Sam 28

BAWIPA teh ka tha hoi kânguenae

Kathutkung: Devit

1Oe BAWIPA nang teh na kaw.

Ka lungsong, lawkkamuem na awm mahoeh.

Nang ni banglahai na ngaihoeh lah, lawkkamuem na awm pawiteh,

kai teh tangkom dawk ka bawt e patetlah doeh ka o toe.

2Bawipa nang koe ka hramki laihoi kabawpnae ka hei nahai thoseh,

Bawipa nange hmuenkathoung, a thung lah ka kut ka dâw to hai thoseh,

kai ni ka hei e hah na thai pouh haw.

3Tamikathoutnaw hoehpawiteh,

yonnae ka sak e naw hoi cungtalah kai hah na sawn hanh la.

4Ahnimae sakyoenae hoi kathoute nuencang patetlah patho haw.

Amamae kut hoi a sak awh e patetlah patho haw.

Ahnimouh ni a khang kawi e hah amamae van bout phat sak haw.

5Ahnimouh teh, BAWIPA e thawnaw hai thoseh,

A kutsaknaw hai thoseh,

kâhruetcuet laihoi a pouk awh hoeh dawkvah,

ahnimanaw hah raphoe vaiteh,

nâtuek hai ahnimouh teh bout thaw thai mahoeh toe.

6BAWIPA teh yawhawinae awmseh.

Bangkongtetpawiteh, ka heinae lawk hah a thai toe.

7BAWIPA teh kaie ka thaonae hoi kaie e bahling lah ao.

Ka lungthin ni a kâuep teh, kabawpnae hah a coe.

Hatdawkvah, puenghoi ka konawm. Kai ni la hoi ka pholen han.

8BAWIPA teh a miphunnaw e tha lah ao teh,

satui awi e naw ni kâuep e rungngangnae lah ao.

9Na miphun hah rungngang na teh,

Nange râw hah yawhawi poe haw.

Ahnimae tukhoumkung lah awm na teh,

ahnimanaw hah a yungyoe sin haw.