यसायाह 48

ढीठ इसरायल

1“हे याकूब के संतानमन, ये बात ला सुनव,

तुमन जेमन ला इसरायल के नांव ले बलाय जाथे

अऊ यहूदा के कतार म ले आथव,

तुमन जऊन मन यहोवा के नांव के सपथ लेथव

अऊ इसरायल के परमेसर के दुहाई देथव—

पर सच्चई या धरमीपन म नइं—

2तुमन जेमन अपनआप ला पबितर सहर के नागरिक बताथव

अऊ इसरायल के परमेसर ऊपर भरोसा रखे के घोसना करथव—

सर्वसक्तिमान यहोवा ओकर नांव अय:

3बहुंत पहिले मेंह पहिले के बातमन ला बताय हंव,

मोर मुहूं ह ओमन के घोसना करिस अऊ मेंह ओमन ला परगट करेंव;

तब अचानक मेंह काम करेंव, अऊ ओ बातमन सच म होईन।

4काबरकि मेंह जानत रहेंव कि तुमन कतेक ढीठ रहेव;

अऊ तुम्हर घेंच के मांस-पेसीमन लोहा सहीं रिहिन,

अऊ तुम्हर माथा ह कांसा के सहीं रिहिस।

5एकर कारन बहुंत पहिले, मेंह ये बातमन ला तुमन ला बताएंव;

ओमन के होय के पहिली, मेंह तुमन ला ओमन के घोसना कर दे रहेंव

ताकि तुमन ये झन कह सकव,

‘येह हमर देवता के काम अय;

मोर लकरी के मूरती अऊ धातु के देवता के हुकूम ले येह होईस।’

6तुमन ये बातमन ला सुने हवव; ओ जम्मो चीज ला देखव।

का तुमन ओमन ला स्वीकार नइं करहू?

“अब ले मेंह तोला नवां-नवां बात

अऊ गुपत के बातमन ला बताहूं, जेमन ला तेंह नइं जानस।

7ओमन अभी सिरजे गे हवंय, बहुंत पहिले ले नइं;

आज ले पहिली तेंह ओमन के बारे सुने घलो नइं रहे।

एकरसेति तें ये नइं कह सकस,

‘हव, में ओमन के बारे म जानत रहेंव।’

8तेंह ओमन के बारे न तो सुने, अऊ न ही समझे हस;

पुराना समय ले, तोर कानमन ला नइं खोले गे रिहिस।

काबरकि मेंह जानत रहेंव कि तेंह कतेक बिसवासघाती अस;

तोला जनम ले ही बिदरोही कहे गे रिहिस।

9अपन नांव बर मेंह कोप करे म देरी करथंव;

अपन महिमा बर मेंह येला तोर ले रोके रखथंव,

अइसन झन होवय कि मेंह तोला पूरा मेटा डारंव।

10देख, मेंह तोला साफ करे हंव, हालाकि चांदी के सहीं नइं;

मेंह दुख के भट्ठी म तोला परखे हंव।

11अपन हित म, हव, अपनेच हित म, मेंह ये करत हंव।

मेंह अपनआप ला बदनाम कइसे कर सकत हंव?

में अपन महिमा दूसर ला नइं देवंव।

इसरायल सुतंतर होईस

12“हे याकूब, हे इसरायल,

जेला मेंह बलाय हंव, मोर बात सुन:

मेंह ओही अंव;

मेंह ही सुरू अऊ में ही आखिरी अंव।

13मोर खुद के हांथ ह धरती के नीव डारिस,

अऊ मोर जेवनी हांथ ह अकास ला बगराईस;

जब में ओमन ला बलाथंव,

त ओमन एक संग ठाढ़ हो जाथें।

14“तुमन सब के सब एक संग आवव, अऊ सुनव:

मूरतीमन ले कोन ह ये बातमन ला पहिले ले बताईस?

यहोवा के चुने संगी ह

बेबिलोन के बिरूध ओकर उदेस्य ला पूरा करही;

ओकर हांथ ह बेबिलोनीमन1 के बिरूध उठही।

15में, हव, मेंह कहे हंव;

हव, मेंह ओला बलाय हंव।

मेंह ओला लानहूं,

अऊ ओह अपन उदेस्य म सफल होही।

16“मोर लकठा म आके ये बात ला सुनव:

“सुरू ले लेके अब तक के घोसना म कोनो बात मेंह गुपत म नइं कहेंव;

जब येह होथे, तब में उहां हंव।”

अऊ अब परमपरधान यहोवा ह मोला पठोय हवय,

अऊ अपन आतमा ले मोला भर दे हवय।

17यहोवा, तोर छुड़इया,

इसरायल के पबितर परमेसर ह ये कहत हे:

“मेंह यहोवा तुम्हर परमेसर अंव,

जऊन ह तोला ओ बात सिखोथे, जऊन ह तोर बर सबले बने अय,

अऊ तोला ओ डहार दिखाथे, जेमा तोला जाना चाही।

18कहूं तें मोर हुकूम ला धियान देय रहिते,

तब तोर सांति ह नदी सहीं,

अऊ तोर अच्छई ह समुंदर के लहरा सहीं होतिस।

19तोर संतानमन बालू के सहीं होतिन,

अऊ तोर लइकामन येकर अनगिनत दाना सहीं होतिन;

ओमन के नांव मोर आघू ले न कभू मिटाय जातिस

न कभू नास करे जातिस।”

20बेबिलोन ला छोंड़ दव,

बेबिलोनीमन ले भाग जावव!

आनंद के जय-जयकार करत ये बात के घोसना करव,

अऊ येकर परचार करव।

धरती के छोर तक येला भेजव,

अऊ कहव, “यहोवा ह अपन सेवक याकूब ला छोंड़ाय हवय।”

21जब यहोवा ह अपन मनखेमन ला मरू-भुइयां म ले होके ले गीस,

तब ओमन ला पीयास नइं लगिस;

ओह ओमन बर चट्टान म ले पानी निकालिस;

ओह चट्टान ला फोर दीस

अऊ पानी के तेज धारा निकलिस।

22“दुस्टमन बर कुछू सांति नइं ए,” यहोवा ह कहिथे।