প্রেরিত 3

1সানছেখালি বেলাছিনি তিনটায়াও প্রার্থনানি সমাও পিতর আরৗ যোহননা মন্দিরাও থাদৗংমৗন। 2বিয়াও সমাইনা হৗনজানায় দুয়ার মৗখাঙাও সারিজানায়নিফ্রায়নৗ লেংগ্রা সাছে মানসি দংমৗন। মন্দিরাও হাবহৈগ্রাফৗরনিফ্রায় মাংগিনায়নি থাখৈ সানফ্রৗমবৗ বিখৌ বান্নানৈ বিয়াও লাংনানৈ দৗনহৈয়ৗ মৗন। 3জেব্লা পিতর আরৗ যোহনখৌ মন্দিরাও হাবনায় নুয়ৗ, অব্লা বিয়ৗ বিছৗরনিয়াও দানফৗর বিদৗং। 4অব্লা পিতর আরৗ যোহননা বিখৌ নাইহাবনানৈ হৗন্দৗং: “জৗংনি ঠিঙৈ নাইহৎ?” 5অব্লা বি মানসিয়া বিছৗরনিফ্রায় মাবাফৗর মৗনায় সান্নানৈ বিছৗরনি ঠিঙৈ গৗসৗহৗদৗং। 6অব্লা পিতরা বিখৌ হৗনবায়, “আংহা সোনা এবা রুপা গৈয়া, নাথায় আংহা জা দং বিখৌনৗ আং নৗংনৗ হৗয়ৗ। নাসরৎ যীশু খ্রীষ্টনি নামমৈ আং নৗংখৌ হৗন্নৗ, নৗং জিখাংনানৈ থাবায়।” 7আরৗ বিখৌ পিতরা আগ্ডা আখাইয়াও হমনানৈ বৗখাংদৗং আরৗ বে সমাওনৗ বি মানসিনি আঠেংফ্রা আরৗ আগ্রেংফ্রা খৗরৗংদৗং। 8বিয়ৗ বাজ্লখাংনানৈ আঠেঙাও গছংদৗং আরৗ থাবায়নৗ হমদৗং, অব্লা বিয়ৗ থাবায়ৈ-থাবায়ৈ বাজ্লয়ৈ-বাজ্লয়ৈ আরৗ ঈশ্বৗরখৌ বাখ্নায়ৈ-বাখ্নায়ৈ বিছৗরজৗং লৗগৗছে মন্দিরাও থাংদৗং। 9জেব্লা গাছেন মানসিফ্রা বিখৌ থাবায়নায় আরৗ ঈশ্বৗরখৌ বাখ্নায়নাই নুদৗং। 10আরৗ বি সমাইনা মন্দিরনি গেটনাও জিরাইনানৈ বিবায়গ্রা মানসিয়ানৗ হৗন্নানৈ বিছৗরৗ জেব্লা ছিনায়ৗ, অব্লা বিনেও মা জাদৗং বেখৌ নুনানৈ বিছৗরৗ বৗথিয়ানাংদৗং।

মন্দিরাও পিতরনি ফৗরৗংনায়।

11জেব্লা বি মানসিখৌ পিতর আরৗ যোহনজৗং থাফানায় নুদৗং অব্লা মানসিফ্রা সৗমৗ নাংদৗং আরৗ শলোমননি বারান্দা মুংখজানায় জায়গায়াও বিছৗরৗ খাৎবৗনানৈ ফৈদৗং। 12বেখৌ নুনানৈ পিতরা মানসিফৗরখৌ হৗন্দৗং, “ও ইস্রায়েলফৗর, জৗংনি গাওনি বৗলৗজৗং এবা ধৗরৗমিয়াজৗং বে মানসিখৌ থাবায়হৗবায় হৗন্নানৈ নৗংছৗরৗ জৗঙি ঠিঙৈ নাহাবনানৈ মানৗ সৗমৗ নাংদৗং? 13অব্রাহাম, ইসাহাক, আরৗ যাকোবনি ঈশ্বৗরা, জৗংনি আজৌ আজৈফৗরনি বে মাওনায়জৗং গাওনি দাস যীশুখৌ বাখ্নাইদৗং। নাথায় পীলাতনা বিখৌ হগারনৗ সানদৗংমৗনব্লাবৗ, নৗংছৗরৗ বিখৌ সিথাৎহৗনৗ গথাইদৗং আরৗ পীলাতনি সিগাঙাও দসি খৗলামদৗং। 14নৗংছৗরৗ বি গৗথার আরৗ ধৗরৗমিয়া মানসিখৌ এৎগারদৗং বিনি বদল সাছে মানসি সিথাৎগ্রাখৌছৗ হগারহজানৗ অনুমতি লুবৈদৗংমৗন। 15নৗংছৗরৗ জিউনি সৗরজিগিরিখৌ সিথাৎদৗং, নাথায় ঈশ্বৗরা বিখৌ গৗথৈনিফ্রায় গৗঠাং খৗলামনানৈ ফৗঠাংফিনবায়। জৗঙৗ বিনি সাক্ষীফৗর। 16যীশুনি নামৈ ফৗথাইনায়জৗং, বে মানসিয়া জাইখৌ নৗছৗরৗ নুদৗং আরৗ মিথিয়ৗ বিয়ৗ বিখৌ বৗলৗগ্রা খৗলামবায়। বিয়ৗ যীশুআনৗ আরৗ যীশুখৌ ফৗথাইনায়াও বিনি গেজেরজৗংনৗ ফৈয়ৗ আরৗ বি ফৗথাইনায়ানৗ বিখৌ গৗখ্রৗং খৗলামদৗং, আরৗ নৗংছৗর জৗরৈ দা বয়বৗ নুয়ৗ। 17দা, ও ইস্রায়েলনি বিদা ফংবায়ফৗর, আং মিথিগৌ নৗংছৗরনি দৈদেনগিরিফ্রা আরৗ নৗছৗর মিথিয়িখাই যীশুনি ছায়াও বেবাদি মাওবায়। 18নাথায় গৗবাং বৗছৗরফৗরনি সিগাঙাওনৗ মসিহআ সৈনাংনায় হৗন্নানৈ ঈশ্বৗরা গাছেন নবিফৗরনি সিগাঙাও রাইঠিখাদৗং, আরৗ বেবাদিনৗ জাফুংদৗং। 19বিনিখাইনৗ নৗংছৗরৗ গৗসৗ ফিনফিননানৈ ঈশ্বৗরনি ঠিঙৈ গিদিংফিন, অব্লানৗ নৗংছৗরনি পাপফ্রা ছুস্রাংজানায়, যেন বেবাদিনৗ ফৗরবুনিফ্রায় আরাম মৗনৗ হায়ৗ। 20আরৗ বিয়ৗ নৗংছৗরনি থাখৈ যীশুখৌ থৗনহৎনায়, বিনৗ মসিহ, জাইখৌ নৗংছৗরনি থাখৈ সাইখদৗং। 21ঈশ্বৗরা গাওনি গৗথার নবিফৗরজৗং গৗডৗ সিমান লানায়বাদি গাছেনখৌবৗ গৗদান খৗলামজৗবফিননায় সম ছফৈয়াগৌমানি বিয়ৗ স্বৗর্গৗয়াও থাথার নাংনায়। 22বিনিখাইনৗ মোশিআ হৗন্দৗং, ‘নৗংছৗরনি ফৗরবু ঈশ্বৗরা, নৗংছৗরনি থাখৈ আং বাদি সাছে নবিখৌ গাওনি বিদা ফংবায়ফৗরনি গেজের নিফ্রায়নৗ বৗখাংনায়, আরৗ বিনি বুংনায়মানিখৌনৗ খৗনাছংথারনাংনায়। 23জাইয়া নবিনি খৗথাখৌ খৗনাছঙা বিয়ৗ গাওছৗরনৗ মানসিনিফ্রায় এৎখনানৈ জিউয়াও সংহার খৗলামজানায়।’1 24শমূয়েল আরৗ বিনি উনাও ফৈনায় গাছেন নবিফ্রা বে দিনফৗরনি বাথ্রাখৌনৗ বুংলাংখাদৗং। 25নৗংছৗরৗ বি নবিফৗরনৗ ওয়ারিশফৗর, আরৗ নৗংছৗরনি বিফাফৗরজৗং ঈশ্বৗরনি চুক্তি খানাইয়াবৗ নৗংছৗরনি থাখৈনৗ মৗন, বি অব্রাহামনৗ বে খৗথাখৌ বুংদৗংমৗন, ‘নৗংনি জৗলৈজৗংনৗ বুহুমনি গাছেন মানসিফৗরখৌ আঙৗ বৗর হৗনায়।’ 26জেব্লা ঈশ্বৗরা গাওনি দাসখৌ বৗখাংদৗং, নৗছৗরখৌ বৗর হৗনৗ থাখৈ, বিয়ৗ গিবিয়াও বিখৌ নৗংছৗরনিয়াও থৗনহৎদৗং, জাহাথে নৗংছৗর সাফ্রৗমবৗ গাও গাওনি গাজ্রি লামানিফ্রায় গৗসৗফিননৗ হায়ৗ।”