Sam 27

Yuemnae dawk lunghawinae

Kathutkung: Devit

1BAWIPA nang teh angnae hoi kaie rungngangnae doeh.

Apihai ka taket ma hoeh. BAWIPA nang teh na kanguekung

ka rapan la doeh na o ka lungpuen mahoeh.

2Tami kahawihoehnaw ni na tuk teh

thei hanlah na nout navah ouk a rawp awh teh ouk a tâlaw awh.

3Ransahu kalenpoung ni na kalup nakunghai ka lungpuen mahoeh.

Taran ni na ka tuk nahai Cathut nang teh na kângue mingming han.

4BAWIPA koe hno hei han ka ngai e hno buet touh doeh kaawm.

Hothateh ka hring yunglam BAWIPA imthung o hane hoi yah,

kângai runae lahoi lam na hrawi tie hah doeh.

5Rucatnae atueng dawkvah hnâroumcalah a rathei rahim na o sak.

A bawkim thung vah hnâroumcalah na ta,

ka rasang e lungsong van na thueng.

6Hatdawkvah ka tengpam e kaawm e ka taran teh katâ han

lunghawinae pawlawk hoi a bawkim thungvah

thuengnae teh ka poe han.

7BAWIPA pahren lahoi, kai ni na kaw navah ka lawk

na thai pouh nateh kahei e na thai pouh haw.

8Kai koe, Tho haw na ka tet e

BAWIPA koe ka tho han.

9Kai koe na minhmai hrawk hanh.

Kai koe na lungphuen hanh, na san heh na pâlei hanh lah a.

Oe Cathut kaie rungngangnae nang teh kabawmkung doeh.

Na cettakhai hanh. Pak na tha hanh lah a.

10Anu hoi apa ni na ka pahnawt nakunghai

BAWIPA nang ni pou na khenyawn lah a.

11Oe, BAWIPA taran ka tawn dawkvah roumnae lam koe lahoi na cetkhai lah a.

Na ngainae na pâtu haw.

12Laithoe hoi pou na ka yue e

taran koe na tat hanh.

13A taminaw lathueng BAWIPA hawinae

ka hmu roeroe han telah ka yuem.

14BAWIPA teh kângue awh, yuemnae tawn awh,

na lungpout awh hanh.

BAWIPA teh kângue awh.