Ansa 11

1Vuzavaguɗu u tsu iwan ta̱ vuza kagisamkpatsu ka a uwa,

ama u tsu pana ta̱ uyoꞋo wa za agisamkpatsu a mayun.

2A̱ra̱ɗi a̱ tsu tuka̱ ta̱ n wono,

ama vuza babu a̱ra̱ɗi vuza vu ugboji ɗa.

3UgaꞋin wa aza kamayun a ka̱ɗu, u tsu tono ta̱ n ele,

ama aza unambi u kamayun a tsu una ta̱ ka̱cika̱le adama a ka gbani-gbani ke le.

4Udukuyan u tsu yongo n ugaꞋin a kanna ka ku kiɗa ka afada ba,

ama ida̱shi yu usuɓi i tsu utuka̱ ta̱ vuma ubuta̱ wu ukpa̱.

5U kuna wu usuɓi wa aza babu unushi u tsu tono a̱ n ele a uye u magaba,

ama aza a gbani-gbani a tsu yikpa̱ ta̱ adama ka a gbani-gbani ke le.

6Usuɓi wa aza ka mayun a̱ɗa̱ u tsu utuka̱ le ta̱,

ama aza iyaꞋanshi m modoruko o tsu okpo le ta̱ maza.

7Vuza gbani-gbani u tsu kuwa̱ ta̱ n kusheshe ku ni dem,

ka̱ta̱ a̱pa̱ a utsura a̱ ni ra̱ka̱ a̱ na̱mgba̱.

8A̱ tsu utuka̱ ta̱ vuza vu usuɓi atakaci,

ka̱ta̱ a ɗa o bono u vuza gbani-gbani.

9Aza gbani-gbani n una̱ u le u ɗa a tsu una a za le,

ama aza usuɓi a ubuta̱ u kuyeve ku le u ɗa a tsu laꞋaka.

10Vuza vu usuɓi u laꞋaka ba ci, likuci i tsu i yaꞋan ta̱ ma̱za̱nga̱,

ɗa baci vuza gbani-gbani u kuwa̱i, uma a tsu yaꞋan ta̱ feu ma̱za̱nga̱.

11Likuci i ci ciya̱ ta̱ tsugbayin adama una̱singai a uma usuɓi,

ama a tsu fa̱da̱ ta̱ likuci adama una̱ u uma a gbani-gbani.

12Ukuna u tsulau u ɗa vu goyo toku nu,

vuza ugboji u tsu paɗa ta̱ bini.

13Vuza kadanshi ka a̱bunda̱i n kula̱nga̱su u tsu sokongu kakuna ba.

Ama vuma vu usuɓi u su sokongu ta̱ ka kuna.

14A ubuta̱ una wi babu vuza kelime, uduniya u tsu yikpa̱ ta̱,

ama ka̱bunda̱i ka aza kuneke odoki ka tsu tuka̱ ta̱ uduniya ida̱shi i ma̱ta̱na̱.

15Ɗa baci vu ushuki ko okpo magan adama komoci vi ta̱ o ko kpo n wono,

ama vuzana u iwain wi ta̱ a kulaka.

16Vuka vu usuɓi u su ciya̱ ta̱ tsugbayin,

ama aza asuvu a yali udukuyan u ɗa koci a ku ciya̱.

17Vuma vu usuɓi u tsu ciya̱ ka̱ ta̱ ka̱cika̱ni u gaꞋin,

ama vuza gbani-gbani u tsu ronoko ta̱ ka̱cika̱ni atakaci.

18Aza gbani-gbani a tsu ciya̱ ili i makara ba,

ama uma u usuɓi a tsu ciya̱ ta̱ uciyi u mayun.

19Usuɓi usingai u tsu la̱nsa̱ka̱ ta̱ vuza wuma,

ama vuza na u dakaki kula̱nsa̱ ka gbani-gbani wi ta̱ a ku kuwa̱.

20Vuzavaguɗu u tsu iwan ta̱ aza kusheshe ku gbani-gbani,

21ama u tsu ka̱sukpa̱ ta̱ a aza usuɓi a laꞋaka.

22UgaꞋin u vuka dem wi baci n ka̱ɗu kasingai ba,

wi ta̱ tsu makawani ma azanari a vunu vu ma̱gurusunu.

23Kusheshe ku uma usuɓi, kuɗa kasingai,

ama kusheshe ka̱ a̱ɗu ka aza a gbani-gbani ku ɗa wupa ayin tutu.

24Aza o yoku a tsu neke ta̱ kuneꞋe ba̱ri, ka̱ta̱ tana uciyi u le u yimkpa,

ama aza o yoku a tsu neke vuza ko kenu ba, ama ka̱ta̱ okpo nu unambi.

25Vuza na u tsu neke ba̱ri, u ku okpo ta̱ vuza vu uciyi,

ɓa̱nka̱ otoku a̱ nu, a vu feu i ta̱ a ku ɓa̱nka̱ wu.

26Uma a tsu yaꞋanka ta̱ vuzana u sokongi ishina una̱,

ama una̱singai u ɗa u vuza na u dengei.

27Vuza na u la̱nsa̱i ugaꞋin u tsu ciya̱ ta̱ kasingai,

ama vuza na u la̱nsa̱i una̱mgbi, wi ta̱ a kuciya̱ u ɗa.

28Vuza na dem u nekei ka̱ɗu wu udukuyan u ni wi ta̱ a ku yikpa̱,

ama vuza vu usuɓi wi ta̱ o kutopo uteku tsa a̱vuku a̱ ta̱ku a ka̱kina̱ ka mini.

29Aza na a̱ tsu tuka̱ n atakaci a i kpaꞋa le, a u kotsushi utsu ciya̱ ili yi uka̱ni ba.

kpamu kalau ki ta̱ o ku okpo kagbashi ka vuza vu ugboji.

30Usuɓi u neke ta̱ vuma wuma,

vuza na wi n ugboji, kpamu utsu isa ta̱ wuma.

31Ɗa baci aza usuɓi a̱ ciya̱i u peci u le aduniya,

ni ɗa tamkpamu wo ku okpo wa aza unushi u gbani-gbani.