Biblica® सुतंतर समकालीन छत्तीसगढ़ी अनुवाद
यसायाह 47
बेबिलोन के गिरई
“हे कुंवारी बेटी बेबिलोन,
खाल्हे जा अऊ धुर्रा म बईठ;
हे बेबिलोनीमन1 के रानी सहर,
बिगर सिंघासन के भुइयां ऊपर बईठ।
तोला अब फेर कभू कोमल
या सुकुमार नइं कहे जाही।
जांता ला लेके पीसान पीस;
अपन घूंघट ला हटा दे।
अपन लंहगा ला उठाके उघारे टांग
सोतामन के पानी म ले होके जा।
तोर नंगई ह उघारे जाही
अऊ तोर लाज ह परगट होही।
मेंह बदला लूहूं;
मेंह कोनो मनखे ला नइं छोड़ंव।”
हमर छुड़इया के नांव सर्वसक्तिमान यहोवा अय,
ओह इसरायल के पबितर परमेसर अय।
“हे बेबिलोनीमन के रानी सहर,
चुपेचाप बईठे रह अऊ अंधियार म जा;
तोला अऊ फेर राजमन के रानी
नइं कहे जाही।
मेंह अपन मनखेमन ले नराज रहेंव
अऊ अपन निज भाग ला अपबितर करेंव;
मेंह ओमन ला तोर बस म कर देंव,
अऊ तेंह ओमन ऊपर कुछू दया नइं करे।
डोकरामन ऊपर घलो
तेंह एक ठन भारी जुड़ा मढ़ा देय।
तेंह कहे, ‘मेंह हमेसा बर
रानी अंव!’
पर तेंह ये बातमन ऊपर बिचार नइं करे
या येकर ऊपर धियान नइं देय कि का हो सकत हे।
“तब हे मऊज-मस्ती ले मया करइया, ये बात ला सुन,
तेंह जो अपन सुरकछा म निडर रहिके
अपनआप ले कहिथस,
‘में ही अंव, अऊ मोला छोंड़ कोनो दूसर नइं एं।
मेंह कभू बिधवा नइं होवंव
अऊ न ही मोर लइकामन मरहीं।’
पर, ये दूनों दुख, लइकामन के मरई
अऊ बिधवा होवई अचानक
एके दिन तोर ऊपर आ पड़ही।
तोर बहुंत जादूगरी
अऊ भारी जादू टोनहा करे के बावजूद
ये दुखमन तोर ऊपर पूरा ताकत से आ जाहीं।
तेंह अपन दुस्टता ऊपर भरोसा करे हस
अऊ कहे हस, ‘मोला कोनो नइं देखत हवंय।’
तोर बुद्धि अऊ गियान तोला बहकाथें
जब तेंह अपनआप ला कहिथस,
‘में ही अंव, अऊ मोर छोंड़ अऊ कोनो नइं एं।’
बिपत्ति ह तोर ऊपर आ जाही,
अऊ तेंह नइं जानबे कि येकर ले बाहिर कइसे निकले जाय।
तोर ऊपर अइसन संकट आ जाही
कि तेंह छुड़ौती देके येकर ले बच नइं सकबे;
एक बड़े बिपत्ति, जेकर बारे म तोला मालूम नइं होही,
ओह अचानक तोर ऊपर आ पड़ही।
“तब, अपन जादू टोनहा
अऊ अपन बहुंत जादूगरी के ओ काममन ला करते रह,
जेला तेंह अपन लइकापन ले ही सीखे हस।
सायद तेंह सफल हो जाबे,
सायद तेंह आतंकित कर सकबे।
जऊन सलाहमन ला तेंह ले हस, ओकर ले तोला सिरिप थकावट मिले हवय!
तोर जोतिसीमन आघू आवंय,
ओ तारा देखइयामन, जेमन महिना दर महिना अगम के बात कहिथें,
ओमन तोला तोर ऊपर अवइया बिपत्ति ले बचावंय।
देख, ओमन भूंसा के सहीं अंय;
आगी ह ओमन ला जला दीही।
ओमन अपनआप ला
आगी के जुवाला ले नइं बचा सकंय।
येमन गरम करे कोइला नो हंय,
येह ओ आगी नो हय, जिहां बईठके आगी तापथें।
जम्मो तोर बर वइसने ही अंय—
जेमन के संग तेंह लेन-देन करे हस
अऊ लइकापन ले जेमन के संग मेहनत करे हस।
ओ जम्मो के जम्मो अपन गलत रद्दा म चले जाथें;
अइसे कोनो नइं ए, जऊन ह तोला बचा सकय।
Source notes (1)
- Footnote या कसदीमन
Biblica® सुतंतर समकालीन छत्तीसगढ़ी अनुवाद. Copyright © 2012, 2016, 2021, 2024 Biblica, Inc. Licensed under CC BY-SA 4.0. दुवारा पंजीयन कराय एक ठन ब्यवसायिक चिनहां हरे जेकर उपयोग अनुमति लेके करे जाथे। “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.