Skip to content
BibleKenya

Cua Bible Literal Text

1 Jăng 3

Dayh 'yo Vaq heq kahniq xung xiaq xet dong leq ka haay, pheq đnooy haay jah taayh laa koot Kơy Plêêk, ji haay dik đanưq. Vii kakơq neq, dêh araak be xet haay, vii dêh araak leh xet Kadraq. 1 Oh ay xung xiaq, juneq haay laa koot xau Kơy Plêêk, măn haay hnoq laa đaji luleq yôôych măn koq jah kahnoq vlôh. Haay xet đaneq tuôôy Kadraq rama vlôh, haay hnoq jêêk vlôh dang đaji Kadraq, vii haay hnoq hloq Kadraq đaji Kadraq 'miêh e. Ji paq kê kơyq e takôô gamưh neq aduq Kadraq, yôôych dơơp kadih ka ni pa xarêh, đaji Kadraq laa pa xarêh. Paq kê kơyq lôp kadrôôp kung laa dơơp varơuq lưp ganuun. Dik anưq, kadrôôp maroh laa varơuq lưp ganuun. Oh ay xet đaneq kadih Kadraq heq rama vlôh xôq taway kadrôôp maroh hooy, ji kadrôôp maroh leh măn đom Kadraq. Atoh kơyq kưq măn đom Kadraq yôôych leh raxôôt lôp kadrôôp. Atoh kơyq kưq lôp kadrôôp yôôych koq hmưq hloq Kadraq, kung koq hmưq xet Kadraq. Khơl koot lơơy, te xôq kơyq jarooy aluut êêp koot hooy hyaak hyul. Kơyq dơơp varơuq hyioh jăk laa hyioh jăk, đaji kadih Kadraq laa hyioh jăk. Kơyq kưq lôp kadrôôp laa thuôk xuq kamuuych, vii kamuuych heq lôp kadrôôp xing kapa tep. Vii kơq nưq, Koot Kơy Plêêk heq rama vlôh xôq pahyaak ka'lăk varơuq dơơp ku kamuuych. Atoh kơyq heq jah pahleh vlôh xing Kơy Plêêk yôôych leh kưq lôp kadrôôp vii adrek riirh ku Kadraq đong măn đom adro nưq. Ji adro nưq leh hnoq ik raxôôt lôp kadrôôp vii heq jah pahleh vlôh xing Kơy Plêêk. Gamưh varơuq neq koot xau Kơy Plêêk ji koot xau kamuuych e varơuq kahra vlôh ra raang: Atoh kơyq leh dơơp varơuq hyioh jăk laa leh thuôk xuq Kơy Plêêk, ji dro leh xung xiaq oh ay ni kung đanưq. Vii neq laa apok kơy plêêk đơu êêp koot heq tameng xing tuôôy kapa tep, nưq laa haay pheq xung xiaq mamuuyq, te đaji Ka-in, dro thuôk xuq kamuuych ji heq păk kaxêêt ma oh ni. Kakơq leq đơu kơy heq păk kaxêêt ma oh kơy? Nưq laa vii kaluh varơuq dơơp ku kơy laa xơk, bơh kaluh varơuq ku ma oh kơy yôôych hyioh jăk.

Wơơy oh ay, teliq tưng hưng atoh dêh araak 'yarơ geet oh ay. Haay xet đaneq haay heq dalơh vlôh klơlh varơuq kaxêêt đơu muut đom varơuq riirh, bơyh vii haay xung xiaq oh ay haay. Kơyq leh xiaq yôôych đong măn đom varơuq kaxêêt. Atoh kơyq 'yarơ oh ay ni laa dro păk kaxêêt manih, ji oh ay xet đaneq tôôy dro păk kaxêêt manih raay be e varơuq riirh đơơy đơơy măn đom ni. Gamưh varơuq neq haay nhonq xet xuum xung xiaq: nưq laa kadih Kadraq heq chiuq kaxêêt xăk riirh ku Kadraq vii haay. Haay kung duh chiuq kaxêêt xăk riirh haay vii khơl oh ay. Bơh kơyq e garuh anôôp dêh araak ji hloq muuyq adro oh ay ni đong e varơuq duh đơu laay jư riit xuum ni dii adro oh ay nưq, yôôych dơơp aleq xung xiaq ku Kơy Plêêk đong măn đom adro nưq ik? Khơl koot lơơy, teliq xiaq bơơn apok long ka huuy vel xarooy, bơh bơơn varơuq dơơp ji varơuq dik. Gamưh đnư, haay hnoq xet đaneq haay thuôk xuq varơuq dik ji haay hnoq dơơp kajưk xuum haay kangưưr Kadraq, vii atoh xuum haay atok xadrah kadih haay, yôôych yơu kajoq Kơy Plêêk laa kôt iaq xuum haay ji Kadraq xet hlolh tôôy varơuq. Oh ay xung xiaq, atoh xuum haay leh atok xadrah, yôôych haay e varơuq kôk kalh wih xuq Kơy Plêêk, ji paq kê varơuq kajoq haay apôôy vôôch yôôych haay nhonq jah xing Kadraq, vii haay tameng jư kaluh ganeen ku Kadraq ji dưk dơơp kaluh varơuq Kadraq kaxay xuum kangưưr Kadraq. Ji neq laa ganeen ku Kadraq, nưq laa: haay pheq tuôq yal Koot Kadraq, laa Lôôk Wơơt Dêh Jê-xu, ji xung xiaq mamuuyq dang đaji Kadraq heq xanoh pato ganeen ka haay. Kơyq tameng jư kaluh ganeen ku Kadraq yôôych kưq măn đom Kadraq, ji Kadraq đom adro nưq. Ji gamưh varơuq neq, haay xet đaneq Kadraq đong măn đom haay laa gamưh Kơy Phool Hiel đơu Kadraq heq kahniq ka haay.

Source notes (1)
  1. Footnote Muuyq xôq rahlăp hnu iaq dơh ka'lăk kum apok: ji haay dik đanưq.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.