Biblica® सुतंतर समकालीन छत्तीसगढ़ी अनुवाद
भजन-संहिता 55:22
Verse 22 is marked below, with the whole chapter around it. Read from the start
संगीत निरदेसक बर। तारवाले बाजामन के संग। दाऊद के एक मसकील।
हे परमेसर, मोर पराथना ला सुन,
मोर बिनती ला अनसुना झन कर;
मोर बात ला सुन अऊ मोला जबाब दे।
मोर बिचारमन मोला चिंता म डारत हें अऊ मेंह बियाकुल हंव
काबरकि मोर बईरी ह मोर बिरूध कहत हे,
अऊ दुस्टमन धमकी देवत हें;
काबरकि ओमन मोर ऊपर दुख-तकलीफ लानत हें
अऊ गुस्सा होके मोला उल्टा-सीधा कहत हें।
मोर हिरदय ह भीतरे-भीतर पीरा म हवय;
मिरतू के आतंक मोर ऊपर छा गे हवय।
डर अऊ कंपकपी मोला घेर ले हवय;
बहुंत भय के कारन मेंह बियाकुल हो गे हंव।
मेंह कहेंव, “कास, मोर एक पंड़की सहीं डेना होतिस!
त मेंह उड़ जातेंव अऊ अराम करतेंव।
मेंह उड़के दूरिहा चले जातेंव
अऊ निरजन जगह म रहितेंव;
मेंह आंधी अऊ तूफान ले दूरिहा
जल्दी से अपन सरन-स्थान म चले जातेंव।”
हे परभू, दुस्टमन ला बिचलित कर दे, ओमन के बात म गड़बड़ी कर दे,
काबरकि मेंह सहर म हिंसा अऊ झगरा देखत हंव।
रात अऊ दिन ओमन सहर के दीवार म चोरी-छुपे घुमथें;
सहर के भीतर दुस्टता अऊ गाली भरे हवय।
सहर म बिनास करइया ताकतमन काम करत हें;
धमकी अऊ लबारी बात येकर गलीमन ला कभू नइं छोंड़ंय।
कहूं कोनो बईरी ह मोर बेजत्ती करतिस,
त मेंह सह लेतेंव;
कहूं कोनो बईरी ह मोर बिरूध खड़े होतिस,
त मेंह ओकर ले छिप जातेंव।
पर येह तो तें अस, मोर सहीं एक मनखे,
मोर संगवारी, मोर लंगोटिया संगी,
जेकर संग परमेसर के घर म
एक समय मेंह संगति के आनंद उठात रहेंव,
जब अराधना करइयामन के बीच
हमन आवत-जावत रहेंन।
अचानक मोर बईरीमन के मिरतू हो जावय;
ओमन मिरतू-लोक म जीयत चले जावंय,
काबरकि दुस्टमन ला ओमन के बीच रहे बर मिलथे।
पर जहां तक मोर बात ए, मेंह परमेसर के नांव लेथंव,
अऊ यहोवा ह मोला बचाथे।
सांझ, बिहनियां अऊ मंझन के बेरा
मेंह ओला दुख म पुकारथंव,
अऊ ओह मोर बात ला सुनथे।
मोर बिरूध करे जावत लड़ई म
ओह मोला बिगर कोनो हानि के बचा लेथे,
हालाकि बहुंते जन मोर बिरोध करथें।
परमेसर, जऊन ह आदिकाल ले बिराजमान हे,
जऊन ह नइं बदलय—
ओह ओमन के सुनही अऊ ओमन ला नम्र करही,
काबरकि ओमन म परमेसर के भय नइं ए।
मोर संगवारी ह अपन संगीमन ऊपर हमला करथे;
ओह अपन करार ला टोरथे।
ओकर बातचीत ह मक्खन के सहीं चिक्कन हवय,
पर ओकर मन म लड़ई के बात रहिथे;
ओकर बचन ह तेल ले जादा नरम हवय,
पर ओमन तलवार निकाले सहीं अंय।
अपन जिम्मेदारी यहोवा ऊपर डार दे
अऊ ओह तोला संभालही;
ओह धरमी ला कभू
डगमगावन नइं देवय।
पर हे परमेसर, तें दुस्टमन ला
बिनास के खंचवा म गिराबे;
खून के पीयासा अऊ धोखेबाज मनखेमन
अपन आधा जिनगी घलो नइं जी सकहीं।
पर जहां तक मोर बात ए, मेंह तोर ऊपर भरोसा करथंव।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.