প্রেরিত 7

স্তিফাননি বুংনায়

1অব্লা দেৎসিন যাজকআ স্তিফানখৌ সৗংদৗং, “মা বে নালিশফ্রা নৗংগৌ না?” 2স্তিফাননা বুংফিন্দৗং, “ও বিদা-ফংবায়ফৗর আরৗ বিফাফৗর, আংনি খৗথাখৌ খৗনাছৗং! জৗংনি আজৌ আজৈ বিফা অব্রাহামা জেব্লা বিয়ৗ মিসপটামিয়াওনৗ দংমৗন, হারণাও থানায়নি সিগাং মহিমা গৗনাং ঈশ্বৗরা নুজাদৗং। 3ঈশ্বৗরা হৗনবায়, ‘নৗঙৗ গাওনি হাদৎখৌ আরৗ গুষ্ঠি খুরমাখৌ নাগারলাংনানৈ আং দিন্থিনায় হাদৎনাও থাংদৗ।’1 4বিনিখাইনৗ অব্রাহামমা গাওনি হাদৎ কলদীয়খৌ নাগারনানৈ হারণাও থাহৈদৗং। আরৗ দা নৗংছৗরৗ জেরেও থাদৗং, বে হাদৎনাও ঈশ্বৗরা অব্রাহামখৌ বিনি বিফা থৈনায়নি উনাও থৗনহৎদৗং। 5আরৗ ঈশ্বৗরা অব্রাহামনৗ বেহা আঠেং দৗনৗবৗ জায়গা হৗয়াখৗছৈ, নাথায় ঈশ্বৗরা বিনৗ আরৗ বিনি উনাও বিনি বংশফৗরনৗ হৗনৗ সিমান লাদৗং। অব্লাবৗ অব্রাহামনে সিমান লানায় সমাও বিহা সাছেবৗ বিসা গৈয়া মৗন। 6‘ঈশ্বৗরা অব্রাহামখৌ এরেই বাদি বুংবায়, মানৗনা চারশো বৗছৗরসিম নৗংনি বংশফ্রা মালাইনি হাদৎনাও গলামফৗর জানাংনায়, আরৗ বিছৗরৗ নাছয়জানায়।’ 7নাথায় ঈশ্বৗরা হৗনদৗং, ‘যে জাতিখৌ বিছৗরৗ গলাম জানানৈ সেবা খৗলামনায়, বি জাতিখৌ আঙৗ বিচার আরৗ শাস্তি হৗনায়। বেফৗরনি উনাও বিছৗরৗ বি হাদৎনিফ্রায় অৗংখাৎবৗনায় আরৗ বে জায়গায়াওনৗ আংখৌ সিবিনায়।’ 8বেফৗরনি উনাও বিয়ৗ অব্রাহামনৗ ত্বকছেদনি চুক্তিখৌ হৗদৗং। আরৗ অব্রাহামআ ইসাহাকনি বিফা জায়াছৈ আরৗ ইসাহাকখৌ সারিজানায় নিফ্রায় আট দিনসমাও ত্বকছেদ খৗলামদৗং, ইসাহাকআ গাওনি বিসাজ্লা যাকোবখৌ, আরৗ যাকোবআ বারোজন ফোলেরনি গুদি মানসিফৗরনি বিফা জাদৗং। 9মানৗনা বে ফোলেরনি গুদি মানসিফ্রাছৗ ফংবায় যোষেফখৌ মগন ছানানৈ দাসনি থাখৈ মিশর হাদৎনাও ফানহৎদৗং। নাথায় ঈশ্বৗরা বিজৗং লৗগৗছে দংমৗন, 10আরৗ বিখৌ গাছেন নিদানফৗরাও উদ্ধার হৗদৗং। ঈশ্বৗরা যোষেফখৌ জ্ঞানী আরৗ মিশরনি ফরৌণজৗং অনজানায় খৗলামদৗং; আরৗ রাজাআ বিখৌ গাছেন মিশর হাদৎনি আরৗ গাওনি রাজমহলনি শাসনগিরি ফছংদৗং। 11অব্লা বি সমাও গাছেন মিশরাও আরৗ কানান হাদৎনাও গেদেৎ আংখাল জাদৗংমৗন, গেদেৎ দুঃখ কষ্ট জাদৗংমৗন আরৗ জৗংনি আজৌ আজৈফ্রা জানায় মৗঙাফৗর মৗন্নৗ হায়ি জাবায় মৗন। 12মিশর হাদৎনাও জানায় মৗঙাফৗর দং হৗন্নানৈ জেব্লা যাকোবআ খৗনায়ৗ, অব্লা বিয়ৗ জৗংনি আজৌ আজৈফৗরখৌ বিয়াও নাইনৗ থৗনহৎজেনগ্রৗদৗং। 13খন্নৈ নাইনৗ থাংনায়াও যোষেফআ গাওনি ফংবায়ফৗরনৗ খৗথানান গাওখৌ ছিনায় হৗদৗং। মিশরনি রাজাআ যোষেফনি বংশখৌ মিথিনৗ মৗন্দৗং। 14বেনি উনাও, যোষেফআ গৗসৗয়াও সান্নানৈ গাওনি নখ'রনি গাছেন পঁচাত্তর জন মানসিফৗরখৌ লানানৈ মিশরাও ফৈনৗ বিফা যাকোবখৌ থৗনহৎদৗং। 15অব্লা যাকোবআ মিশরাও থাংফিনদৗং, জেরেও বি আরৗ জৗংনি আজৌ আজৈফ্রা থৈদৗং। 16বিছৗরনি গৗথৈ দেহাফৗরখৌ শিখিমাও লাবৗফিনদৗং আরৗ ফবহৈদৗং যে গৗথৈসালিখৌ অব্রাহামা শিখিমনি হামোরনি বিসাজ্লাফৗরনিফ্রায় টাকা হৗনানৈ বায়দৗং মৗন। 17অব্রাহামজৗং ঈশ্বৗরনি সিমান লানায় বৗথৗরা জাফুংনৗ জেছেনৗ খাঠি জায়ৗ, এছেনৗ মিশরাও ইস্রায়েলফ্রা বাংলাংদৗং। 18বে সমাও মিশরাও গৗদান সাছে রাজা জাদৗং, বিয়ৗ যোষেফনি বিষয়ৈ মৗংবৗ মিথিয়া মৗন। 19বি রাজায়া জৗংনি মানসিফৗরজৗং চালাকি খৗলামদৗং আরৗ আজৌ আজৈফৗরখৌ নাছয়নানৈ বিছৗরনি সারিগৗদান গথ' গৗল্লৈফৗরখৌ বাইরায়াও গাহৎনৗ বাধ্য খৗলামদৗং, জাহাথে বিছৗরৗ থৈয়ৗ। 20বি সমাওনৗ মোশিআ সারিজাদৗং মৗন, আরৗ বিয়ৗ ঈশ্বৗরনি নজরাও মহর গৗছা গথ' মৗন। নখাফৗর দানথাম বিয়ৗ বিফানি ন্ব'য়াও খাংজাদৗং। 21জেব্লা বিয়ৗ বাইরাও গারনানৈ দৗনহৈজায়ৗ, অব্লা ফরৌণ রাজানি বিসাজৗআ বিখৌ লাংনানৈ গাওনি বিসাজ্লা বাদি খাংহৈদৗং। 22আরৗ মোশিআ মিশরনি গাছেন জ্ঞানখৌ ফৗরৗংজানানৈ খৗথায়াও আরৗ খামানিয়াও বৗলৗগ্রা জাদৗং। 23মোশিনি বৗসৗয়া জেব্লা চল্লিশ বৗছৗর জায়ৗ, অব্লা বিয়ৗ গাওনি ইস্রায়েল বিদা ফংবায়ফ্রা মাব্রৈ দং, বেখৌ নাইনৗ গৗসৗয়াও সানবায়। 24আরৗ জেব্লা বিয়ৗ মিশরনি সাছেআ ইস্রায়েলনি সাছেখৌ অন্যায় খৗলামজানায়খৌ নুনানৈ বিখৌ হেফাজাব হৗনৗ থাংদৗং, আরৗ মিশরয়ারিখৌ সিথাৎনান ফাল্ঠা লাদৗং। 25মোশিআ সান্দৗং মৗন, গাওখৌনৗ ঈশ্বৗরা ইস্রায়েলফৗরখৌ উদ্ধার খৗলামনায় হৗন্নানৈ গাওনি ফংবায়ফ্রা মিথিনায়, নাথায় বিছৗরৗ জেবৗ মিথিয়াখৈ। 26নখা নায়ৈ মোশিআ সানৈ ইস্রায়েলফৗরখৌ গাওজৗং গাও নাংজ্লাইনায় নুনানৈ বিছৗরখৌ বেংজ্লাইহৗনৗ হাস্থাইনানৈ হৗনহৈদৗং, ‘ফংবায়ফৗর, নৗংছৗরৗ বিদা ফংবায়ফৗর, মানৗ নৗংছৗরৗ গাওজৗং গাও নাংজ্লাইয়ৗ?’ 27নাথায় জাইয়া গাওনি ইস্রায়েলফৗরনি ছায়াও অন্যায় খৗলামদৗং মৗন, বিয়ৗ মোশিখৌ গুবুন ঠিঙৈ নাজ্রেৎহৎনানৈ হৗন্দৗং, ‘জৗংখৌ বিছার খৗলামনৗ নৗংখৌ ছৗর শাসনগিরি ফছংখৌ? 28নৗং মা কি সান্দৗং মিয়া জেরৈ সাছে মিস্রীয়খৌ সিথাৎদৗং, বিবাদিনৗ আংখৌবৗ সিথাৎনৗ?।’ 29জেব্লা মোশিআ বে বুংনায়খৌ খৗনায়ৗ, অব্লা বিয়ৗ মিশরনিফ্রায় খাৎলাংনানৈ মিদিয়ন হাদৎনাও বিদেশী জানানৈ থাহৈদৗং। আরৗ বি হ্বাদৎনাওনৗ বিনে সানৈ বিসাজ্লাফৗর সারিজাদৗং। 30চল্লিশ বৗছৗর জৗবনাইনি উনাও, সীনয় হাজৗনি খাঠিয়াও মারু গৗরান ফৗথারনি ফাংছে বিংফাং গাইজ্রাওনি অৎ সালায়াও সাছে আরফ'আ মোশিজৗং নুজাদৗং। 31জেব্লা মোশিআ বিখৌ নুদৗং, বিয়ৗ সৗমৗ নাংদৗং, জেরৈ বাদি মৗজাঙৈ নাইনৗ খাঠিয়াও থাঙৗ, অব্লা বিয়ৗ ফৗরবুনি বে রাওখৌ খৗনাদৗং। 32‘আঙৗ নৗংনি আজৌ আজৈফৗরনি ঈশ্বৗর, অব্রাহাম, ইসাহাক, আরৗ যাকোব।’2 মোশিআ থৗর থৗর মাওনানৈ নাইনৗ গৗহৗ খৗলামাখৗছৈ। 33অব্লা ফৗরবুআ বিখৌ হৗন্দৗং, নৗংনি আঠেংনি সেনডেলখৌ খুদৗ, মানৗনা নৗং যে জায়গাও গছংদৗং, বে গৗথার হ্বা। 34মিশরাও আংনি মানসিফৗরখৌ নাছয়জানায়খৌ আং নুবায়, বিছৗরনি গাবখ্রাওনায়খৌ খৗনাবায়, বিছৗরখৌ বাছাইনৗ আং অৗংখাৎবৗদৗং। ফৈ দানৗ ফৈ, আং নৗংখৌ মিশরাও থৗনহৎফিননায়।3 35বে বি মোশিআনৗ জাইখৌ বিছৗরৗ বে রাওফৗরজৗং এৎগারামৗন, জৗংখৌ বিছার খৗলামনৗ নৗংখৌ ছৗর শাসনগিরি ফছংখৌ? বিংফাং গাইজ্রাওয়াও নুজানায় আরফ'নি হেফাজাবজৗং ঈশ্বৗরা বিখৌনৗ শাসনগিরি আরৗ রৈখাগিরি ফছংনানৈ থৗনহৎদৗং। 36বে মোশিআনৗ ইস্রায়েলফৗরখৌ মিশরনিফ্রায় দৈদেননানৈ লাবৗদৗংমৗন, আরৗ মিশর হাদৎনি গৗজা লৈথৗয়াও আরৗ চল্লিশ বৗছৗর মারু গৗরান ফৗথারবারিয়াও বৗথিয়া গৗনাং খামানিফৗর আরৗ সৗমৗ গৗনাং চিহ্নফৗর মাওদৗং মৗন। 37বেয়ৗ বি মোশিআনৗ, জাইয়া ইস্রায়েলফৗরখৌ বেবাদি হৗন্দৗং, ঈশ্বৗরা নৗংছৗরনি বিদা ফংবায়ফৗরনি গেজের নিফ্রায়নৗ আং বাদি সাছে নবি নৗংছৗরনি থাখৈ ফছংনায়। 38মোশিআ মারু গৗরান ফৗথারবারিয়াও ইস্রায়েলফৗরনি হান্জায়াও জৗংনি আজৌ আজৈফৗরজৗং লৗগৗছে দংমৗন। আরৗ সীনয় হাজৗয়াও বিজৗং রাইজ্লাইনায় আরফ'আ বিজৗং লৗগৗছে দংমৗন। জৗংনৗ হৗনৗ থাখৈ বিয়ৗ ঈশ্বৗরনি গৗঠাং খৗথাখৌ বিয়াওনৗ নাজাওদৗং। 39নাথায় জৗংনি আজৌ আজৈফৗরা বিনি খৗথাখৌ মানিনৗ গৗসৗ জায়াখৈমৗন, বিছৗরৗ বিখৌ ফাৎছেজৗং এৎগারনানৈ মিশর হাদৎনাও থাংফিনৗ লুবৈদৗংমৗন। 40বিছৗরৗ হারোণখৌ হৗনবায়, জৗংনি সিগাং জৗংখৌ লামা দিন্ঠিনানৈ দৈদেনলাংনৗ থাখৈ ঈশ্বৗরফৗর বানায়দৗ। জৗংখৌ মিশর হাদৎনিফ্রায় দৈদেনবৗনায় মোশিআ মা জাখৗ, জৗং মিথিয়া! 41বি সমাওনৗ বিছৗরৗ মৗসৌ বিসানি মৗনছে মূর্তি দাদৗং, আরৗ বিনৗ বলি বাওনৗ, আরৗ গাওছৗরনি আখাইজৗং দানায় মূর্তিনি থাখৈ মৗনছে ভোজ খুংদৗং। 42বিনিখাইনৗ ঈশ্বৗরা বিছৗরনিফ্রায় নাইখেফিনবায়, আরৗ নখ্রাংনি সান, নখাফৗর আরৗ হাথৎখিফৗরখৌনৗ সেবা খৗলামনৗ হৗদৗং। বেবাদিনৗ খৗথায়া নবিফৗরনি বিজাবমাও লিৎনায় দং

‘ও ইস্রায়েলনি মানসিফৗর! চল্লিশ বৗছৗর মারু গৗরান ফৗথারবারিয়াও থানায় সমাও,

নৗংছৗর আংনি থাখৈ বলিফৗর এবা মৗঙাফৗর বাওয়াখৈ? 43নৗংছৗরৗ খুলুমনৗ থাখৈ মোলেক মৗদাইনি মূর্তিফৗর আরৗ নৗংছৗরৗ হাতরখি মৗদাই,

রিফননি মূর্তিফৗর দানানৈ থাম্বু বানবায়দৗং মৗন। বিনিখাইনৗ আঙৗ নৗংছৗরখৌ বাবিলনিফ্রায়

বাইরাও বন্দিয়ৈ থৗনহৎনায়।’

44জৗঙৗ আজৌ আজৈফৗরজৗং লৗগৗছে মারু গৗরান ফৗথারবারিয়াও রদাইনৗ থাম্বু দংমৗন হৗন্নানৈ সাক্ষী হৗয়ৗ। ঈশ্বৗরা মানসিখৌ জেরৈ মোশিআ হুকুম হৗদৗং, আরৗ জেরৈ দিন্ঠিদৗং, বেবাদিনৗ বে থাম্বুখৌ বানায়দৗং। 45উনাও বে থাম্বুখৌ মৗন্নানৈ, জৗংনি আজৌ আজৈফ্রা যিহোশূয়নি দৗদৈননাইয়াও বিখৌ গাওছৗরজৗং লাবৗফাদৗং আরৗ বিছৗরনি মৗখাংনিফ্রায় ঈশ্বৗরজৗং হৌয়নহৎজানায় বংশফৗরনি হ্বাদৎফৗরখৌ আওগ্রিহৈনাইয়াও লাংফাদৗং। দায়ূদনি সমসিম বে থাম্বুআ বি হ্বাদৎনাওনৗ দংমৗন। 46দায়ূদনা ঈশ্বৗরজৗং অনজাদৗং আরৗ বিয়ৗ যাকোবনি ঈশ্বৗরনি থাখৈ থাগ্রা গংছে ন্ব'লুনৗ হৗনায় বাদি বিদৗং মৗন। 47নাথায় বে শলোমনছৗ মৗন জাইয়া বেনি থাখৈ ন্ব'খৌ লুদৗং। 48নাথায় দেৎসিনথার ঈশ্বৗরা মানসিফৗর লুনায় ন্ব'ফৗরাও থায়া; নবিফ্রা হৗন্দৗং,

49‘ফৗরবুআ হৗনৗ, স্বৗর্গৗআ আংনি সিংহাসন,

আরৗ বুহুমমা আংনি আঠেংনি খামফ্লাই। আংনি থাখৈ নৗঙৗ মা বাদি ন্ব'লুনৗ?

আংনি থানায় জায়গায়া ববেহা জানায়? 50মা বেফৗর গাছেনখৌবৗ আং গাওনৗ আখাইজৗং

বৗনাইয়াখৈ না?’ 4

51স্তিফাননা বুংবাওবায় নৗংছৗরনি গৗসৗআ মা এছে অখ্রা! নৗংছৗরৗ গুবুনহারিফৗর বাদি, নৗংছৗরৗ ঈশ্বৗরনি মৗজাং খবরখৌ খৗনাছঙা। নৗংছৗরনি আজৌ আজৈফ্রা জেরৈ, নৗংছৗরবৗ বেবাদিনৗ; নৗংছৗরৗ মাব্লাবাবৗ গৗথার জিউনি বুংনায়খৌ মানিয়া। 52নৗংছৗরনি আজৌ আজৈফ্রা নবিফৗরনি ছৗরখৌবা নাছয়াখৈ? বিছৗরৗ গৗবাও বৗছৗরনি সিগাং বি ধৗরৗমিয়া দাস ফৈনায়খৌ খৗথানায় নবিফৗরখৌবৗ সিথাৎদৗং। আরৗ দা নৗংছৗরৗ ধৗরৗমিয়াখৌ বিসারুফৗরনি আখাইয়াও গথাইনানৈ বিখৌ সিথাৎহৗবায়। 53আরফ'ফৗরনি গেজেরজৗং ঈশ্বৗরনি আইনখৌ নৗংছৗরনৗ হৗনায় জাদৗং, অব্লাবৗ নৗংছৗরৗ বে আইনখৌ মানিয়াখৈ।”

স্তিফানখৌ অন্ঠাইজৗং খুবৈথাৎনায়

54স্তিফাননি খৗথাফৗরখৌ খৗনানানৈ সানসুমৈগিরিফ্রা বিখৌ বিরাঠ রাগ জৗংনানৈ বিছৗরৗ হাথায় ওফ্রেদৗং। 55নাথায় স্তিফাননা গৗথার জিউজৗং বুংফাওনানৈ স্বৗর্গৗ ঠিঙৈ নাইগৗদাওনানৈ ঈশ্বৗরনি মহিমা আরৗ যীশুখৌ ঈশ্বৗরনি আগ্ডাঠিং গছংনায় নুনানৈ হৗন্দৗং। 56বিয়ৗ বুংবায়, “নাইদৗ! আঙৗ স্বৗর্গৗখৌ গেওনায় আরৗ মানসিনি বিসাহৌয়াখৌ ঈশ্বৗরনি আগ্ডাঠিং গছংনায় নুদৗং!” 57অব্লা সানসুমৈগিরিফ্রা খৗমাফৗরখৌ আসি মুথুনানৈ মৗজেন হজ্রিদৗং, আরৗ বিছৗর গাছৈবৗ লৗগৗছে স্তিফাননি ছায়াও গৗগ্লাইদৗং, 58বিখৌ নৗগৗরনিফ্রায় বাইরায়াও বুদ্রুনানৈ অন্ঠাইজৗং খুবৈনৗ হমদৗং। বি সমাও, সাক্ষীফ্রা গাও গাওনি ছায়াওনি সি'ফৗরখৌ খুনানৈ শৌল নামনি সাছে জৗহৗলাওনি আঠেং গুডিয়াও দৗনদৗং। 59জেব্লা বিছৗরৗ বিখৌ অন্ঠাইজৗং খুবৈদৗংমৗন অব্লা স্তিফাননা প্রার্থনা খৗলামদৗং, “ও ফৗরবু যীশু আংনি জিউখৌ নাজাওদৗ!” 60উনাও হান্ঠুখরাইনানৈ বিয়ৗ গৗব্রাবমৈ গাবজ্রিনানৈ হৗন্দৗং “ও ফৗরবু, বিছৗরনি পাপফৗরখৌ বিছৗরনি ছায়াও দাখৗখ্লায়!” বে খৗথাখৌ বুংনানৈ থৈবায়।