भजन-संहिता 56

संगीत निरदेसक बर। दूरिहा के बांज रूख म बईठे पंड़की के एक धुन। दाऊद के एक मिकताम। जब पलिस्तीमन दाऊद ला गत म पकड़ ले रिहिन।

1हे मोर परमेसर, मोर ऊपर दया कर,

काबरकि मोर बईरीमन बहुंत पीछा करत हें;

दिन भर ओमन अपन हमला करे के दबाव बनाथें।

2मोर बिरोधीमन दिन भर मोर पीछा करथें;

अपन घमंड म बहुंते झन मोर ऊपर हमला करत हें।

3जब मेंह डर जाथंव, त मेंह तोर ऊपर अपन भरोसा रखथंव।

4परमेसर ऊपर, जेकर बचन के मेंह परसंसा करथंव—

परमेसर ऊपर मेंह भरोसा रखथंव अऊ मेंह नइं डरंव।

मरनहार मनखे ह मोर का कर सकत हे?

5दिन भर ओमन मोर बचन ला तोड़थें-मरोड़थें;

ओमन के जम्मो उपाय मोला बरबाद करे बर रहिथे।

6ओमन सडयंत्र करथें, ओमन घात म लगे रहिथें,

ओमन मोर अवई-जवई ऊपर ये आसा म नजर गड़ाय रहिथें,

कि ओमन मोर परान ले सकंय।

7ओमन के दुस्टता के कारन, ओमन ला बचके झन जावन दे;

हे परमेसर, अपन कोरोध म, ये मनखेमन ला गिरा दे।

8मोर दुरगति ला लिख ले;

मोर आंसूमन ला अपन कुप्पी म रख ले—

का ओमन तोर अभिलेख म नइं लिखे गे हवंय?

9जब मेंह मदद बर पुकारहूं

त ओमन लहुंटके भागहीं।

येकर दुवारा जानहूं कि परमेसर ह मोर कोति हवय।

10परमेसर ऊपर, जेकर बचन के मेंह परसंसा करथंव,

यहोवा ऊपर, जेकर बचन के मेंह परसंसा करथंव—

11ओही परमेसर ऊपर, मेंह भरोसा रखथंव अऊ मेंह नइं डरंव।

मनखे ह मोर का कर सकथे?

12हे मोर परमेसर, मेंह तोर बर सपथ खाय हंव;

मेंह तोला धनबाद-बलिदान चघाहूं।

13काबरकि तेंह मोला मिरतू ले

अऊ मोर गोड़मन ला ठोकर खाय ले बचाय हस,

ताकि मेंह जिनगी के अंजोर म

परमेसर के आघू म चल सकंव।