1 Jăng 2

1Êêp koot ku gô, gô valơk kaluh varơuq neq ka êêp koot xôq êêp koot leh lôp kadrôôp. Ji atoh e kơyq lôp kadrôôp, yôôych haay e muuyq Kơy apôôy thay dii Vaq laa Lôôk Wơơt Dêh Jê-xu, Kơy hyioh jăk. 2Kadraq laa kuah lêh bla kadrôôp vii kadrôôp maroh ku haay, bơh leh vơ ka kadrôôp ku haay, đơu măn ka kadrôôp ku dêq hloay dêh araak đnoyq. 3Atoh haay tameng jư kaluh ganeen ku Kadraq, yôôych gamưh đnư haay xet đaneq haay heq nhonq xet Kadraq. 4Kơyq đnooy đaneq: “Gô xet Kadraq” đơu leh tameng jư kaluh ganeen ku Kadraq, nưq laa dro đnooy pa ôôh, ji varơuq dik be măn đom adro nưq. 5Bơh atoh kơyq tameng jư apok Kadraq, yôôych xung xiaq ku Kơy Plêêk kajưk dik jah xaleep đom adro nưq. Haay xet đaneq haay măn đom Kadraq bơyh varơuq neq: 6adro leq đnooy ni đong măn đom Kadraq, yôôych kadih adro nưq kung pheq riirh dang đaji Kadraq heq riirh.

7Oh ay xung xiaq, gô leh valơk ka oh ay muuyq ganeen đơơu, bơh laa ganeen duut đơu oh ay heq e xing tuôôy kapa tep. Ganeen duut nưq laa apok đơu oh ay heq tameng. 8Panưh kadrơy, gô valơk ka oh ay muuyq ganeen đơơu, đơu ganeen nưq laa dong dik đom Kadraq ji đom oh ay, vii varơuq kamơng jaluk jah pachuh hlơơp, ji varơuq tađnah dik đong ahnhe tađnah yôôch. 9Kơyq đnooy ni măn đom varơuq tađnah đơu laay 'yarơ oh ay ni yôôych juneq đong măn đom varơuq kamơng jaluk. 10Kơyq xiaq oh ay ni yôôych kưq măn đom varơuq tađnah, ji kơq dơơp xatôôlh gưlh leh e đom adro nưq. 11Bơh kơyq 'yarơ oh ay ni laa măn đom kamơng ji tawaak hooy đom kamơng jaluk, adro nưq kung leh xet ni đong hooy maleq, vii kamơng jaluk heq dơơp apul mot ni.

12Khơl koot lơơy, gô valơk ka khơl koot vii kadrôôp khơl koot heq jah ka'lăk gamưh yal Kadraq. 13Wơơy khơl dơơp vaq, gô valơk ka êêp kơy vii êêp kơy heq xet Kơy e xing kapa tep. Khơl tadăp blaay lơơy, gô valơk ka êêp 'wơyq vii êêp 'wơyq heq jay iaq dro xơk. 1 14Khơl oh de lơơy, gô heq valơk ka êêp koot vii êêp koot heq xet Vaq. Wơơy khơl dơơp vaq, gô heq valơk ka êêp kơy, vii êêp kơy heq xet Kơy e xing kapa tep. Khơl tadăp blaay lơơy, gô heq valơk ka êêp 'wơyq vii êêp 'wơyq kalh paraat, apok Kơy Plêêk đong măn đom êêp 'wơyq, ji êêp 'wơyq heq jay ik dro xơk. 2 15Te xiaq dêh araak kung đaji kaluh kajoq đom dêh araak. Atoh kơyq xiaq dêh araak yôôych xung xiaq ku Vaq be măn đom adro nưq. 16Vii tôôy thưq đom dêh araak — đaji varơuq hmưch trôôch ku xăk xamơk, varơuq hmưch trôôch ku mot, ji katik katơơk galơh ku đơơy — be aalq laa xing Vaq bơh laa xing dêh araak. 17Ji dêh araak biq tapol hlơơp kung dii xuum trôôch ku ni, bơh kơyq dơơp tyauq iq trôôch Kơy Plêêk yôôych kưq măn truh đơơy đơơy.

18Khơl oh de lơơy, juneq laa wat lôôch dik, ji đaji êêp koot e tameng đaneq dro tachơơl hlê Lôôk Wơơt Dêh đong truh, ji juneq 'ngưng dro tachơơl hlê Lôôk Wơơt Dêh heq truh, lunưq haay xet đaneq juneq laa wat lôôch dik. 19Bing oot hooy vlôh xing haay, bơh oot leh thuôk xuq haay. Vii atoh thuôk xuq haay, yôôych oot dik heq laa kưq măn đnoyq dii haay, bơh leh aalq anưq, xôq oot biq kahnoq vlôh đaneq oot leh thuôk xuq haay kajoq dêq. 20Măn êêp koot yôôych e varơuq para jơu xing Kơy Vah, ji êêp koot raay heq nhonq xet. 3 21Gô heq valơk ka êêp koot be aalq vii êêp koot leh xet varơuq dik, bơh vii êêp koot heq xet varơuq dik ji vii be e varơuq pa ôôh lar leq laa vlôh xing varơuq dik. 22Kơyq laa dro đnooy pa ôôh atoh leh aalq dro chôôyq ka'lăk, đnooy đaneq Lôôk Jê-xu be aalq laa Lôôk Wơơt Dêh? Dro nưq jơq laa dro tachơơl hlê Lôôk Wơơt Dêh, 'ngưq laa dro chôôyq ka'lăk Vaq ji Koot. 23Adro leq chôôyq ka'lăk Koot yôôych leh e Vaq. Măn kơyq xưng nhonq Koot yôôych kung e Vaq đnoyq. 24Măn phon êêp koot, dayh xôq varơuq êêp koot heq tameng xing tuôôy kapa tep măn đnoyq đom xăk. Atoh varơuq êêp koot heq tameng xing tuôôy kapa tep kưq măn đom êêp koot, yôôych êêp koot kung hnoq kưq măn đom Koot ji đom Vaq. 25Ji neq laa apok tavek đơu Kadraq heq xanoh tavek dii haay — 'ngưq laa varơuq riirh đơơy đơơy. 26Gô heq valơk kaluh apok neq ka êêp koot truh khơl dro jarooy aluut êêp koot hooy hyaak hyul. 27Măn phon êêp koot, varơuq para jơu đơu êêp koot heq nhonq xing aduq Kadraq đong măn đom êêp koot, ji êêp koot be e varơuq duh xôq muuyq kơyq nưq pato dayq êêp. Wih hlê, đaji varơuq para jơu ku Kadraq đong pato êêp koot truh tôôy varơuq, ji nưq laa dong dik leh aalq laa pa ôôh lar, kung đaji heq pato êêp koot kưq măn đom Kadraq.

28Juneq, khơl koot lơơy, dayh kưq măn đom Kadraq, xôq atoh tuôôy Kadraq rama vlôh, haay e xuum kôk kalh ji leh biq kamưưl kangưưr Kadraq muut tuôôy Kadraq truh. 29Atoh êêp koot xet đaneq Kadraq laa hyioh jăk, yôôych êêp koot kung xet đaneq tôôy adro dơơp varơuq hyioh jăk raay jah pahleh vlôh xing Kadraq.