यसायाह 46

बेबिलोन के देवतामन

1बेल देवता ह झुकथे, नबो देवता ह घलो खाल्हे झुकथे;

ओमन के मूरतीमन ला पसुमन ऊपर लादके ले जाय जाथे।

जऊन मूरतीमन ला ले जाय जावत हे, ओमन भारी हवंय,

थके पसु बर एक बोझा।

2ओमन एक संग मुड़ नवाके झुक गीन;

बोझा ला उठा नइं सकिन,

ओमन खुद बंधुवई म चले गीन।

3“हे याकूब के संतानमन,

हे इसरायल के जम्मो बांचे मनखेमन, मोर बात ला सुनव,

तुमन, जेमन ला मेंह तुम्हर जनम ले ही ऊपर उठाय हंव,

अऊ तुम्हर जनम ही ले तुमन ला धरके चलत हंव।

4तुम्हर बुढ़ापा अऊ तुम्हर पाके चुंदी के बेरा घलो

मेंह वइसन ही बने रहिहूं, मेंह ओही अंव, जऊन ह तुमन ला संभाले रखही।

मेंह तुमन ला बनाय हंव अऊ तुमन ला धरके ले चलहूं;

मेंह तुमन ला संभालहूं अऊ तुमन ला बचाहूं।

5“काकर संग तुमन मोर तुलना करहू या काकर सहीं मोला बताहू?

काकर संग मोर मिलान करहू कि हमर तुलना करे जा सकय?

6कुछू जन अपन थैली ले सोन उंडेलथें

अऊ तराजू म चांदी तऊलथें;

ओमन सुनार ला बनी देके ये चीजमन ले देवता बनवाथें,

अऊ ओमन येला दंडवत करथें अऊ येकर अराधना करथें।

7ओमन येला अपन कंधा म उठाके ले चलथें,

ओमन येला ओकर जगह म रखथें अऊ ओह उहां ठाढ़े रहिथे।

ओ जगह ले येह हट नइं सकय।

यदि कोनो ओकर मेर जोर से गोहार पारके कहिही, तभो ले येह जबाब नइं दे सकय;

येह ओमन ला ओमन के समस्या ले नइं बचा सकय।

8“येला सुरता रखव, येला मन म रखव,

हे बिदरोहीमन, ये बात तुम्हर मन म रहय।

9पहिले के बातमन ला सुरता करव, बहुंत पहिले के बातमन ला;

काबरकि में परमेसर अंव, अऊ दूसर कोनो नइं एं;

में ही परमेसर अंव अऊ मोर सहीं अऊ कोना नइं एं।

10में तो अन्त के बात सुरू ले ही बतात आय हंव,

अऊ पुराना जमाना ले बतात आय हंव कि अभी घलो का अवइया हे।

में कहिथंव, ‘मोर उपाय स्थिर रहिही,

अऊ जऊन बात मोला बने लगथे, ओला मेंह करहूं।’

11मेंह पूरब ले एक सिकार करइया चिरई,

दूरिहा देस ले, अपन उदेस्य ला पूरा करे बर एक मनखे ला बलावत हंव।

जऊन बात मेंह कहे हंव, ओला पूरा करहूं;

जऊन बात के मेंह योजना बनाय हंव, ओला में करहूं।

12हे कठोर मन वाले, तुमन मोर बात ला सुनव,

तुमन, जऊन मन अब मोर धरमीपन ले दूरिहा हव।

13मेंह अपन धरमीपन ला लकठा म लावत हंव,

येह दूरिहा म नइं ए;

अऊ मोर उद्धार करे म देरी नइं होवय।

मेंह सियोन के उद्धार करहूं,

अऊ इसरायल ला मोर सोभा दूहूं।