Mech
প্রেরিত 6
সাত জন হেফাজাব হৗগ্রাফৗর
বি দিনফ্রাও ছেলাফৗরনি সংখ্যা বাংলাংনায়জৗং লৗগৗছে, গ্রীক রাও রাইগ্রা যিহূদীফৗরনি1 গেজেরাও ইব্রীয় রাও রাইগ্রা যিহূদীয়ারিফৗরনি বিরুদ্ধনাও নালিশ হৗদৗং যে গ্রীক রাও রাইগ্রা রান্ডি হিন্জাওফ্রা সানফ্রৗমবৗ রাননায় খরাগখৌ মৗন্নাংগৌনিফ্রায় নেওছিজাদৗং। অব্লা বারোজন ছেলাফ্রা গাছেন ফৗথায়গ্রাফৗরখৌ লিংথুমনানৈ হৗন্দৗং, “ঈশ্বৗরনি বাক্য প্রাচার খৗলামনাইখৌ নাগারনানৈ, জানায় লৗংনায়নি সেবাও নাংখৗঠাবনানৈ থানাইয়া জৗংনি থাখৈ ঠিক অৗঙা। বিনিখাইনৗ ও বিদা ফংবায়ফৗর, নৗংছৗরনি গেজেরনিফ্রায় সাত জন মানসিফৗরখৌ গৗথার জিউজৗং আরৗ জ্ঞানাও বুংফাওনায়ফৗরখৌ সাইখদৗ। আরৗ সানফ্রৗমবনি জানাই খরাগফৗরখৌ রাননায়নি বিবানখৌ জৗঙৗ বিছৗরনৗ গথাইনায়। আরৗ জৗঙৗ প্রার্থনা খৗলামনায়, আরৗ ঈশ্বৗরনি খৗথাবায়নায়াও নাংঠাববায় থানি।” হান্জানি বয়বৗ মানসিফ্রা বে খৗথাখৌ হামজাদৗং, আরৗ বিছৗরৗ ফৗথাইগ্রা আরৗ গৗথার জিউজৗং বুংফাওনায় স্তিফান আরৗ ফিলিপ, প্রখর, নীকানর, তীমোন, পার্মিনা, আরৗ নিকলায়খৌ সাইখ'দৗং। নিকলায়আ যিহূদীয়ারিফ্রা আরৗ যিহূদীয়ারি ধৗরৗমখৌ নাজাওনায় আন্তিয়খিয়ানি সাছে মানসি মৗন। বিছৗরৗ বিছৗরখৌ প্রেরিতফৗরনিয়াও লাংদৗং, আরৗ প্রেরিতফ্রা বিছৗরনি খর'য়াও আখাই হৗনানৈ প্রার্থনা খৗলামদৗং। বেবাদিনৗ ঈশ্বৗরনি খৗথায়া সৗরগিদিং এরলাংদৗং। আরৗ যিরূশালেমাও ছেলাফৗরনি অন্জিমায়াবৗ গৗখ্রৈনৗ বাংসিনলাংদৗং, আরৗ গৗবাং যাজকফ্রাবৗ ফৗথাইনানৈ ঈশ্বৗরনি খৗথাখৌ নাজাওদৗং।
স্তিফানখৌ হমনায়
স্তিফাননা ঈশ্বৗরনিফ্রায় গেদেৎ অনুগ্রহ আরৗ বৗলৗ বুংফাওনায় সাছে মানসি, মানসিফৗরনি গেজেরাও বৗথিয়া গৗনাং হাবাফৗর আরৗ সৗমৗ গৗনাং চিহ্নফৗর দিন্ঠিদৗং। নাথায় কুরীণী আরৗ আলেকসান্দ্রীয়নি গহৗজানায় মুংখজানায় ফৗরবুনি সিবিগ্রা ন্ব'নি মানসিফ্রা আরৗ কিলিকিয়া আরৗ এশিয়ানি গুবুন গুবুন যিহূদীয়ারিফ্রা স্তিফানজৗং তর্ক খৗলামনৗ হমদৗং। নাথায় গৗথার জিউয়া স্তিফাননৗ বেবাদি জ্ঞান হৗদৗং, বিছৗরৗ স্তিফাননি বিরুদ্ধ গছংফৗথানৗ হায়াখৈ। অব্লা যিহূদীয়ারিফ্রা বেবাদি বুংনৗ থাখৈ খাইছে মানসিফৗরনৗ সিরি সিরিয়ৈ উসখায়দৗং, “জৗঙৗ স্তিফানখৌ মোশিনি আরৗ ঈশ্বৗরনি মান গৈয়ি বুংনায় খৗনাদৗং!” বেবাদিনৗ বিছৗরৗ মানসিফৗর, প্রাচীনফৗর আরৗ আইন গুরুফৗরখৌ সুলুংনানৈ হৗদৗং, আরৗ বিছৗরৗ স্তিফানখৌ হমনানৈ সানসুমৈগিরিফৗরনি2 সিগাংয়াও লাংদৗং। বিনি উনাও স্তিফাননি বিরুদ্ধ নংখাই বুংনৗ “খাইছে মানসিফৗরখৌ সিগাংয়াও লাংনানৈ বেবাদি সাক্ষী হৗদৗং, বে মানসিআ জৗংনি গৗথার জায়গানি মান গৈয়ি আরৗ মোশিনি আইননি বিরুদ্ধ খৗথা বুংফ্লাইদৗং। মানৗনা জৗঙৗ বিনি বুংনায়খৌ খৗনাদৗং, যে নাসরৎ যীশুআ বে জায়গাখৌ সংহার খৗলামনায় আরৗ জৗংনৗ হৗনায় মোশিনি বিদি বিধানখৌ সৗলাইনায়।” আরৗ জ'জানায় গাছেনবৗ সানসুমৈগিরিফ্রা স্তিফাননি ঠিঙৈ জেব্লা নাইহাববায় থাদৗং, অব্লা বিনি মৗখাংখৌ আরফ'নি মৗখাংখৌ বাদি নুদৗং।
Source notes (2)
- Footnote বিয়ৗ জাবায়, যিহূদীফৗর জাইফ্রা গ্রীক ভাষা আরৗ সংস্কৃতিখৌ ছৗলাও লাদৗং।
- Footnote আফাৎগিরি এবা সানসুমৈ এবা সেনহেড্রিন
Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.