Skip to content
BibleKenya

Mech

প্রেরিত 2

গৗথার জিউ ফৈনায়

জেব্লা পেন্টিকসনি দিননা ছফৈয়ৗ, অব্লা গাছেন বিশ্বাসিফ্রা মৗনছে জায়গায়াও জ'জাফৈদৗংমৗন। আরৗ হঠাৎনৗ স্বৗর্গৗনিফ্রায় গৗব্রাবথার বার বারনায়বাদি সৗদৗব জাদৗং, আরৗ জেরেও বিছৗর জিরাইনানৈ দংমৗন বি ন্ব'য়া গৗমজৗবদৗং। আরৗ বিছৗরৗ নুদৗং যে অৎছালাইফৗর বাদি নুজানানৈ আলাদা বিছৗর সাফ্রৗমনিবৗ ছায়াও ফৈনানৈ থাফৈদৗং। বিছৗরৗ গাছেনবৗ গৗথার জিউজৗং বুংফাওয়াছৈ, আরৗ গৗথার জিউনি বৗলৗজৗং গুবুন গুবুন রাওফৗর বুংনৗ হমদৗং। বি সমাও নখ্রাংনি গাহায়াও থানায় বুহুমনি গাছেন হাদৎনিফ্রায় ঈশ্বৗরখৌ গিগ্রা যিহূদীয়ারিফ্রা যিরূশালেমাও থায়ৗমৗন। জেব্লা বিছৗরৗ বে সৗদৗবখৌ খৗনাদৗং, অব্লা মৗনছে হান্জায়া ফৈনানৈ জ'জাদৗং আরৗ সৗমৗ নাংদৗং, মানৗনা সাফ্রৗমবৗ গাও গাওনি রাওজৗং রাইনায় খৗনাদৗং মৗন। আরৗ বিছৗরৗ বি সমাও সৗমৗ নাংনানৈ হৗনদৗং; “মা, বে রাও রাইনায় মানসিফ্রা গাছেনবৗ গালীলীয় অৗঙা না? অব্লা জৗং মাব্রৈ সাফ্রৗমবৗ বিছৗরখৌ জৗংনি রাওজৗং রাইনায় খৗনাখৗ? পার্থীয়, মাদীয়, আরৗ এলমীয়; মেসোপটেমিয়াও থাগ্রা মানসিফৗর, যিহূদিয়া আরৗ কাপ্পাদকিয়া, পন্ত আরৗ এশিয়ারিফৗর, ফরুগিয়া আরৗ পাম্ফুলিয়া, মিশর আরৗ কুরীণীয় খাঠি খালা লিবিয়নি খাইছে জায়গানি মানসিফৗর, রোম নৗগৗরনিফ্রায় নাইফৈগ্রাফৗর ফৈনায়। (যিহূদিয়ারিফ্রা আরৗ যিহূদিয়ারি ধৗরৗমখৌ নাজাওনায় মানসিফৗর) ক্রীট দ্বীপনি আরৗ আরাবিয়াফৗর অব্লাবৗ জৗং বিছৗরখৌ গাও গাওনি রাওফৗরজৗং ঈশ্বৗরনি গেদেৎ খামানি মাওনায়ফৗরখৌ রাইঠিনায় খৗনায়ৗ।” বিছৗরৗ সৗমৗ নাংনানৈ আরৗ গাওজৗং গাও বেবাদি হৗনজ্লাইদৗং, “বে মাব্রৈ জাখৗ?” নাথায় খাইছে, বিছৗরখৌ ঠিখ্খারি খৗলামনানৈ হৗনবায়, “বিছৗরৗ দ্রাক্ষা বিদৈ লৗংব্রেনান ফেদৗং”

পিতরনি ফৗরৗংনায়

অব্লা পিতরা গুবুন এগারোজন ছেলাফৗরজৗং লৗগৗছে গছংনানৈ হান্জাখৌ গৗব্রাবমৈ হৗন্দৗং, “ও যিহূদিয়ারি বিদা ফংবায়ফৗর আরৗ যিরূশালেমাও থাগ্রাফৗর, আংনি বুংনায়খৌ খৗনাছং, বেফৗরৗ মা, বেখৌ আং খৗথানি, আং বুংনায়খৌ গৗসৗ হৗনানৈ খৗনাছং। নৗংছৗর সান্দৗং, বে মানসিফ্রা ফেদৗং, নাথায় দাছৗ ফুংনি নয়টা জাদৗং। অৗঙা, বে যোয়েল নবিজৗং বেবাদি রাইঠিজাখানায়ানৗ। ঈশ্বৗরা হৗনদৗং,

‘জৗবনায় দিনফ্রাও গাছেন মানসিফৗরনি ছায়াও আঙৗ আংনি গৗথার জিউখৌ লুনানৈ হৗনায়।

নৗংছৗরনি বিসাজ্লা আরৗ বিসাজৗফ্রা ভাববাণী বাদি বুংনায়।

নৗংছৗরনি জৗহৗলাওফ্রা র্দশন নুনায়।

আরৗ নৗংছৗরনি প্রাচীনফৗরা সিমাংফৗর নুনায়।

বে সমাও আঙৗ আংনি দাস আরৗ দাসিফৗরনি ছায়াও আংনি গৗথার জিউখৌ লুনানৈ হৗনায়,

আরৗ বিছৗরৗ ভাববাণী বুংনায়।

আঙৗ গৗজৌয়াও স্বৗর্গৗয়াও বৗথিয়া গৗনাং খামানিফৗর

আরৗ গাহায়াও, বুহুমাও চিহ্নফৗর নুজাহৗনায়,

বে জাবায়, থৈ, অৎ আরৗ আখুন্দৈ খুগ্লুংনায়ফৗর জানায়।

গেদেৎ আরৗ মহিমা গৗনাং ফৗরবুনি দিন ছফৈনায়নি সিগাং সানা খৗমসি জানায়

আরৗ অখাফৗরা থৈ বাদি গৗজা জানায়।

আরৗ বি সমাও জাইফ্রা ফৗরবুনি নামখৌ গাবজ্রিনায় বিয়ৗ বাছাইজানায়।’

ও ইস্রায়েলীফৗর, বে খৗথাখৌ খৗনাছং, নাসরতীয়নি যীশু জাইখৌ ঈশ্বৗরা নৗংছৗরনি গেজেরাও সৗমৗ গৗনাং, চিহ্নফৗর আরৗ বৗথিয়া গৗনাং খামানিফৗরখৌ মাওনানৈ যীশুখৌ গাওজৗং থৗনহৎজানায় হৗন্নানৈ প্রামাণ হৗদৗং, বেখৌ নৗংছৗর গাওছৗরনৗ মিথিগৌ। ঈশ্বৗরা গাওনি পরিকল্পনাবাদি আরৗ গাও সিগাঙাওনৗ মিথিখানানৈ যীশুখৌ নৗংছৗরনি আখাইয়াও গথাইদৗং, আরৗ নৗংছৗরৗ বিখৌ দুষ্টু মানসিফৗরনৗ গথাইনানৈ ক্রুশয়াও ডৗখ্ঠাবনানৈ সিথাৎদৗং। নাথায় ঈশ্বৗরা বিখৌ ফৗঠাংফিন্নানৈ থৈনায়নি বৗলৗনিফ্রায় গহৗদৗং,1 মানৗনা বিখৌ হমথানানৈ লাখিনৗ থৈনায়হা বৗলৗ গৈয়া। দায়ুদআ বেবাদি বিনি বিষয়ৈ হৗন্দৗং,

‘জেব্লাইবৗ ফৗরবুখৌ আঙৗ আংনি সিগাঙাও নুয়ৗ,

মানৗনা বিয়ৗ আংনি আগ্ডা আখাইফাসি দং,

আঙৗ সৈহৗজানায় অৗঙা।

বিনিখাইনৗ আংনি গৗসৗয়া খুশিজৗং বুংফাওদৗং, আংনি খৌগায়া রংজানায়নি খৗথাজৗং সুফুংজাদৗং।

আংনি মৗদৗমা থৈনাংগৌ দংব্লাবৗ আঙৗ ভরসা খৗলামনানৈ থানায়,

মানৗনা নৗঙৗ আংনি জিউমাখৌ গৗথৈ থাগ্রা জায়গায়াও গারনানৈ দৗন্নায় অৗঙা;

নৗঙৗ বে গাওনি গৗথার দাসনি মৗদৗমখৌ ছেওহৗনায় অৗঙা।

নৗঙৗ গৗঠাঙাও থাংনায়নি লামাফৗরখৌ আংনৗ মিথিহৗবায়,

আরৗ নৗঙৗ আংনি খাঠিয়াও থানানৈ আংখৌ রংজানায়জৗং বুংফাওহৗনায়।’

ও বিদা ফংবায়ফৗর জৗংনি ফোলেরনি গুদি মানসিফ্রাছৗ দায়ূদ রাজানি খৗথা আঙৗ নৗংছৗরনৗ খৗথানি। বিয়ৗ থৈবায় আরৗ ফবজাবায়, আরৗ দিনৈসিম বিনি গৗথৈ হাখরা জৗংনিয়াও দং। বিয়ৗ সাছে নবি মৗন, আরৗ বিয়ৗ মিথিগৌ মৗন, ঈশ্বৗরা শপথলানানৈ বিনি সিগাঙাও বে সিমানখৌ লাদৗংমৗন যে, গাওনি সিংহাসনাও দায়ূদনি বংশনিফ্রায় সাছেখৌ রাজা ফজনায়। উনাও মা জানায়, বেখৌ দায়ূদনা নুনৗ মৗনখাদৗং, বিনিখাইনৗ মসিহনি থৈনানৈ ঠাংখাংফিন্নায়নি খৗথা বিয়ৗ রাইঠিদৗং; বিয়ৗ গৗথৈ থাগ্রা জায়গায়াও নাগারজাবৗয়াখৈ, বিনি মৗদৗমা গৗথৈ হাখরাও ছেওয়াখৈ, ঈশ্বৗরা যীশুখৌ থৈনায়নিফ্রায় ঠাংখাংফিনহৗদৗং, বিনি সাক্ষীয়া জৗংনৗ। ঈশ্বৗরা গাওনি আগ্ডাঠিং জিরাইনৗ বিনৗ একথিয়ার হৗদৗং, আরৗ বিনি সিমান লানায় বাদি গৗথার জিউখৌ বিয়ৗ বিফা ঈশ্বৗরনিফ্রায় মৗন্দৗং। বে গৗথার জিউখৌনৗ বিয়ৗ জৗংনি ছায়াও লুনানৈ হৗদৗং; নৗংছৗরৗ দা জাইখৌ নুদৗং আরৗ খৗনাদৗং। দায়ূদনা গাও স্বৗর্গৗয়াও থাঙাখৈ;

‘বিয়ৗ হৗন্দৗংছৗ, ফৗরবুআ আংনি ফৗরবুখৌ হৗন্দৗং, “আং নৗংনি বিসারুফৗরখৌ

নৗংনি আঠেং সিঙাও দৗনাগৌমানি

নৗং আংনি আগ্ডা ঠিঙৈ জিরাইবায় থাদৗ।”’

বিনিখাইনৗ ও ইস্রায়েলফৗর, বিখৌ নৗংছৗরৗ ঠাল্লায়ৈ মিথি, নৗংছৗরৗ জাইখৌ ক্রুশাও ডৗখ্ঠাবনানৈ সিথাৎদৗং, বি যীশুখৌ ঈশ্বৗরা ফৗরবু আরৗ মসিহ খৗলামদৗং!” জেব্লা মানসিফ্রা বে বুংনায়খৌ খৗনায়ৗ, অব্লা বিছৗরৗ গৗসৗয়াও খেং মৗন্দৗং, পিতর আরৗ গুবুন প্রেরিতফৗরনিয়াও সৗংদৗং, “ও বিদা ফংবায়ফৗর, জৗং মা খৗলামনৗ?”

পিতরা বিছৗরখৌ হৗন্দৗং, “নৗংছৗর সাফ্রৗমবৗ গাও গাওনি পাপফৗরনিফ্রায় গৗসৗ ফিনফিনদৗ, আরৗ যীশু খ্রীষ্টনি নামৈ বাপ্তিস্মা লা; অব্লানৗ নৗংছৗরনি পাপফ্রা নিমাহা হৗজানায়; আরৗ নৗংছৗরৗ গৗথার জিউনি বৗরদানখৌ ঈশ্বৗরনিফ্রায় মৗননায়। মানৗনা ঈশ্বৗরা সিমান লাখাদৗং নৗংছৗরনি থাখৈ আরৗ নৗংছৗরনি বিসাফৗর আরৗ জাইফ্রা গৗজানাও দং, আরৗ বিছৗর গাছেন জাইখৌ ফৗরবু ঈশ্বৗরা লিংহৎনিন দং।” বেফৗরখৌ নাগারনানৈবৗ পিতরা গৗবাংথার খৗথাফৗর বুংবায়, আরৗ “নৗংছৗরৗ গাওছৗরখৌ বে দুষ্টু ফিরিনিফ্রায় গাও গাওখৌ বাছাইনৗ গৗরায়ৈ বানজাইবায়!” আরৗ গৗবাং মানসিফ্রা বিনি খৗথাখৌ গৗসৗয়াও ফৗথাইনানৈ বাপ্তিস্মা লাদৗং, আরৗ বি দিননাও হাজারথামছৗ বিশ্বাসিফৗরনি হান্জা জৗং লৗগৗ লাফাদেৎদৗং। আরৗ বিছৗরৗ প্রেরিতফৗরনি ফৗরৗংনায়, লৗগৗ লাজ্লাইনায়, আরৗ ফৗরবুনি ভজ আরৗ প্রার্থনা খৗলামনায়ফৗরাও নাংঠাবনানৈ থাদৗং।

বিশ্বাসিফৗর লৗগৗছেয়ৈ থানায়

প্রেরিতফ্রা গৗবাং বৗথিয়া গৗনাং আরৗ সৗমৗ গৗনাং চিহ্নফৗর মাওনায়াও, আরৗ সাফ্রৗমবৗ গৗথৌ গৗসৗনি সানখৗমানাইজৗং গিদৗংমৗন। গাছেন বিশ্বাসীফ্রা লৗগৗছেয়ৈ থাদৗংমৗন, আরৗ গাওছৗরনি দংনায়ফৗরখৌ গাছেনখৌবৗ রানজ্লাইদৗংমৗন। বিছৗরৗ গাওছৗরনি সম্পত্তি আরৗ মৗঙাফৗরখৌ ফান্নানৈ জাইনৗ জৗরৈ নাংগৌ, বেবাদিনৗ রান্নানৈ হৗদৗংমৗন। সানফ্রৗমবৗ বিছৗরৗ মন্দিরাও খৌছেয়ৈ জ'জাদৗং মৗন, আরৗ বিছৗরৗ লৗগৗছেয়ৈ ফৗরবুনি ভজ আরৗ ন্ব' ন্ব' রংজানায় আরৗ গুরৈ গৗসৗজৗং জাদৗং আরৗ লৗংদৗং মৗন। বিছৗরৗ ঈশ্বৗরখৌ বাখ্নাইদৗং মৗন, আরৗ বয়জৗংবৗ অন্নজানায় জাদৗংমৗন। আরৗ জাইফ্রা বাছায়জাদৗং, বিছৗরখৌ ফৗরবুআ সানফ্রৗমবৗ বিছৗরনি হান্জায়াও হৗদেৎদৗং মৗন।

Source notes (1)
  1. Cross-reference মথি 28:5–6; মার্ক 16:6; লূক 24:5

Mech. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.