măn đom adro nưq. 17Gamưh đnư, xung xiaq heq jah dơơp ka xaleep kung dii haay xôq ka haay e varơuq kajưk xuum đom hngơy xưh xadrah, bơyh đaji Kadraq laa đaleq yôôych haay kung laa đanưq đom dêh araak neq. 18Varơuq yôq varaal leh e đom xung xiaq, wih hlê, xung xiaq xaleep taweek ka'lăk varơuq yôq varaal vlôh pi gôk, vii varơuq yôq varaal tajinq dii hmơt dook. Măn dro yôq varaal 'miêh koq jah xaleep đom xung xiaq. 19Haay xiaq vii Kadraq heq xiaq haay adroyq. 20Atoh kơyq đnooy đaneq: “Gô xiaq Kơy Plêêk,” đơu 'yarơ oh ay ni, yôôych nưq laa dro đnooy pa ôôh. Vii dro leh xiaq oh ay ni laa manih ni hloq ik yôôych dro nưq leh hnoq ik xiaq Kơy Plêêk laa Kơy ni leh hloq ik. 21Dik, haay nhonq ganeen neq xing aduq Kadraq, nưq laa kơyq xiaq Kơy Plêêk yôôych kung pheq xiaq oh ay ni.