भजन-संहिता 27

दाऊद के भजन।

1यहोवा ह मोर अंजोर अऊ मोर उद्धार अय—

त मेंह काकर ले डरहूं?

यहोवा ह मोर जिनगी के मजबूत किला अय—

त काकर ले मेंह भय खाहूं?

2जब दुस्ट मनखेमन मोला नास1 करे बर

मोर बिरूध आघू बढ़थें,

त ये मोर बईरी अऊ बिरोधीमन ही

ठोकर खाहीं अऊ गिरहीं।

3यदि एक सेना घलो मोला घेर ले,

तभो ले मेंह नइं डरंव;

यदि मोर बिरोध म लड़ई घलो सुरू हो जावय,

तभो ले मोला भरोसा रहिही।

4एक ठन चीज मेंह यहोवा ले मांगथंव,

सिरिप ये बात मेंह चाहथंव:

कि अपन जिनगी भर

मेंह यहोवा के घर म रहंव,

ताकि यहोवा के सुघरता ला देखंव

अऊ ओकर मंदिर म ओकर धियान करंव।

5काबरकि बिपत्ति के दिन म

ओह मोला अपन निवास म सुरकछित रखही;

ओह अपन पबितर तम्बू के खाल्हे म मोला छिपा लीही

अऊ एक चट्टान के ऊपर ऊंचहा जगह म रखही।

6तब मोर मुड़ ह ओ बईरीमन के आघू म ऊपर हो जाही

जऊन मन मोला चारों कोति ले घेरथें;

ओकर पबितर तम्बू म मेंह आनंद के मारे चिचियावत बलिदान चघाहूं;

मेंह यहोवा बर गीत गाहूं अऊ बाजा बजाहूं।

7हे यहोवा, जब मेंह गोहारंव, त मोर अवाज ला सुन;

मोर ऊपर दया करके मोला जबाब दे।

8मोर हिरदय ह तोर बारे कहिथे, “ओकर चेहरा के खोज म रह!”

हे यहोवा, मेंह तोरेच दरसन के खोज म रहिहूं।

9तेंह मोर ले अपन चेहरा झन छिपा,

गुस्सा होके अपन सेवक ला दूरिहा झन कर दे;

तेंह मोर मदद करइया रहे हस।

हे परमेसर मोर उद्धारकर्ता,

मोला अस्वीकार झन कर या मोला झन तियाग।

10भले ही मोर दाई-ददा मोला तियाग देवंय,

पर यहोवा ह मोला गरहन करही।

11हे यहोवा, मोला अपन रसता के बात सिखा;

मोर ऊपर अतियाचार करइयामन के कारन

मोला सीधा रसता म ले चल।

12मोर बईरीमन के ईछा ऊपर मोला झन छोंड़ दे,

काबरकि लबरा गवाहमन मोर बिरूध ठाढ़ होथें,

अऊ जलन से भरके मोर ऊपर दोस लगाथें।

13मोला ये बात के भरोसा हवय:

कि जीयत परानीमन के देस म

मेंह यहोवा के भलई ला देखहूं।

14यहोवा के बाट जोहत रहव;

मजबूत बनव अऊ हिम्मत रखव

अऊ यहोवा के बाट जोहत रहव।