Biblica® सुतंतर समकालीन छत्तीसगढ़ी अनुवाद
भजन-संहिता 26
दाऊद के भजन।
हे यहोवा, मोला नियाय दे,
काबरकि मेंह एक निरदोस जिनगी जीये हवंव;
मेंह यहोवा ऊपर भरोसा करे हंव
अऊ नइं डगमगाय हंव।
हे यहोवा, मोला परख अऊ मोला जांच,
मोर हिरदय अऊ मोर मन ला जांच ले;
काबरकि तोर अटूट मया के खियाल मोर मन म हमेसा रहिथे
अऊ मेंह तोर बिसवासयोग्यता के भरोसा म जीयत हंव।
मेंह धोखेबाजमन के संग म नइं बईठंव,
अऊ न ही पाखंडीमन के संगति करंव।
मेंह गलत काम करइयामन के संगति ले घिन करथंव
अऊ दुस्टमन के संग नइं बईठंव।
हे यहोवा, मेंह अपन हांथ ला निरदोस रखथंव,
अऊ तोर बेदी करा जाथंव,
अऊ ऊंचहा अवाज म तोर परसंसा करथंव
अऊ तोर जम्मो अद्भूत काममन ला बताथंव।
हे यहोवा, मेंह ओ घर ले मया करथंव, जिहां तेंह रहिथस,
ओ जगह जिहां तोर महिमा रहिथे।
मोर परान ला पापीमन के संग
अऊ मोर जिनगी ला खून के पीयासामन के संग झन ले,
जेमन के हांथमन दुस्टता के उपाय करथें,
अऊ जेमन के जेवनी हांथ ह घूसखोरी ले भरे हवय।
मेंह तो निरदोस जिनगी जीथंव;
मोला छोंड़ा ले अऊ मोर ऊपर दया कर।
मेंह समतल भुइयां म ठाढ़े हवंव;
सभामन म मेंह यहोवा के इस्तुति करहूं।
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.