Yohane 12

Mariya chɩɛgɩ nuŋ alifeŋsa wʋrʋgɩ Yesu nafara dʋɔ

1Gʋ dɩkaka wɩɛ lʋrʋ na baa di nyiŋi asadi adiya di na, Yesu kɔŋ Betaniya, diele gaa Lasarosi wʋŋ Yesu cha feŋsi ɩ lɩɩ sɩŋ naŋ na chaɩ. 2Dɩmaŋ sɛ ba tɩŋɛ adiya fa Yesu. Mata n cha fa adiya ŋina, na Lasarosi cha wʋ yɩɛ baa ba na Yesu chaɩ baa di na tɩba wʋrʋ. 3Sɛ Mariya mʋ sapɩɛ bie garɛ gaa nuŋ alifeŋsa ŋii ŋɩ yɩɛ naadɩ nuŋ sɛ ŋɩ yawʋ wɩɛ doŋ na wɩɛ ga tɩba, sɛ wʋ chɩɛgɩ wʋrʋgɩ Yesu nafara dʋɔ sɛ wʋ mʋ wʋ nyɩnyʋɔsɛ kpaɩ, sɛ nuŋ alifeŋsa ŋii gifeŋ lɩɛ waa gaa dʋɔ kpiniŋ.

4Ama Yesu kpalɛnara baa tɩba wʋrʋ wʋŋ baa yagɛ ɩ sɛ Yudasi Isikariyoti wʋŋ wʋrʋgbɩɛ wʋ a lɩsɛ ɩ fa na, tawɩ sɛ, 5<<Be n yɩɛ sɛ ba n yaa nuŋ alifeŋsa ŋina na baa yu wʋrʋ bɩriŋnʋɔ kɩmtʋɔ na baa mʋ aterembie ŋii fa ayɔŋtina?>> 6Naa ayɔŋtina baa wɩɛ n tiri ɩ dʋɔ sɛ wʋ tawɩ dɩmʋŋ ŋ, ama wʋ yɩɛ ŋmɩɛlɛ bɛ. Na wʋŋ n chamɩna ba aterembie takpe yela wʋ a ŋmɩɛlɛ aterembie ŋii ŋarɛ.

7Sɛ Yesu lɩsɛ ɩ nʋɔ sɛ, <<N yela ɩ. Wʋ mʋ dɩmʋŋ nuŋ alifeŋsa ŋina si daa wɩɩ gaa baa wuu maŋ na bɛ. 8Ayɔŋtina bɩrɛ, ba wɩɛ amɩɛ jaŋ saŋa kʋma. Ama maŋ bɩrɛ, ma taŋ amɩɛ jaŋ saŋa kʋma a.>>

9Gʋ Yudatina baa fɔɩ nyii gʋ Yesu wɩɛ Betaniya na, ba kɔŋ dɩmaŋ. Naa Yesu nyiŋeŋ dʋɔ sɛ ba kɔnɛ ɛ, ama na baa na Lasarosi wʋŋ Yesu cha feŋsi ɩ lɩɩ sɩŋ naŋ na. 10Dɩmʋŋ dʋɔ Ɩsʋɔ sei bɩnɩɛ baa jɔ dɩkɔŋ sɛ baa kʋ Lasarosi gba. 11Akala takɩɛ gʋ Yesu feŋsi Lasarosi na dʋɔ, Yudatina baa galaga a ju Yesu jaŋ, yela baa lɩɛ ɩ baa di.

Yesu jʋʋ Yerusalem takɩɛ juo

12Gʋ tɩɛ na na, bakpa fɔɩ baa ba kɔŋ nyiŋi asadi adiya di ŋii tie na nyii gʋ Yesu dɔŋ na gbɩɛ wʋ a kɔŋ Yerusalem. 13Sɛ ba mʋ abilafa ju na baa ga jaŋina ɩ, yela baa kuusi sɛ,

<<Hosana!1>>

<<Kusee n nyina wʋŋ wʋ a kɔŋ Kpaŋjuo wʋŋ yɩrɛ naŋ!>>2

<<Kusee n nyina Isiraitina Juo!>>

14Sɛ Yesu na kpaŋa bie wʋrʋ sɛ wʋ cha wʋ dʋɔ, ganaŋkʋ ba sabɩɛ Sabɩɛwɩɛ ŋii naŋ si sɛ,

15<<O Siyoŋ bie, n baa se nyɩŋtɩɛ,

n kɩɛ amɩɛ juo a kɔnɛ,

wʋ chaɩ kpaŋa bie dʋɔ.>>3

16Wʋ kpalɛnara baa n chɩŋkpɩɛ nyii ŋina kpiniŋ tie e. Ama wʋrʋgbɩɛ gʋ Ɩsʋɔ fa ɩ jilima na, pɔɩ sɛ ba jiŋ gʋ ba yɩɛ ɩ ŋina kpiniŋ lɩɩna ŋii ba sabɩɛ wʋ wʋsɛ dʋɔ na.

17Sɛ bakpa baa ba wɩɛ Yesu jaŋ saŋa gaa wʋ yagɛ Lasarosi lɩɩ bʋɔ gaa naŋ na, sɛ wʋ feŋsi ɩ lɩɩ sɩŋ naŋ na, ju dʋɔ tawɩ yalagi wɩɛ ŋii. 18Ŋina dʋɔ bakpa fɔɩ lɩɩ na baa ga jaŋina Yesu, lɩɩna adaŋgana daasɛ ŋii wʋ yɩɛ na dʋɔ. 19Dɩmʋŋ dʋɔ Farasitina baa tawɩ dɔŋa sɛ, <<N kɩɛ, ganaŋkʋ dulunya kpiniŋ kpamɩna ɩ, bʋrʋ taŋ sɛ dɩɩ ti dɩlɛ yɩɛ ɛ.>>

Girikitina barɛ a ja Yesu

20Saŋa gaa naŋ na, Girikitina barɛ kpi baa baa ju na baa ga tʋm asadi adiya di na dʋɔ. 21Ba kɔŋ Filipo wʋŋ wʋ lɩɩ Batisayida dɩɛ gaa ga wɩɛ Galaliya na jaŋ gaa sʋlʋ ɩ sɛ, <<Kpaŋjuo, dɩɩ ja sɛ dɩɩ na Yesu.>> 22Sɛ Filipo ju ga tawɩ Andurusi, sɛ baa bala ba ga tawɩ Yesu.

23Sɛ Yesu lɩsɛ ba nʋɔ sɛ, <<Saŋa gaa tala gʋ Wʋkpa Bu wʋŋ aja yu jilima. 24Maa tawɩ sɛ n nyii na dieli sɛ, sɛ ba n duu malɛ bi na gaa tu na, ga saŋ ga yɩɛ malɛ bi garɛ bɛ. Ama sɛ ga tu na, gaa si bie fɔɩ. 25Wʋkpa wʋŋ wʋ a ja wʋ nkpa na, wʋ a paŋ ŋɛ, ama wʋkpa wʋŋ wʋ nkpa n tiri ɩ dulunya gana naŋ na, wʋ a yu nkpa ŋii ŋɩ taŋ gɩtɛ. 26Wʋkʋma wʋŋ wʋ a tʋŋ maŋ na, ŋɩ tiri gʋ wʋ a kpaŋ maŋ na diele gaa ma wɩɛ na, ma tʋmɩrɛ gba a kɔŋ dɩmaŋ. Wʋŋ wʋ a tʋŋ maŋ na, Majuo aja fa ɩ jilima.>>

Yesu tawɩ wʋ sɩŋ dʋɔ wɩɛ

27Sɛ Yesu tawɩ sɛ, <<Dɩtɩɛna ma digela warɩɛwʋ, sɩnɛ sɛ ma n tawɩ? Ma n tawɩ sɛ Majuo, mɔlɔgɩ maŋ lɩɩ dɩmʋŋ awʋrʋfʋɔ saŋa gana naŋ yaa? Aye, dɩmʋŋ awʋrʋfʋɔ ŋina dʋɔ sɛ ma kɔnɛ. 28Majuo, fa n yɩrɛ jilima!>>

Sɛ lofu garɛ lɩɩ Ɩsʋɔ adugbe kɔŋ sɛ, <<Ma taŋ fa ga jilima, sɛ maa ti fa ga jilima.>>

29Gʋ jama baa ba wɩɛ dɩmaŋ nyii ga na, ba tawɩ sɛ duoni fʋba. Sɛ barɛ dʋɔ tawɩ sɛ Ɩsʋɔ gabʋɔ n tawɩ wʋ jaŋ.

30Sɛ Yesu tawɩ sɛ, <<Naa ma dʋɔ sɛ lofu gana kɔnɛ ɛ, ama amɩɛ dʋɔ. 31Dɩtɩɛna saŋa tala gʋ Ɩsʋɔ aja fu dulunya gana dɩpʋɛ. Saŋa gana wʋ a geŋ Sɩtanɩ wʋŋ wʋ a di dulunya gana dʋɔ. 32Ama maŋ bɩrɛ, sɛ ba jiŋna maŋ adugbe lɩɩ tibi gana dʋɔ na, maa fɔŋɩ bakpa kpiniŋ kɔŋ ma jaŋ.>> 33Wʋ tawɩ ŋina mʋ kalaa sɩŋ gaa wʋ a sɩŋ ga na duluŋ bɛ.

34Sɛ jama baa tawɩ sɛ, <<Dɩ nyii lɩɩ mbara ŋii naŋ sɛ Kirisito wʋŋ aja cha gakpaa, be n yɩɛ sɛ nyaa tawɩ sɛ ŋɩ tiri gʋ ba n jiŋna Wʋkpa Bu wʋŋ adugbe? Mmʋɔ n nyina dɩmʋŋ Wʋkpa Bu wina?>>

35Sɛ Yesu tawɩ ba sɛ,<<Ɩɩ yu ŋmaŋi gaa taŋgɩlɛ amɩɛ jaŋ ŋ. N pala saŋa gaa ɩ wɩɛna ŋmaŋi gaa pɔɩ na giteŋteŋbiri a mɩɛna amɩɛ. Wʋŋ wʋ dɔŋ giteŋteŋbiri naŋ na ba jiŋ diele gaa wʋ a ju u. 36Gʋ ɩ saŋ ɩ wɩɛna ŋmaŋi amɩɛ jaŋ n na bɩrɛ, n lɩɛ ŋmaŋi gaa di, na ɩ yɩɛ ŋmaŋi gaa bie.>> Gʋ Yesu tawɩ ŋina taŋ na, wʋ lɩɩ dɩmaŋ ga wɩsɛ wʋ wʋsɛ ba dʋɔ.

Yudatina n lɩɛ Yesu di i

37Hali gʋ Yesu yɩɛ adaŋgana daasɛ ŋina kpiniŋ ba asa dʋɔ na gba, ba saŋ baa n lɩɛ ɩ di i. 38Ŋina tibi bɛ, na wɩɛ ŋii Ɩsʋɔ ɔja Yisaya tawɩ si na, a kɔŋ tɩba sɛ,

<<Kpaŋjuo, Mmʋɔ n lɩɛ daa wɩɛ di,

sɛ Mmʋɔ sɛ Ɩsʋɔ lɩsɛ wʋ doŋ kalaa?>>4

39Ŋina dʋɔ ba n dɩlɛ lɩɛ Yesu di i, akala takɩɛ Yisaya ti tawɩ gatʋŋgʋrʋ sɛ,

40<<Ɩsʋɔ salɩɛ ba asa

sɛ wʋ yela sɛ ba agela yɩɛ doŋ,

na ganaŋkʋ ba asa n baa dɩlɛ na,

yaa ba n baa nyii tie ba nfɩɛrɛ naŋ,

na baa bɔrɛ kɔŋ ma jaŋ na maa chɔ ba.>>5

41Yisaya chɩŋkpɩɛ na Yesu jilima bɛ, dɩmʋŋ dʋɔ sɛ wʋ tawɩ ŋina lɩɩna wʋ dʋɔ.

42Hali ŋina kpiniŋ naŋ na, Yudatina bɩnɩɛ baa tɩba galaga lɩɛ Yesu di. Ama Farasitina baa dʋɔ ba n dɩlɛ lɩsɛ ba lɩɛ di ifuli i, akala takɩɛ baa se nyɩŋtɩɛ sɛ baa geŋ ba lɩɩ Yudatina tʋm danɛ gaa naŋ. 43Baa ja kalɩɛwʋ lɩɩ bakpa jaŋ kii Ɩsʋɔ jaŋ.

Yesu wɩɛ ŋii wʋ tawɩ na aaŋ ja fu dɩpʋɛ

44Sɛ Yesu kuusi na doŋ sɛ, <<Sɛ wʋkpa lɩɛ maŋ di na, naa ma nyiŋeŋ sɛ wʋ lɩɛ di i, ama wʋ lɩɛ wʋŋ wʋ kpiri maŋ na gba di. 45Wʋŋ wʋ na maŋ na, wʋ na wʋŋ wʋ kpiri maŋ na gba. 46Ma kɔŋ dulunya naŋ takɩɛ ŋmaŋi na bɛ, ganaŋkʋ wʋŋ wʋ lɩɛ maŋ di na, baa cha giteŋteŋbiri naŋ ŋ.>>

47Wʋkpa wʋŋ wʋ nyii ma wɩɛ sɛ wʋ n di ŋɩ dʋɔ na, maa fu ɩ dɩpʋɛ ɛ. Akala takɩɛ ma n kɔŋ na maa gaa fu dulunya dɩpʋɛ ɛ, ama na maa gaa mɔlɔgɩ ga. 48Wɩɛ diri wʋrʋ wɩɛ wʋ a fu wʋŋ wʋ pɩɛ maŋ, sɛ wʋ n lɩɛ ma wɩɛ dʋ na dɩpʋɛ. Dɩmʋŋ wɩɛ ŋii ma cha tawɩ na aaŋ ja ŋii fu ɩ dɩpʋɛ dulunya dɩtamtɩŋ. 49Akala takɩɛ wɩɛ ŋii maa tawɩ na n lɩɩ ma tɩŋtɩŋ ma jawʋ naŋ ŋ, ama maa tawɩ ŋii Majuo wʋŋ kpiri maŋ, sɛ wʋ dʋ maŋ sɛ ma n tawɩ na bɛ, na ganaŋkʋ ma n tawɩ ŋɛ na. 50Sɛ ma jiŋ gʋ wɩɛ ŋii wʋ dʋ maŋ sɛ ma n tawɩ na, a fa nkpa ŋii ŋɩ taŋ gɩtɛ. Dɩmʋŋ dʋɔ wɩɛ kʋma ŋii maa tawɩ na, maa tawɩ ŋii Majuo wʋŋ ta tawɩ maŋ sɛ ma n tawɩ na bɛ.