Yohane 11

Lasarosi sɩŋ

1Baalɛ wʋrʋ cha wʋ wɩɛ baa yagɛ ɩ Lasarosi sɛ wʋ a kili. Wʋ lɩɩ Betaniya, dɩɛ bie gaa Mariya na wʋ kʋɔ Mata lɩɩ na. 2Dɩmʋŋ Mariya wina wʋ ŋmɩɛtɩ n nyina Lasarosi wʋŋ wʋ a kili dɩtɩɛna na, wʋŋ n chɩɛgɩ nuŋ alifeŋsa wʋrʋgɩ Kpaŋjuo dʋɔ na sɛ wʋ mʋ wʋ nyɩnyʋɔsɛ kpaɩ wʋ nafara tie. 3Dɩmʋŋ dʋɔ wʋ diesina fa nʋɔ ga tawɩ Yesu sɛ, <<Kpaŋjuo, wʋŋ nyaa jawʋ wʋ wɩɛ na a kili.>>

4Gʋ Yesu nyii ŋina na, wʋ tawɩ sɛ, <<Dɩmʋŋ lʋm gana baa dɩlɛ kʋ ɩ ɩ. Ama gaa lɩsɛ Ɩsʋɔ jilima ifuli ganaŋkʋ aja mʋna ga dʋɔ na ŋii kɔna jilima fa Bu wʋŋ.>> 5Yesu a ja Mata na wʋ kʋɔ na Lasarosi wɩɛ. 6Ama gʋ wʋ nyii sɛ Lasarosi a kili na, wʋ cha diele gaa wʋ wɩɛ na, wɩɛ ala kpi.

7Wʋrʋgbɩɛ na, wʋ tawɩ wʋ kpalɛnara sɛ, <<N yela na dɩɩ bɔrɛ ju Yudiya.>>

8Ama wʋ kpalɛnara baa tawɩ sɛ, <<Wʋkalaasa, daŋda wʋrʋgbɩɛ n na sɛ Yudatina baa aja baa lɔ nyaŋ bʋɛ, sɛ n ti bɔrɛ nyaa ju dɩmaŋ?>>

9Yesu lɩsɛ ba nʋɔ sɛ, <<Naa karafɩɛ gifi ala n wɩɛna wiitabi naŋ? Baalɛ wʋŋ wʋ dɔŋ wiita na ba aa tuli i, akala takɩɛ dulunya ŋmaŋi yela sɛ wʋ a na. 10Wʋ dɔŋ yuluma na sɛ wʋ a tuli, akala takɩɛ wʋ tana ŋmaŋi i.>>

11Gʋ wʋ tawɩ ŋina wʋrʋgbɩɛ na, wʋ ti tawɩ ba sɛ, <<Daa dɩɛtɛ Lasarosi duo asoroŋ, ama maa ju dɩmaŋ maa ga feŋsi ɩ.>>

12Sɛ wʋ kpalɛnara baa lɩsɛ ɩ nʋɔ sɛ, <<Kpaŋjuo wʋ duo asoroŋ bɩrɛ wʋ a yu lʋm chʋɔ.>> 13Yesu a tawɩ lɩɩ wʋ sɩŋ dʋɔ bɛ, ama wʋ kpalɛnara bɩrɛ jiŋ sɛ asoroŋ wɩɛ sɛ wʋ a tawɩ.

14Dɩmʋŋ dʋɔ wʋ tawɩ tʋlʋ ba sɛ, <<Lasarosi sɩŋ, 15amɩɛ dʋɔ ma asa lɩɛ gʋ ma taŋ dɩmaŋ ŋ, ganaŋkʋ ɩɩ yu lɩɛ di. Ama n yela dɩɩ ju wʋ jaŋ.>>

16Dɩmaŋ sɛ Tomasi [wʋŋ ba yagɛ ɩ sɛ Didimusi] tawɩ wʋ dɔŋa kpalɛnara baa sɛ, <<N yela na daa gba dɩɩ ju, na daa na ɩ dɩɩ ga sɩŋ.>>

Yesu n nyina feŋ lɩɩ sɩŋ naŋ na nkpa

17Gʋ Yesu tala Bataniya na, wʋ na gʋ ba taŋ wuu Lasarosi wɩɛ anara. 18Betaniya mʋ ju Yerusalem n tala mayili ala a. 19Sɛ Yudatina baa fɔɩ kɔŋ na baa gaa tawɩ dʋ Maata na Mariya gʋ ba ŋmɩɛtɩ sɩŋ na. 20Gʋ Mata nyii gʋ Yesu a kɔnɛ na, wʋ lɩɩ gaa jaŋi na ɩ, ama Mariya dʋɔ wʋ wɩɛ waa dʋɔ.

21Maata tawɩ Yesu sɛ, <<Kpaŋjuo, nafʋɔ nya wɩɛ jɩna mɩnaŋ na, ma ŋmɩɛtɩ n sɩŋ ŋ. 22Ama ma jiŋ gʋ dɩtɩɛna gba bʋrʋkʋma gaa nyaa tasɛ Ɩsʋɔ na wʋ a yɩɛ fa nyaŋ.>>

23Yesu tawɩ ɩ sɛ, <<N ŋmɩɛtɩ a ja ti bɔrɛ feŋ kɔŋ nkpa naŋ.>>

24Mata lɩsɛ ɩ nʋɔ sɛ, <<Ma jiŋ gʋ wʋ a ti bɔrɛ feŋ kɔŋ nkpa naŋ feŋ lɩɩ sɩŋ naŋ wɩɩ gaa.>>

25Yesu tawɩ ɩ sɛ, <<Maŋ n nyina feŋ lɩɩ sɩŋ naŋ na nkpa. Wʋkʋma wʋŋ wʋ lɩɛ maŋ di na, hali wʋ sɩŋ gba wʋ a cha nkpa naŋ. 26Sɛ wʋkʋma wʋŋ wʋ chaɩ nkpa naŋ sɛ wʋ lɩɛ maŋ di na, wʋ taŋ wʋ a sɩŋ ŋ. Sɛ nya lɩɛ ŋina di?>>

27Sɛ Mata tawɩ ɩ sɛ, <<Ɛɛŋ Kpaŋjuo, ma lɩɛ di gʋ nyaŋ n nyina Kirisito wʋŋ, Ɩsʋɔ Bu wʋŋ wʋ a kɔŋ dulunya naŋ na.>>

28Gʋ wʋ tawɩ ŋina wʋrʋgbɩɛ na, wʋ bɔrɛ ga yagɛ wʋ kʋɔ Mariya laraŋ. Sɛ wʋ tawɩ ɩ sɛ, <<Wʋkalaasa wʋŋ wɩɛ jɩna, wʋ a tasɛ n dʋɔ.>> 29Gʋ Mariya nyii ŋina na, wʋ kʋlʋ bileŋ ju wʋ jaŋ. 30Dɩmʋŋ saŋa gana na, Yesu n jʋʋ ta dɩɛ bie gaa naŋ ŋ, ama wʋ saŋ wʋ wɩɛ diele gaa Mata jaŋina ɩ na. 31Gʋ Yudatina baa ba wɩɛ Mariya jaŋ baa tawɩ baa dʋ ɩ waa gaa dʋɔ na, na ganaŋkʋ wʋ kʋlʋ bileŋ lɩɩ na, ba kpaŋ ɩ. Ba fa nfɩɛrɛ sɛ wʋ a ju bʋɔ gaa jaŋ wʋ a ga wii bɛ.

32Gʋ Mariya tala diele gaa Yesu wɩɛ sɛ wʋ na ɩ na, wʋ luuŋ wʋ nafara tie sɛ wʋ tawɩ sɛ, <<Kpaŋjuo, nafʋɔ nya wɩɛ jɩna mɩnaŋ na, ma ŋmɩɛtɩ n sɩŋ ŋ.>>

33Gʋ Yesu na ɩ wʋ a wii, na Yudatina baa ba kpamɩna ɩ na gba a wii na, dɩ jʋʋ ɩ sɛ wʋ yɩyɩɛ. 34Sɛ wʋ tasɛ ba sɛ, <<Le sɛ ɩ wuu ɩ?>> sɛ ba lɩsɛ nʋɔ sɛ, <<Kpaŋjuo, kɔŋ gaa kɩɛ.>>

35Sɛ Yesu wii.

36Sɛ Yudatina baa ba wɩɛ dɩmaŋ na tawɩ sɛ, <<Kɩɛ ganaŋkʋ wʋ a ja wʋ wɩɛ!>>

37Sɛ ba barɛ tawɩ sɛ, <<Naa Yesu wina aaŋ fulu bataŋpʋna asa naa? Sɛ wʋ n dɩlɛ lɩɛ Lasarosi na wʋ n baa sɩŋ?>>

Yesu feŋsi Lasarosi kɔŋ nkpa naŋ

38Sɛ dɩ ti jʋʋ Yesu, sɛ wʋ ju akpanaŋ bʋɔ gaa jaŋ. Ga yɩɛ bʋɛ bʋɔ bɛ sɛ ba mʋ bʋɛ tɔ ga nʋɔ. 39Sɛ Yesu tawɩ ba sɛ, <<N gbiliti bʋɩ gaa.>> Ama Maata, baalɛ wʋŋ wʋ sɩŋ na wʋ diesi tawɩ sɛ, <<Kpaŋjuo, dɩmʋŋ saŋa gana wʋ a lɩɩ gɩsɔŋ akala takɩɛ ba wuu ɩ wɩɛ anara mɩnaŋ.>>

40Sɛ Yesu tawɩ ba sɛ, <<Ma n tawɩ nyaŋ sɛ n lɩɛ di na, nyaa na Ɩsʋɔ jilima?>>

41Dɩmʋŋ dʋɔ ba gbiliti bʋɩ gaa. Sɛ Yesu kɩɛ adugbe sɛ wʋ tawɩ sɛ, <<Majuo, maa yɩlɩ nyaŋ gʋ nya nyii ma jaŋ. 42Ma jiŋ gʋ saŋa kʋma nyaa nyii ma jaŋ, ama bakpa baa ba sɩmɩɛɩ jɩna na dʋɔ sɛ maa tawɩ ŋina, na baa lɩɛ di gʋ nyaŋ n kpiri maŋ.>>

43Gʋ wʋ tawɩ ŋina na, Yesu kuusi na doŋ tawɩ sɛ, <<Lasarosi, lɩɩ kɔŋ.>> 44Sɛ sɩrɛ wʋŋ lɩɩ kɔŋ, na dɩkalala pɔgaɩ wʋ nafara na wʋ pamɩɛ sɛ dukuru pɔgaɩ wʋ a asanaŋ.

Sɛ Yesu tawɩ ba sɛ,<<N buoli akura ŋii ba mʋ wuu ɩ na, na ɩ yela ɩ wʋ a pala.>>

Ba jɔ dɩkɔŋ sɛ baa kʋ Yesu

45Sɛ Yudatina fɔɩ baa kɔŋ baa yɩlɩ Mariya, sɛ ba na ŋii Yesu yɩɛ na, ba lɩɛ ɩ di 46Ama ba tɩba barɛ ju Farasitina baa jaŋ ga tawɩ ba bʋrʋ gaa Yesu yɩɛ na. 47Sɛ sei bɩnɩɛ na Farasitina baa yagɛ dɩɛnaŋ bɩnɩɛ naŋ bɩnɩɛ dikpeŋ gaa sila.

Sɛ ba tasɛ sɛ, <<Be sɛ dɩɩ yɩɛ?>> N kɩɛ adaŋgana daasɛ ŋii wʋ a yɩɛ.

48Sɛ dɩ yela sɛ wʋ ju dʋɔ wʋ a yɩɛ ŋina na, wʋkʋma aja lɩɛ ɩ di, na Romatina a kɔŋ gaa warɩɛ daa Ɩsʋɔ tʋm danɛ na daa tibi.

49Sɛ ba tɩba wʋrʋ baa yagɛ ɩ sɛ Kayifasi wʋŋ n cha wʋ nyina sei bɩnɛ dɩmʋŋ bɩriŋnʋɔ gana naŋ, wʋ tawɩ sɛ, <<Ɩ ba jiŋ bʋrʋ kpiniŋ-kpiniŋ ŋ! 50Ɩ ba jiŋ go ŋɩ wɩɛ dieli fa amɩɛ takɩɛ wʋkpa wʋdʋŋdʋlʋŋ sɩŋ fa bakpa na, dɩ kii gʋ baa warɩɛ tibi gaa kpiniŋ?>>

51Wʋ n lɩɩ wʋ tɩŋtɩŋ wʋ jawʋ naŋ bɛ sɛ wʋ tawɩ wɩɛ ŋina a, ama gʋ wʋ yɩɛ sei bɩnɩɛ naŋ bɩnɛ dɩmʋŋ bɩriŋnʋɔ gana naŋ na, wʋ gbala sɛ Yesu aja sɩŋ fa Yudatina kpiniŋ, 52naa Yudatina tibi nyiŋeŋ ŋ, ama na Ɩsʋɔ bie baa ba puseŋ ba chaɩ akpie-akpie dʋɔ na, na a kɔna ba gaa bʋga yɩɛ bʋdʋŋdʋlʋŋ. 53Dɩmʋŋ dʋɔ lɩɩ wɩɩ gana mʋ a ju ba jɔ dɩkɔŋ sɛ baa kʋ ɩ.

54Dɩmʋŋ dʋɔ Yesu baa ti lɩsɛ wʋ wʋsɛ ifuli Yudatina naŋ ŋ. Sɛ wʋ lɩɩ dɩmaŋ ju tibi gaa ga tirina ifuli dʋɔ dɩɛ bie gaa baa yagɛ sɛ Efirim, dɩmaŋ sɛ wʋ na wʋ kpalɛnara baa ga cha.

55Gʋ dɩ tirina Yudatina nyiŋi asadi adiya di na, bakpa fɔɩ lɩɩ ba dɩɛsɛ naŋ ju Yerusalem na baa ga yɩɛ saŋ lɩɩ iniesi naŋ pɔɩ na nyiŋi asadi adiya di ŋii a tala. 56Ba saŋ baa ja Yesu, gʋ ba sɩmɩɛɩ Ɩsʋɔ tʋm danɛ gaa naŋ na, ba tasɛ dɔŋa sɛ, <<Nya n nfɩɛrɛ n nyina sɩnɛ? wʋ aa kɔŋ nyiŋi asadi adiya di ŋina tie? 57Ama sei bɩnɛ na Farasitina baa dʋ bakpa sɛ wʋkʋma wʋŋ wʋ na dieli gaa Yesu wɩɛ na, wʋ n gaa tawɩ ba na baa ga chaŋ ɩ.>>