भजन-संहिता 90

किताब IV

भजन-संहिता 90–106

परमेसर के जन मूसा के एक पराथना।

1हे परभू, पीढ़ी-पीढ़ी ले

तेंह हमर निवास स्थान बने हस।

2येकर पहिले कि पहाड़मन बनिन

या तेंह जम्मो संसार के रचना करय,

अनादि ले अनंतकाल तक तेंहीच ह परमेसर अस।

3तेंह मनखेमन ला ये कहिके वापिस धुर्रा म मिला देथस,

“हे मरनहार मनखेमन, धुर्रा म लहुंट जावव।”

4तोर नजर म हजार साल ह अइसन ए

जइसन कि एक दिन, जऊन ह अभी-अभी बीते हवय,

या रथिया के एक पहर।

5तभो ले तेंह मनखेमन ला मिरतू के नींद म बहा ले जाथस—

ओमन बिहनियां के नवां कांदी सहीं अंय:

6जऊन ह बिहनियां निकलथे,

पर सांझ के येह सूखके मुरझा जाथे।

7हमन ला तोर गुस्सा ह खा जाथे

अऊ तोर कोरोध ह हमन ला भयभीत करथे।

8तेंह हमर दुस्टता ला अपन आघू म,

अऊ हमर गुपत म करे पाप ला अपन अंजोर म रखे हस।

9हमर जिनगी के जम्मो दिनमन तोर कोप सहत बीत जाथें;

हमर सालमन बिलाप करत बीतथें।

10यदि हमर देहें म बल हवय,

त हमन सत्तर या अस्सी साल जीथन;

तभो ले हमन जादा समय समस्या अऊ दुख म पड़े रहिथन,

काबरकि ये समय ह जल्दी बीत जाथे, अऊ हमन खतम हो जाथन।

11कहूं हमन सिरिप तोर कोरोध के सक्ति ला जानतेंन!

तोर कोप ह ओ भय के सहीं बड़े अय, जऊन ह मनखेमन के मन म तोर बर होथे।

12हमर दिनमन ला हमन ला गने बर सिखा,

कि हमन बुद्धिमान हो जावन।

13हे यहोवा, नरम हो जा! येह कब तक होही?

अपन सेवकमन ऊपर दया कर।

14बिहनियां के बेरा, अपन बड़े मया ले हमन ला संतोस कर,

कि हमन जिनगी भर आनंद अऊ खुसी के गीत गावन।

15जतेक दिन तक तेंह हमन ला दुख दे हस,

जतेक साल तक हमन समस्या म पड़े रहेंन, ओतेक समय तक हमन ला खुसी दे।

16तोर काममन तोर सेवकमन ला,

अऊ तोर सोभा ह ओमन के लइकामन ऊपर दिखय।

17परभू हमर परमेसर के अनुग्रह1 हमर ऊपर बने रहय;

हमर बर हमर हांथ के काम ला बनाय रख—

हव, हमर हांथ के काम ला बनाय रख।