Ishaya 50

Unushi wa aza a Isaraila n kagbashi ka̱ ma̱riki

1Ili i na Vuzavaguɗu u danai i ɗa na,

<<Te ɗai katakarda ku upeci u yolo ka̱ a̱na̱vu,

ka na n danai n ka̱sukpa̱i ta̱?

Ko u vuza vu kutan vu va̱ ve ne ɗai

n dengei wu ta̱?

Adama a̱ unushi u ɗa n dengei ɗa̱,

adama a kawuya ka̱ ɗa̱ ɗa n lokoi a̱na̱kpa̱ a̱ ɗa̱.

2<<Ana n ta̱wa̱i yiɗa̱i i zuwai ɗa m kpa̱ɗa̱i kucina vuza ɗe?

Ana n ɗekei yiɗa̱i ɗa vuza u kpa̱ɗa̱i kuyaꞋan lo a na wa̱ kushuku?

Kukiye ku va̱ kugusa̱ ta̱ ali ɗa ka̱ kukpa̱ɗa̱ kushiba̱ uma a?

Ko ta na ku namba utsura u na ka kisa vuza? La̱na̱,

n uɓarangi u va̱ koci ɗa n ɗekpetengi mala,

m bonokoi nɗolu ubuta̱ u ɗeku,

adan e le a shamai adama a unambi u mini,

ɗa a̱ kuwa̱i n kakuli ali ɗa a shamai.

3M palai gaɗi n ka̱yimbi,

ɗa n yaꞋankai ni ili i kupalaka ka̱ci ka̱ ni m motogu mu una̱mgbuka̱tsuma̱.>>

4Vuzavaguɗu MalaꞋimili u neke mu ta̱ kadanshi ku ugboji,

adama a na n yeve kadanshi ko kudokusu uma ka̱ɗu ka na ko kuɓa̱nka̱ aza a na i babu utsura.

Usana lakam u tsu jimgbasa mu ta̱

atsuvu a̱ va̱ ciya̱ m pana tsa aza a na a̱ ciya̱i uyotsongi.

5Vuzavaguɗu Ka̱shile u ɓa̱yuwa̱ ta̱ atsuvu a̱ va̱,

n yaꞋan ugbamukaci kpamu ba,

m kpatala feu kucina̱ ba.

6N neke ta̱ kucina̱ ku va̱ a̱ ubuta̱ wa aza a na i a kulapa mu,

n nekei nguji n va̱ kpamu a̱ ubuta̱ wa aza a na i o kurono ntsa̱ka̱ n va̱.

Mpa ta na m kpatala a̱shi a̱ va̱ a̱ ubuta̱

wa aza a na i a kushikasa mu n a jirakai mu ntsa̱n ba.

7Adama na Vuzavaguɗu MalaꞋimili u tsu ɓa̱nka̱ mu ta̱,

mpa mi a kuciya̱ kugoyi ba.

Adama a nannai n shikpa̱ ta̱ a̱shi a̱ va̱ tsu katali,

n yeve ta̱ ta na mi a kuyaꞋan wono ba.

8A̱yi na u nekei mu uba̱ruwi wi ta̱ lo ɗevu.

Yayi u kugbaga mu n kavama?

YaꞋan n tsu kondonoi ce ene.

Anan yayi aza a nsata a̱ va̱?

ka̱sukpa̱ wu uta̱ na ɗevu nu mpa.

9La̱na̱, Vuzavaguɗu MalaꞋimili wi ta̱ koɓolo nu mpa.

Yayi u kudana mi ta̱ n unushi?

I ta̱ a kushama ra̱ka̱ tsa akashi,

ka̱ta̱ azun a takuma le ra̱ka̱.

10Yayi a̱ ka̱tsuma̱ ka̱ ɗa̱ wi a kupana wovon u Vuzavaguɗu

ɗa kpamu wi a kupana ka̱la̱ka̱tsu ka kagbashi ka̱ ni?

YaꞋan a̱yi na wi a nwalu a̱ ka̱yimbi

babu kutashi,

u zuwaka kula ku Vuzavaguɗu katsura,

ka̱ta̱ kpamu u bonoko a̱miki a̱ ni u Ka̱shile ka̱ ni.

11Ama la̱na̱i, a̱ɗa̱ ra̱ka̱ vu na i tsu tasuku akina,

ka̱ta̱ i zamaka ka̱ci ka̱ ɗa̱ nkuni n na mi a kulala n kutashi,

walai a̱ ubuta̱ u kutashi ka akina ku ɗa̱

koɓolo n kutashi ku nkuni ku na i zamai,

ili i na i kuciya̱ wa̱ va̱ i ɗa na.

Yi ta̱ a̱ kuyikpa̱ a̱ ka̱tsuma̱ ka atakaci a gbani-gbani.