Ishipa 32

Kushika̱ ku unushi n kucinukpa ku unushi.

VicuꞋu vu tsuwaꞋi tsu Dawuda.

1Vuza vu ma̱za̱nga̱ ɗa,

vuza na a cinukpai unushi u ni,

vuza na a takpai unushi u ni.1

2Vuza vu ma̱za̱nga̱ ɗa,

vuza na Vuzavaguɗu wi a ku ula yi n unushi ba,

kpamu a̱ ciya̱ ka gbani-gbani wa̱ a̱ ni ba.

3Ana n shika̱i unushi u va̱ ba,

Mo oꞋusoi ka̱ci ka̱ va̱ kanna dem a̱ ma̱shi.

4Vuzavaguɗu, vu takacika mu ta̱ kanna n kayin,

utsura u va̱ u kotsoi ra̱ka̱,

tsu na mita̱ me ci ɗekpe,

adama a usuɗukpi u kanna ka ayin a kpandari. Kuvuka

5Ɗa n shika̱i unushi u va̱ wa̱ a̱ nu,

n sokongu unushi u va̱ ba.

N danai, <<Mi ta̱ a̱ kushika̱ unushi u va̱ u Vuzavaguɗu.>>

Ɗa tana vu cinukpakai mu unushi u va̱. Kuvuka

6Adama a nannai yaba dem na wi o kutono wu,

wi ta̱ a kuvasa wa̱ a̱ nu, a makyan ma atakaci,

a makyan ma na kawuya ka̱ ta̱wa̱i le tsu mini ma na ma ayai,

mi a kuyawa wu e le ba.

7Avu ɗa ubuta̱ u kusheɗeku u va̱,

vi ta̱ a ku wawa mu atakaci,

mi ta̱ a kucanana ishipa,

adama a wishi u nu.Kuvuka

8Vuzavaguɗu u danai,

mi ta̱ o kuyotsongu wu uye u na vu kutono,

mi ta̱ e kuneke wu kadanshi n neke wu odoki kpamu.

9Ka̱ ta̱ vo okpo n tsulau tsu kodoku ko makparagi ba,

ele na sai n iryangama,

ka̱ta̱ yeve o tono wu.

10Mayun ɗa aza a gbani-gbani a takacika,

ama aza a na e nekei ka̱ɗu u Vuzavaguɗu,

ucigi u ni u na u tsu sabaꞋa ba wi ta̱ e kere le.

11YaꞋin ma̱za̱nga̱, a̱ɗa̱ aza a usuɓi ra̱ka̱,

yaꞋin ma̱za̱nga̱ adama a ili i na Vuzavaguɗu u yaꞋin,

ra̱ka̱ vu ɗa̱ na yi o kutono yi,

yaꞋin isali i ma̱za̱nga̱.