भजन-संहिता 91

1जऊन ह सर्वोच्च परमेसर के सरन म रहिही,

ओह सर्वसक्तिमान के छइहां म अराम करही।

2मेंह यहोवा के बारे म कहिहूं, “ओह मोर सरन-स्थान अऊ मोर गढ़ अय।

मोर परमेसर, जेकर ऊपर मेंह भरोसा करथंव।”

3खचित ओह तोला

चिड़ीमार के फंदा

अऊ घातक महामारी ले बचाही।

4ओह अपन पांखी के खाल्हे म तोला ढांप लीही,

अऊ ओकर डेनामन के खाल्हे म तोला सरन मिलही;

ओकर बिसवासयोग्यता ह तोर ढाल अऊ झिलम होही।

5रथिया के आतंक ले तोला डर नइं होही,

न ही ओ तीर ले डरबे, जेला दिनमान छोंड़े जाथे,

6न ही ओ महामारी ले, जऊन ह छिपके पीछा करथे,

न ही ओ महारोग ले, जऊन ह दिन-दुपहरी म नास करथे।

7तोर बाजू म एक हजार,

अऊ जेवनी हांथ कोति दस हजार गिर सकथें,

पर येह तोर लकठा म नइं आही।

8तेंह अपन आंखी ले सिरिप देखत रहिबे

अऊ दुस्टमन के दंड ला देखबे।

9कहूं तेंह कहिथस, “यहोवा ह मोर सरन-स्थान ए,”

अऊ तेंह सर्वोच्च परमेसर ला अपन निवास बनाथस,

10त तोला कोनो हानि नइं होही,

अऊ तोर डेरा के लकठा म कोनो बिपत्ति नइं आही।

11काबरकि ओह तोर बारे म अपन स्वरगदूतमन ला हुकूम दीही

कि ओमन हर काम म तोर रकछा करंय;

12ओमन तोला अपन हांथ म उठा लीहीं,

ताकि तोर गोड़ म पथरा ले चोट झन लगय।

13तेंह सिंह अऊ नाग सांप ला गोड़ ले कुचरबे;

तेंह बड़े सिंह अऊ बड़े सांप ला कुचरबे।

14यहोवा ह कहिथे, “काबरकि ओह1 मोर ले मया करथे, मेंह ओला छोंड़ाहूं;

मेंह ओला बचाहूं, काबरकि ओह मोर नांव ला मानथे।

15ओह मोला पुकारही, अऊ मेंह ओला जबाब दूहूं;

संकट के बेरा म मेंह ओकर संग रहिहूं,

मेंह ओला छोंड़ाहूं अऊ ओला आदर दूहूं।

16बहुंत उमर देके ओकर मन ला मेंह संतोस करहूं

अऊ ओला अपन उद्धार के दरसन कराहूं।”