Biblica® सुतंतर समकालीन छत्तीसगढ़ी अनुवाद
भजन-संहिता 57
संगीत निरदेसक बर। “झन नास कर” धुन म दाऊद के एक मिकताम। जब ओह साऊल ले भागके गुफा म छुपे रिहिस।
हे मोर परमेसर, मोर ऊपर दया कर, मोर ऊपर दया कर,
काबरकि मेंह तोर करा सरन लेथंव।
जब तक बिपत्ति ह टर नइं जाही
मेंह तोर डेनामन के छइहां म सरन लूहूं।
मेंह सर्वोच्च परमेसर ला पुकारथंव,
ओ परमेसर, जऊन ह मोर रकछा करथे।
ओह स्वरग ले पठोथे अऊ मोला बचा लेथे,
अऊ ओमन ला डांटथे, जऊन मन मोर बहुंत पीछा करथें—
परमेसर ह अपन मया अऊ अपन बिसवासयोग्यता देखाथे।
मेंह सिंहमन के बीच म हंव;
मेंह भूखा जानवरमन के बीच म रहे बर मजबूर हंव—
ओ मनखे, जेमन के दांतमन बरछी अऊ तीर सहीं अंय,
जेमन के जीभमन धारवाले तलवार सहीं अंय।
हे परमेसर, तोर महिमा ह स्वरगमन ले घलो ऊपर होवय;
जम्मो धरती ऊपर तोर महिमा होवय।
ओमन मोर गोड़ बर एक जाल बिछाथें—
दुख म मोर चेहरा ह झुक गे हवय।
ओमन मोर रसता म एक खंचवा खनिन—
पर ओमा ओमन खुद गिर गे हवंय।
हे परमेसर, मोर मन ह अटल हवय,
मोर मन ह अटल हवय;
मेंह गाहूं अऊ बाजा बजाहूं।
हे मोर आतमा, जाग!
हे बीना अऊ सारंगी, जागव!
मेंह बड़े बिहनियां ला जगाहूं।
हे परभू, मेंह जाति-जाति के मनखेमन के बीच म तोर परसंसा करहूं;
मेंह मनखेमन के बीच म तोर गीत गाहूं।
काबरकि तोर मया ह अतेक महान ए कि ओह स्वरग तक हबरत हे;
तोर बिसवासयोग्यता ह अकास तक हबरत हे।
हे परमेसर, तोर महिमा स्वरगमन ले घलो ऊपर होवय;
जम्मो धरती ऊपर तोर महिमा होवय।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.