Ishipa 34

Ucikpi adama a wishi

Vishipa vu Dawuda.

1Mi ta̱ a kucikpa Vuzavaguɗu makyan dem,

ucikpi u ni wi ta̱ o kuyongo a̱ una̱ u va̱ makyan dem.

2Mi ta̱ a kucikpa Vuzavaguɗu,

yaꞋan aza ayali a pana ka̱ta̱ a yaꞋan ma̱za̱nga̱.

3Salai tsugbayin tsu Vuzavaguɗu nu mpa,

tsu cikpa kula ku ni koɓolo.

4N folonoi Vuzavaguɗu, ɗa tana wu ushuki mu,

ɗa wu utuka̱i mu a̱ ka̱tsuma̱ ko wovon u va̱ dem.

5Aza a na i o kudoro,

a zuwai a̱shi e le wa̱ a̱ ni, a yaꞋin ma̱za̱nga̱,

i o kudoku ku na̱mgba̱ ka̱tsuma̱ ba.

6Aza a unambi a yaꞋin meɗevile,

ɗa ta na Vuzavaguɗu u panakai le,

ɗa wi isai le a̱ ka̱tsa̱ma̱ ka atakaci e le.

7Kalingata ka̱ ni ki ta̱ e kere,

aza a na i a kupana wovon u Vuzavaguɗu,

wu isai le a̱ ka̱tsuma̱ ka atakaci e le.

8Kondoi yene n ka̱ci ka̱ ɗa̱ Vuzavaguɗu vuza kasingai ɗa.

vuza vu una̱singai ɗa a̱yi na u ciya̱i ubuta̱ u kusheɗeku wa̱ a̱ ni.

9Yevei n ka̱ci ka̱ ɗa̱ tsu na

Vuzavaguɗu wi n kasingai,

vuza vu ma̱za̱nga̱ vuza na u ciya̱i

ida̱shi i ma̱ta̱na̱ wa̱ ni.

10Ali ikawu feu, i tsu namba ta̱ ilikulya a pana kambulu,

ama aza a na i o kutono Vuzavaguɗu,

i a kunamba ili i singai ba.

11Ta̱wa̱i, a̱ɗa̱ muku n va̱, i panaka mu,

mi ta̱ o kuyotsongu ɗa̱,

tsu na i kupana wovon u Vuzavaguɗu.

12Yayi wi a kuciga u pana u yoꞋo u wuma u ni?

Yayi u cigai wu ene ayin a singai?

13Sai, u ka̱na̱ kelentsu ka̱ ni a̱ ubuta̱ u ka gbani-gbani

ka̱ta̱ kpamu u ka̱na̱ una̱ u ni a̱ ubuta̱ u kuyaꞋan ka aꞋuwa.

14U ka̱sukpa̱ ka gbani-gbani ka̱ ni, u yaꞋan kasingai,

u la̱nsa̱ ma̱ta̱na̱ n ka̱ɗu ka̱ ni ra̱ka̱.

15A̱shi a Vuzavaguɗu i ta̱ a kinda aza a usuɓi,

atsuvu a̱ ni kpamu i ta̱ a kupana ma̱shi me le.

16A̱shi a Vuzavaguɗu,

i ta̱ a tsurala n aza a na a ci yaꞋan ka gbani-gbani,

adama a na,

i ta̱ a kucinukpa n ukuna u le punu aduniyan ra̱ka̱.

17Aza a usuɓi a̱ tsu shika̱ ta̱,

Vuzavaguɗu tana u tsu panaka le ta̱,

ka̱ta̱ wi isa le

a̱ ka̱tsa̱ma̱ ka atakaci e le dem.

18Vuzavaguɗu u tsu yongo ta̱ ɗevu n aza a ugushi u ka̱ɗu,

u tsu isa ta̱ aza a na utuka̱i a̱ɗu.

19Vuma vu usuɓi vu tsu takacika ta̱ ka̱u,

ama Vuzavaguɗu u tsu isai ta̱ a̱ ka̱tsuma̱ ke le dem.

20Adama a na Vuzavaguɗu u tsu ere le ra̱ka̱,

ko ketele ke le ke te ka na o kukoɗo.

21Ka gbani-gbani ki ta̱ a ku una vuma gbani-gbani,

i ta̱ a kutakacika aza a na i a kuꞋiwan aza a usuɓi.

22Vuzavaguɗu wi ta̱ a̱ kushiba̱ wuma wa agbashi a̱ ni.

aza a na a banai wa̱ a̱ ni kula̱nsa̱ ubuta̱ u kusheɗeku, i ta̱ a̱ ku ka̱sukpa̱ le n wuma.