প্রেরিত 8

মন্ডলিনি মানসিফৗরখৌ শৌলনি হৗছৗনায়

1শৌলআ বিহা স্তিফানখৌ সিথাৎনাইয়াও রাজিজাফাদৗং। বে সমাও যিরূশালেমনি মন্ডলীয়া বিরাট নাছয়জাদৗং, আরৗ প্রেরিতফৗরখৌ নাগারনানৈ গাছেনবৗ যিহূদিয়া, আরৗ শমরীয়া হ্বাদৎফৗরাও ছেৎখাই ফাৎখাই খাৎলাংদৗং। 2খাইছে ঈশ্বৗর ভক্ত মানসিফ্রা স্তিফানখৌ ফবহৈদৗং, আরৗ বিনি জুনৈ বিরাঠনৗ দুঃখ খৗলামদৗং। 3নাথায় শৌলআ বি মন্ডলীখৌ সংহার খৗলামনৗ হমজেনদৗং, আরৗ ন্ব' ন্ব' থাংনানৈ বিশ্বাসি হৌয়াফৗর আরৗ হিন্জাওফৗরখৌ বুদ্রুনানৈ বিছৗরখৌ জৗবথেসালিয়াও জৗবহৈদৗং।

শমরিয়াও মৗজাং খবর খৗথানায়

4ছেৎখাই ফাৎখাই খাৎলাংনানৈ জেরেও বিছৗর থাংনানৈ থাহৈদৗং বিছৗরনৗ মৗজাং খবরখৌ প্রচার খৗলামদৗং মৗন। 5ফিলিপআ শমরীয়ানি মৗনছে গেদেৎ নৗগৗরাও থাংনানৈ বিয়াওনি মানসিফৗরনৗ মসিহনি প্রচার খৗলামদৗং। 6জেব্লা মানসিফ্রা ফিলিপনি রাওখৌ খৗনাদৗং আরৗ বিনি সৗমৗ গৗনাং চিহ্নফৗর মাওনায়ফৗরখৌ নুদৗং, অব্লা বিনি বুংনায়খৌ গাছেনবৗ গৗসৗ হৗনানৈ খৗনাছংদৗং। 7মানৗনা গৗবাং মানসিফৗরনিফ্রায় বাদুয়া জিউফ্রা হজ্রিয়ৈ হজ্রিয়ৈ অৗংখাৎলাংদৗং, আরৗ গৗবাং আঠেং আখাই থৈনায় আরৗ লেংগ্রাফ্রা ছৗখাজাদৗং। 8আরৗ বি নৗগৗরনি মানসিফৗরহা গেদেৎ রংজানায় জাদৗং। 9বি নৗগৗরাও শিমোন নামনি সাছে জাদু গৗরৗং মানসি দংমৗন। বিয়ৗ জাদু দিন্ঠিনানৈ শমরীয়া জাতি মানসিফৗরখৌ বৗথিয়া নাংহৗদৗং। বিয়ৗ গাওখৌ সাছে গেদেৎ মানসি হৗন্নানৈ লায়ৗমৗন। 10আরৗ গেদেৎ উনদৈ বয়বৗ মানসিফ্রা বিনি রাওখৌ খৗনাছংসৗয়ৗমৗন, মানসিফ্রা বুঙৗমৗন, “গেদেৎ বৗলৗ হৗন্নানৈ মিথিজানায় ঈশ্বৗরনি বৗলৗয়া বিনৗ।” 11মানসিফ্রা বিনি খৗথাখৌ গৗসৗ হৗন্নানৈ খৗনাছঙৗ মৗন, মানৗনা গৗবাও সমনিফ্রায় যাদুফৗর দিন্ঠিনানৈ বিয়ৗ মানসিফৗরখৌ সৗমৗ ফৗনাংদৗংমৗন। 12নাথায় ফিলিপআ জেব্লা ঈশ্বৗরনি রাইজৗনি মৗজাং খবরখৌ যীশু খ্রীষ্টনি মুঙৈ খৗথাবায়ৗ, অব্লা মানসিফ্রা ফিলিপনি খৗথাখৌ ফৗথাইদৗং, হৌয়াফ্রাবৗ আরৗ হিন্জাওফ্রাবৗ বাপ্তিস্মা হৗজাদৗং। 13শিমোননা গাওনৗ যীশু খ্রীষ্টখৌ ফৗথাইদৗং, আরৗ বাপ্তিস্মা লাখাংনানৈ ফিলিপজৗং লৗগৗ লৗগৗ জেরেওবৗ থাংফাদৗং আরৗ ফিলিপনি গেদেৎ চিহ্নফৗর দিন্ঠিনায় আরৗ সৗমৗ গৗনাং খামানিফৗরখৌ নুদৗং। 14শমরীয়ানি মানসিফ্রা ঈশ্বৗরনি খৗথাখৌ নাজাওবায় হৗন্নানৈ জেব্লা যিরূশালেমাও থানায় প্রেরিতফ্রা খৗনায়ৗ, অব্লা বিছৗরৗ পিতর আরৗ যোহনখৌ শমরিয়াও থৗনহৎদৗং। 15জেব্লা বিছৗরৗ বিহা ছৗহৈয়ৗ, অব্লা বিছৗরৗ গৗদান বিশ্বাসিফৗরনি থাখৈ গৗথার জিউ মৗন্নায় বাদি বিছৗরনি থাখৈ প্রার্থনা খৗলামদৗং। 16মানৗনা বি সমাওবৗ গৗথার জিউয়া বিছৗরনি ছায়াও ফৈয়াখৌ মৗন, বিছৗরৗ ফৗরবু যীশুনি মুঙৈ বান বাপ্তিস্মা লাদৗংমৗন। 17অব্লা পিতর আরৗ যোহননা বিছৗরনি ছায়াও গাওছৗরনি আখাইখৌ দৗননানৈ প্রার্থনা খৗলামদৗং, আরৗ বিছৗরনিয়াও গৗথার জিউয়া ফৈদৗং। 18জেব্লা শিমোননা নুয়ৗ, প্রেরিতফৗরনি আখাই হৗনায়জৗং গৗথার জিউয়া হৗজাবায়, অব্লা বিয়ৗ প্রেরিতফৗরনিয়াও টাকা লাবৗনানৈ হৗফৈদৗং 19আরৗ বুংদৗং, “আংনৗবৗ বে ক্ষমতাখৌ হৎদৗ, জাহাথে ছৗরনিবা ছায়াও আখাই দৗনব্লা বিবৗ গৗথার জিউখৌ মৗন্নৗহানায় বাদি।” 20নাথায় পিতরা বুংফিনদৗং, “নৗংনি টাকা নৗংজৗং লৗগৗছে আদ্রি জাথৗং, মানৗনা ঈশ্বৗরনি হৗনায় দানখৌ অৗরৈনৗ টাকাজৗং বায়নৗ হায়ৗ হৗন্নানৈ নৗঙৗ সানদৗং। 21জৗংনি বে খামানিয়াও নৗংহা জৗংজৗং মৗংবৗ লৗগৗ লাফানায় এবা মৗনফানায় গৈয়া, মানৗনা ঈশ্বৗরনি সিগাঙাও নৗংনি গৗসৗয়া গৗঠৗং অৗঙা। 22নৗঙৗ বে গাজ্রিনিফ্রায় গৗসৗ ফিনফিন, আরৗ ফৗরবুনিয়াও আশা খৗলামনানৈ প্রার্থনা খৗলাম, জানৗ হাগৌ বিয়ৗ নৗংনি গাজ্রি সান্নায়নি দায়খৌ নৗংনৗ ক্ষমা হৗনায়। 23মানৗনা আঙৗ নুবায়, নৗঙৗ মগন গৗছাজৗং বুংফাওনায় আরৗ গাজ্রি মাওনায় পাপজৗং জৗবজানায়।” 24অব্লা শিমোননা বুংফিনবায়, “নৗংছৗরৗ জেখৌ বুংদৗং, বেফৗরৗ আংনি ছায়াও জায়ি বাদি, অন্নানৈ আংনি থাখৈ ফৗরবুনেও প্রার্থনা খৗলামদৗ।” 25বিনি উনাও বিছৗরৗ গৗজানসিন ফৗরবুনি খৗথাখৌ খৗথাবায়দৗং, আরৗ যীশুনি বিষয়ৈ সাক্ষী হৗদৗং, পিতর, আরৗ যোহননা যিরূশালেমাও থাংফিন্দৗং, যীশু খ্রীষ্টনি খৗথাখৌ বিছৗরৗ থাংফিননায় সমাও বিছৗরৗ লামায়াও শমরীয়ফৗরনি গৗবাং গামিফৗরাও মৗজাং খবরখৌ খৗথাবায়লাংদৗং।

ফিলিপ আরৗ ইথিয়পিয়ানি সাছে মানসি

26দা ফৗরবুনি সাছে আরফ'আ ফিলিপখৌ হৗন্দৗং, “ঠাম ঠিম জানানৈ খৗলা ঠিঙৈ যিরূশালেমনিফ্রায় গাজায়াও অৗংখাৎলাংনায় মারু গৗরান লামায়াও থাংদৗ।” 27থৗনজানায় বাদি ফিলিপআ অৗংখাৎলাংদৗং, আরৗ লামায়াও বিয়ৗ ইথিয়পিয়ানি1 সাছে রাজকর্মচারিখৌ নুদৗং বিয়ৗ নপুংসক2 মৗন। বিয়ৗ ইথিয়পিয়ানি কান্দাকি রানিনি গাছেন টাকা পায়সাখৌ ভান্ডারি বেংনৗ বিবান হৗজানায়। আরৗ বিয়ৗ যিরূশালেমাও ঈশ্বৗরখৌ খুলুমনৗ থাদৗংমৗন, 28আরৗ ন্ব'য়াও থাংফিন্নায় সমাও বিয়ৗ গাওনি রথ'নাও জিরাইনানৈ যিশাইয় নবিনি বিজাবখৌ ফরাইদৗং মৗন। 29অব্লা গৗথার জিউয়া ফিলিপখৌ হৗন্দৗং, “থাং রথ'নি খাঠিয়াও থাবায়লাংফা।” 30ফিলিপআ রথ'নি খাঠিয়াও খাৎলাংদৗং, আরৗ বিখৌ যিশাইয় নবিনি বিজাবনিফ্রায় ফরাইনায় খৗনাদৗং। অব্লা ফিলিপআ বিখৌ সৗংদৗং, “মা কি, নৗং জেখৌ ফরাইদৗং বিখৌ বুজিবায় না?” 31বিয়ৗ বুংদৗং, “ছৗরবা আংনৗ বিজিৎনানৈ হৗয়াব্লা, মাব্রৈ আং হানায়?” বিয়ৗ ফিলিপখৌ খাওলায়নানৈ গাওজৗং রথ'নাও ফজদৗং। 32নুপুংসকআ শাস্ত্রনিফ্রায় ফরাইনায় রাওয়া বেনৗমৗন,

“বিয়ৗ দানথাৎনৗ লাংজানায় মেন্ডা বাদি,

আরৗ খৗমৗন ছিনগ্রানি সিগাং মেন্ডা বিসায়া জেরৈ সিরি সিরি থায়ৗ,

বেবাদিনৗ বিয়ৗ গাওনি খৗগা ছিয়াখৗছৈ।

33বিয়ৗ লাজি ফৗনাংজাদৗং,

বিনি ছায়াও নিয়াই বিচার খৗলামনায় জায়াখৗ। বিনি বংশনি খৗথা ছৗর খৗথানৗ হাগৌ?

মানৗনা বিনি জীবনখৌ বুহুমনিফ্রায় লাংজাবায়।”

34বি নুপুংসকআ ফিলিপখৌ হৗন্দৗং, “আংনৗ খৗথাছায়, নবিয়া ছৗরনি খৗথা বুংদৗং? গাওনি না ছৗরবা গুবুনি?” 35অব্লা ফিলিপমা শাস্ত্রনি বে খৗথানিফ্রায় বুংনৗ হমজেনানৈ বিনৗ যীশুনি মৗজাং খবরখৌ খৗথাদৗং। 36বিছৗরৗ থাঙৈ থাঙৈ মৗনছে জায়গায়াও ছৗহৈদৗং, বিয়াও দৈ দংমৗন; নুপুংসকআ হৗনবায়, “নাই, বেহা দৈ দং, আংনি থাখৈ বাপ্তিস্মা লানায়াও মা রাইফৗথানায় দং?” 37ফিলিপআ হৗনবায়, “নৗঙৗ নৗংনি গৗসৗমানিজৗং ফৗথাইয়ৗব্লা বাপ্তিস্মা লানৗ হাগৌ?” বিয়ৗ বুংফিনবায়, “আং ফৗথাইয়ৗ, যীশু খ্রীষ্টআনৗ ঈশ্বৗরনি বিসাজ্লা।”3 38নুপুংসকআ গাওনি রথ'খৌ লাখিহৗবায়, আরৗ বিছৗর সানৈবৗ দৈয়াও অৗংখাৎলাংবায়, আরৗ ফিলিপমা বিখৌ বাপ্তিস্মা হৗবায়। 39জেব্লা বিছৗরৗ দৈনিফ্রায় গাখাংবৗয়ৗ, অব্লা ফৗরবুনি গৗথার জিউয়া নুয়া নুস্লাবমা ফিলিপখৌ লাংদৗং। নুপুংসকআ বিখৌ নুয়াখৗছৈ। অব্লাবৗ বিয়ৗ রংজা বাজা গাওনি লামাজৗং থাংদৗং। 40ফিলিপমাখৌ অস্‌দোদ নৗগৗরাও নুনৗ মৗনবায়, আরৗ নৗগৗর নৗগৗরাও মৗজাং খবরখৌ খৗথায়ৈ খৗথায়ৈ কৈসরিয়াও থাংবায়।