OL SAM 149

Sing blong presem Hae God

(Tok i go long ol man.)

1Olgeta.

!Yumi presem Hae God!

Yumi ya, yumi ol man blong hem.

I gud yumi wokem wan niufala singsing,

yumi kam wanples

long fes blong ol narafala man blong hem,

yumi sing long hem blong presem hem.

2Yumi ol laen* blong Isrel,*

hem i mekem yumi.

I gud yumi joen long hem,

yumi glad.

Yumi ol man Saeon,*

hem i King blong yumi.

I gud yumi joen long hem,

yumi glad.

3I gud yumi danis

blong presem nem blong hem,

yumi kilim ol dram mo ol gita blong yumi

blong presem hem.

4Oltaem Hae God i stap glad long yumi.

Oltaem tingting blong yumi i stap daon,

nao hem i mekem yumi win.

5Yumi ol man blong hem,

i gud yumi glad from we yumi win,

i gud yumi singsing delaet

from we yumi glad.

6I gud yumi holem ol naef blong faet blong yumi

we oli sap tu saed,

nao yumi presem hem

we yumi stap singsingaot bigwan.

7Bambae yumi go faet long ol narafala kantri

we bambae yumi winim olgeta,

yumi panisim ol man blong olgeta.

8Bambae yumi putum hankaf

long ol king blong olgeta,

mo bambae yumi fasem ol lida blong olgeta

long ol bigbigfala jen.

9Long fasin ya,

bambae yumi panisim ol man ya

olsem we Hae God i talem.

Hemia fasin we hem i stap folem

blong leftemap nem blong yumi.

!Oltaem yumi mas presem Hae God!