Ansa 12

1Vuza na baci dem u cigai ugbari u ciga ta̱ kuyeve,

ama vuza na u iwain ugbari kalau ka.

2Vuma vu usuɓi u tsu la̱nsa̱ ta̱ uɓa̱nki u Ka̱shile,

ama Ka̱shile ka tsu una ta̱ vuza vu kusheshe ku gbani-gbani.

3Vuma u tsu ciya̱ katsura a ubuta̱ u ka gbani-gbani ba,

ama ma̱giti ma aza usuɓi ma ci shamgba ta̱ n utsura mayin.

4Vuka vu usuɓi ili i ma̱za̱nga̱ i ɗa u vali ni,

ama vuka vu na vu tsu neke vali ni wono, u tsu okpo ta̱ an ketele ku ushami i kyamba i ni.

5Kusheshe ka aza usuɓi kusheshe ku mayun ku ɗa,

ama odoki aza a gbani-gbani modoruko ma koci.

6Odoki a vuza gbani-gbani o tsu okpo ta̱ an maza,

ama kadanshi ka vuza vu usuɓi ka tsu tuka̱ le ta̱.

7A tsu una ta̱ vuza gbani-gbani ra̱kura̱ka̱,

ama kpaꞋa ku vuza vu usuɓi ki ta̱ a ku shamgba n utsura mayin.

8A tsu cikpa ta̱ vuma vu usuɓi adama ugboji u ni,

ama a tsu goyo ta̱ vuza ka̱ɗu ka a gbani-gbani.

9U ku laꞋa ta̱ n kugaꞋan n unambi u nu, vi a̱ kula̱nsa̱ ili i kulya,

An va ku bonoko ka̱cika̱nu avu ili i yoku i ɗa.

tana ili i na va kulyaꞋa i laꞋa ta̱ utsura u nu.

10Vuma vu usuɓi u tsu la̱na̱ ta̱ ma̱ta̱na̱ mi ilikuzuwa i ni,

ama vuza gbani-gbani ili i tsu bankai ba

11Kacimbi kana kaci yaꞋan ulinga ka̱u,

utsu yaꞋan ta̱ n ilikulya ya a̱bunda̱i,

tsulau tsu a̱ la̱nga̱sa̱ makyan adama ulinga u gbani.

12Vuma gbani-gbani kusheshe ku ni ku ɗa u yaꞋan ka gbani-gbani,

ama vuza usuɓi u tsu sheshe ta̱ ka singai.

13Kadanshi ka vuza gbani-gbani ka tsu okpoi ta̱ maza,

ama vuza vu usuɓi u tsu utuka̱ ta̱ ka̱cika̱ni a̱ ka̱tsuma̱ ka atakaci.

14Katsupu ka vuma dem ki ta̱ a ubuta̱ u kadanshi ka̱ni n ulinga u ni,

wi ta̱ a̱ kuciya̱ ili i na i gaꞋin ni.

15Kalau ke ce ene ta̱ uye u wuma u ni derere ɗa,

ama vuza vu ugboji u tsu pana ta̱ odoki.

16Kalau ka tsu yotsongu ta̱ wupa u ni gogolo,

ama vuza vu ugboji u tsu keɓece koyoku ba.

17Vuza na u tsu dansa kamayun wi ta̱ a kusala usuɓi,

ama kayaꞋin ka uwa ka tsu dansa ta̱ a uwa.

18Kadanshi kana a yaꞋin babu kusheshe,

ka tsu tuka̱ ta̱ n usa̱n tsu usapi u kotokobi,

ama kelentsu ka vuza vu ugboji ka tsu tuka̱ ta̱ n ma̱ta̱na̱.

19Kamayun ki ta̱ a kugeshe a li a kubana u teku,

ama u kuna wa uwa gogolo u tsu kotso ta̱.

20Ukuna wa uwa u ɗa u tsu shatangu ka̱ɗu ka aza gbani-gbani,

ama ukuna u ma̱za̱nga̱ u ɗa wa aza ana a tsu neke odoki a singai.

21Ko ka gbani-gbani ka kuciya̱ vuza vu usuɓi ba,

ama atakaci a̱bunda̱i a ɗa a kuciya̱ vuza gbani-gbani.

22Vuzavaguɗu u tsu iwan ta̱ vuza kadanshi ka a uwa,

ama u tsu pana ta̱ uyoꞋo wa aza a na a ci yaꞋan kamayun.

23Vuza vu usuɓi u tsu sokongu ta̱ kuyeve ku ni,

ama kalau ka tsu utuka̱ ta̱ n tsulau tsu ni e keteshe.

24Ulinga wa a wuya utsu neke ta̱ utsura,

ama tsurogo ci ta̱ a kuzuwa wu vu okpo ka gbashi.

25Una̱mgbi u ka̱ɗu, u tsu sa̱nka̱ ta̱ vuma ma̱za̱nga̱,

ama kadanshi ko odoki ka tsu zuwa ta̱ wuma ma̱za̱nga̱.

26Vuza vu usuɓi u tsu neke ta̱ ka̱ja̱Ꞌa̱ ka̱ ni odoki a singai,

ama ulinga u vuza gbani-gbani u tsu zuwa ta̱ u puwa̱nka̱.

27Vi baci korogo, vi a̱ kuciya̱ ili i na vi a̱ kula̱nsa̱ ba,

ama vu yaꞋan baci ulinga ka̱u, vi ta̱ a̱ kuciya̱ udukuyan.

28Ukuna wu usuɓi, uye u wuma u ɗa,

nwalu a̱ ka̱tsuma̱ ku u ɗa u tsu banka vuza ukpisa̱ ba.