Ishipa 33

Vishipa vu ucikpi

Vishipa vu Dawuda.

1YaꞋin ma̱za̱nga̱, a̱ɗa̱ aza a usuɓi ra̱ka̱,

adama a ili i na Vuzavaguɗu u yaꞋin,

cikpai ni a̱ɗa̱ na yi o kutono yi.

2Cikpai Vuzavaguɗu n umolu,

yaꞋankai ni ishipa n umolu u na wi n anꞋin kupa.

3YaꞋankai ni vishipa vu savu,

waꞋakai ni umolu mayin,

i yaꞋan ishipa i ma̱za̱nga̱ n kacaꞋa!

4Adama a na kadanshi ka Vuzavaguɗu mayun ɗa,

kpamu ulinga u ni ra̱ka̱ wu usuɓi u ɗa.

5Vuzavaguɗu u tsu ciga ta̱ kamayun n usuɓi,

aduniyan a shana ta̱ n ucigi u Vuzavaguɗu u na u tsu sabaꞋa ba.

6N uneki u kadanshi kaꞋa Vuzavaguɗu u yaꞋin gaɗi,

n kadanshi ka̱ ni kaꞋa, u yaꞋin kanna, wotoi n azangata.

7U ɓolongi mini ma mala a̱ ubuta̱ ute,

u zuwai mala ma uga̱vi ma,

tsu vuza na u foɓoi ishina o mopon,

8YaꞋan aduniyan ra̱ka̱ a pana wovon u Vuzavaguɗu,

panai wovon u ni uma aduniyan.

9N kadanshi kaꞋa u yaꞋin aduniyan,

kadanshi kaꞋa u nekei ɗa ili ra̱ka̱ i shamgbai.

10Vuzavaguɗu u tsu la̱nga̱sa̱ ta̱ ofoɓuso a uma aduniyan,

u tsu sabaꞋasaka ta̱ kusheshe ku uma.

11Ama kusheshe ku Vuzavaguɗu ki ta̱ lo ko wannai,

kusheshe ku ka̱ɗu ku ni kpamu a makyan dem.

12Uduniyan u ma̱za̱nga̱ u ɗa u na Vuzavaguɗu ɗa Ka̱shile ka̱ ni,

uma a na u zagbai okpo uma uka̱ni a̱ ni.

13Ɗe gaɗi ɗa Vuzavaguɗu u tsu indana,

ka̱ta̱ wene uma dem.

14Ɗe a̱ ubuta̱ wi ida̱shi i ni u ɗa u tsu indana,

u tsu ene ta̱ uma a na i a̱ ida̱shi aduniyan ra̱ka̱,

15a̱yi ɗa u yaꞋin a̱ɗu e le dem,

kpamu u tsu yeve ta̱ i na a ci yaꞋansa dem.

16Mogono ma tsu ciya̱ wishi adama ovonshi a̱bunda̱i a̱ ni ba,

keyevi ko kuvon ka tsu laꞋaka adama a utsura u gbayin u ni ba.

17Kuneke ku ka̱ɗu o kodoku ko kuvon, ili gbani i ɗa,

n utsura u ni ra̱ka̱, wi a ku isa vuma ba.

18Ama a̱shi a Vuzavaguɗu i ta̱ a ku inda aza a na i a kupana wovon u ni,

aza a na e keɗei a̱pa̱Ꞌa̱ e le

a ucigi u ni u na u tsu sabaꞋa ba.

19U tsu isa le ta̱ a̱ ubuta̱ wu ukpa̱,

ka̱ta̱ u zuwa le o yongo n wuma a ayin a kambulu.

20U Vuzavaguɗu u ɗa tsu keɗei a̱pa̱Ꞌa̱,

a̱yi ɗa ma̱ra̱ga̱ ma̱ tsu n ka̱ɓa̱nki ka̱ tsu.

21Adama a̱ ni a ɗa ci a̱ ma̱za̱nga̱,

adama a na tsu neke ta̱ a̱ɗu a̱ tsu a kula ku ciɗa ku ni.

22Vuzavaguɗu yaꞋan ucigi u ni u na u tsu sabaꞋa ba u yongo n a̱ tsu,

a na tsu keɗei a̱pa̱Ꞌa̱ a̱ tsu wa̱ a̱ nu.