Yohane 10

Feŋ kparɛ wʋŋ dʋɔ diduu

1Sɛ Yesu tawɩ ba sɛ, <<Maa tawɩ sɛ n nyii na dieli sɛ wʋkʋma wʋŋ wʋ aa mʋna buonɔ jʋʋ feŋ gabui gaa naŋ ŋ, ama wʋ mʋna gbɩɛ gabaŋbaŋ dʋɔ jiŋ jʋʋ na, wʋ yɩɛ ŋmɩɛlɛ na ŋmɩɛla baa ba chamɩna doŋ baa lɩɛ bakpa abʋrɩ na bɛ. 2Sɛ wʋkʋma wʋŋ wʋ a mʋna buonɔ jʋʋ na, wʋ yɩɛ feŋ kparɛ wʋŋ bɛ. 3Buonɔ kɩɛrɛ a tʋlʋ buonɔ gaa fa feŋ kparɛ wʋŋ, sɛ feŋ baa a nyii wʋ lofu. Wʋ a yagɛ wʋ tɩŋtɩŋ wʋ feŋ yɩrɛ sɛ wʋ a mʋ ba lɩɩ. 4Sɛ wʋ mʋ baa ba yɩɛ wʋ tɩŋtɩŋ wʋ teri kpiniŋ lɩɩ na, wʋ a pala ba asanaŋ sɛ wʋ feŋ a kpaŋ ɩ akala takɩɛ ba jiŋ wʋ lofu. 5Ama baa kpaŋ wʋŋ ba ba jiŋ ŋ. Gasiŋteŋ baa se lɩɩ wʋ jaŋ akala takɩɛ wʋŋ ba ba jiŋ ɩ na, ba ba jiŋ wʋ lofu u.>> 6Yesu jɔ ba diduu gana, ama ba n nyii wɩɛ ŋii wʋ a tawɩ na tie e.

Yesu n nyina feŋ kparɛ wʋbam wʋŋ

7Sɛ Yesu ti bɔrɛ tawɩ sɛ, <<Maa tawɩ sɛ n nyii na dieli sɛ maŋ n nyina feŋ buonɔ gaa. 8Baa ba chɩŋkpɩɛ maŋ kɔŋ na kpiniŋ yɩɛ ŋmɩɛla na doŋ dʋɔ ŋmɩɛla bɛ. Ama feŋ baa n nyii ba jaŋ ŋ. 9Maŋ n nyina buonɔ gaa. Wʋkʋma wʋŋ wʋ a mʋna ma dʋɔ jʋʋ na, wʋ a yu mɔlɔgɩ. Wʋ a jʋʋ na wʋ a lɩɩ na wʋ yu adiya. 10Ŋmɩɛlɛ kɔnɛ bɛ na wʋ a gaa ŋmɩɛlɛ, na wʋ a kʋ na wʋ warɩɛ. Ama maŋ bɩrɛ ma kɔŋ na baa yu nkpa bɛ na baa yu ŋɛ na dieli.>>

11Yesu tawɩ sɛ, <<Maŋ n nyina feŋ kparɛ wʋbam wʋŋ. Feŋ kparɛ wʋbam wʋŋ a mʋ wʋ nkpa si fa feŋ baa bɛ. 12Paa diri wʋŋ yɩɛ feŋ kparɛ wʋŋ feŋ baa ba yɩɛ wʋ tɩŋtɩŋ teri i. Dɩmʋŋ dʋɔ wʋ na gʋ gbogboo a kɔnɛ na, wʋ a yela feŋ baa se laŋ. Na gbogboo wʋŋ a chaŋ feŋ dikpeŋ gaa tɩba wʋrʋ na wʋ apuseŋ ba. 13Baalɛ wʋŋ se laŋ, akala takɩɛ wʋ yɩɛ paa diri bɛ sɛ bʋrʋ n tiri ɩ lɩɩ feŋ baa dʋɔ ɔ.>>

14Ma n nyina feŋ kparɛ wʋbam wʋŋ, ma jiŋ ma feŋ sɛ ma feŋ gba jiŋ maŋ, 15takɩɛ ganaŋkʋ Juo wʋŋ jiŋ maŋ sɛ maŋ gba ma jiŋ Juo wʋŋ na. Ma mʋ ma nkpa si fa feŋ baa. 16Ma wɩɛna feŋ ba baŋbaŋ barɛ baa ba taŋ feŋ gabui gana naŋ ŋ. Ŋɩ tiri gʋ maa kɔna ba gaa kpi. Baa gba baa nyii ma lofu na baa yɩɛ feŋ dikpeŋ gadʋŋdʋlʋŋ na baa yu feŋ kparɛ wʋdʋŋdʋlʋŋ. 17Sɛ kpɩnɩdɩ dʋɔ sɛ Majuo a ja ma wɩɛ na, n nyina sɛ ma mʋ ma nkpa si fa sɩŋ ganaŋkʋ maa ti bɔrɛ cha nkpa naŋ. 18Wʋrʋ baa dɩlɛ lɩɛ ma nkpa lɩɩ ma pam naŋ ŋ. Ama ma lɩɩ ma tɩŋtɩŋ ma jawʋ naŋ bɛ sɛ ma mʋ ma nkpa si fa sɩŋ. Ma wɩɛna yikuo na maa mʋ ma nkpa si fa sɩŋ, na maa ti bɔrɛ mʋ ŋɛ. Ŋina sɛ Majuo dʋ maŋ sɛ ma n yɩɛ.

19Gʋ Yudatina bɩnɩɛ baa nyii wɩɛ ŋina na, ba tɩba ti bɔrɛ kparɛ. 20Ba galaga tawɩ sɛ, <<Feliŋ sʋbʋ wɩɛ wʋ tɩba sɛ wʋ nyi warɩɛwʋ. Be n yɩɛ sɛ ɩ nyii wʋ jaŋ?>>

21Ama barɛ dʋɔ tawɩ sɛ, <<Wʋkpa wʋŋ feliŋ sʋbʋ wɩɛ wʋ tɩba na, wʋ aa dɩlɛ tawɩ dɩmʋŋ atawɩ ŋina? Feliŋ sʋbʋ a dɩlɛ fulu ɔtaŋpʋ asa?>>

Ba pɩɛ Yesu

22Sɛ Yudatina asadi adiya di gʋ ba ti bɔrɛ mʋ Ɩsʋɔ tʋm danɛ gaa baa fa Ɩsʋɔ1 Yerusalem dɩɛ naŋ talɛ na. Ŋɩ cha ŋɩ yɩɛ gbaŋgbaŋ saŋa bɛ, 23na Yesu cha wʋ dɔŋ Ɩsʋɔ tʋm danɛ gaa naŋ dieli gaa baa yagɛ sɛ Juo Solomoŋ diko naŋ. 24Sɛ Yudatina baa sila logo ɩ tawɩ ɩ sɛ, <<Saŋa gamʋɔ sɛ nyaa ja sɛ dɩ n daa? Sɛ nyaŋ n nyina Kirisito2 na tawɩ tʋlʋ daa.>>

25Sɛ Yesu lɩsɛ ba nʋɔ sɛ, <<Ma fɩla tawɩ amɩɛ, ama ɩŋ lɩɛ di i. Adaŋgana ŋii ma yɩɛ Majuo yɩrɛ naŋ na, ŋii aaŋ ja di seriya fa maŋ. 26Ama ɩŋ lɩɛdi i, akala takɩɛ ɩ ba yɩɛ ma feŋ ŋ. 27Ma feŋ a nyii ma lofu, ma jiŋ ba sɛ baa kpaŋ maŋ. 28Ma fa ba nkpa ŋii ŋɩ taŋ gɩtɛ, sɛ baa tʋsʋ ʋ. Sɛ wʋrʋ baa dɩlɛ fɔŋɩ ba lɩɩ ma pam naŋ ŋ. 29Majuo wʋŋ wʋ mʋ ba fa maŋ na, yɩɛ wʋjanɛ kii bʋrʋkʋma. Sɛ wʋrʋ taŋ wʋ a dɩlɛ fɔŋɩ ba lɩɩ Majuo pam naŋ ŋ. 30Maŋ na Majuo wʋŋ dɩ yɩɛ bʋdʋŋdʋlʋŋ bɛ.>>

31Sɛ Yudatina baa ti tɔɔsɩ bʋɛ baa lɔ ɩ. 32Ama Yesu tawɩ ba sɛ, <<Ma kalaa amɩɛ adaŋgana ajanɩɛ lɩɩ Majuo wʋŋ jaŋ. Ŋɩ tɩba gamʋɔ dʋɔ sɛ ɩ lɔ maŋ bʋɛ?>>

33Sɛ Yudatina baa lɩsɛ ɩ nʋɔ sɛ, <<Naa ŋina tɩba ŋarɛ dʋɔ sɛ dɩɩ lɔ nyaŋ bʋɛ ɛ. Ama mbusu wɩɛ ŋii nyaa tawɩ na dʋɔ. Akala takɩɛ nya yɩɛ wʋkpa bɛ yela nyaa tawɩ sɛ nya yɩɛ Ɩsʋɔ.>>

34Sɛ Yesu lɩsɛ ba nʋɔ sɛ, <<Ba n sabɩɛ dʋ amɩɛ mbara naŋ sɛ, <Ɩsʋɔ tawɩ sɛ ɩ yɩɛ panɩŋ?>3 35Sɛ wʋ yagɛ baa Ɩsʋɔ wɩɛ mʋna ba dʋɔ kɔŋ na sɛ panɩŋ na. Dɩmʋŋ bɩrɛ Ɩsʋɔ Sabɩɛwɩɛ yɩɛ gasiŋteŋ. 36Juo wʋŋ n yɩɛ maŋ wʋsɛ chɩrɩchɩrɩ takɩɛ wʋ tɩŋtɩŋ wʋ teri, sɛ wʋ kpiri maŋ dulunya gana naŋ. Be n yɩɛ sɛ ɩ pʋɩ maŋ sɛ ma tawɩ mbusu wɩɛ, akala takɩɛ maa tawɩ sɛ, <maŋ n nyina Ɩsʋɔ Bu?> 37N baa lɩɛ maŋ di, amʋɔ ma yɩɛ ŋii Majuo a yɩɛ na. 38Ama sɛ ma yɩɛ ŋɛ na, ŋɩ wɩɛ tɩba takɩɛ ɩŋ lɩɛ maŋ di i, n lɩɛ adaŋgana ŋii di ganaŋkʋ ɩɩ jiŋ na ɩ nyii tie sɛ Majuo wʋŋ wɩɛ ma tɩba, sɛ maŋ gba ma wɩɛ wʋ tɩba.>> 39Ba ti bɔrɛ ja sɛ baa chaŋ ɩ, ama wʋ lɩɩ ba jaŋ laŋ.

40Sɛ Yesu bɔrɛ tɩɛsɛ Yodaŋ buo gaa ju diele gaa Yohane cha wʋ a sɔ bakpa Ɩsʋɔ sɔ na. Sɛ wʋ cha dɩmaŋ 41sɛ bakpa galaga kɔŋ wʋ jaŋ gaa tawɩ sɛ, <<Ŋɩ wɩɛ tɩba sɛ Yohane n yɩɛ adaŋgana daasɛ ɛ, ama baalɛ wina wʋsɛ dʋɔ wɩɛ ŋii Yohane cha tawɩ na kpiniŋ yɩɛ gasiŋteŋ bɛ.>> 42Sɛ bakpa galaga baa ba wɩɛ dɩmaŋ na, lɩɛ Yesu di.