OL SAM 148

Olgeta samting oli mas presem Hae God

(Tok i go long ol man, wetem ol narafala samting.)

1Olgeta.

!Yumi mas presem Hae God!

Yufala evriwan we i stap long heven

yufala i mas presem Hae God.

2Yufala ol enjel blong hem long heven,

yufala i soldia blong hem,

yufala i mas presem hem.

3San mo mun,

yutufala i mas presem hem.

Yufala ol sta,

yufala i mas presem hem.

4Skae, yu we yu stap antap olgeta,

yu mas presem hem,

mo wota, yu we yu stap antap

biaen long skae ya,

yu mas presem hem.

5I gud olgeta ya evriwan

oli presem nem blong Hae God,

from we hem i mekem olgeta long tok blong hem.

6Hem i putum loa long ol samting ya,

se oli mas stap olwe long ples blong olgeta,

mo loa ya bambae i no save lus.

7Yufala ol samting we i stap long wol ya,

yufala i mas presem Hae God.

Yufala ol bigbigfala fis, mo dipsi,

yufala i mas presem hem.

8Laetning, wetem ol ston blong aes,*

sno, wetem ol klaod,

yufala i mas presem hem.

Hariken, yu yu stap obei long hem,

yu mas presem hem.

9Yufala ol bigbigfala hil

wetem ol smosmol hil,

yufala ol tri blong kakae

wetem ol narafala tri,

yufala i mas presem hem.

10Yufala ol anamol blong vilej

wetem ol anamol blong bus,

yufala ol snek wetem ol pijin,

yufala i mas presem hem.

11Yufala ol king

wetem ol man blong evri ples,

yufala ol haeman wetem ol lida,

yufala i mas presem hem.

12Yufala ol gel

wetem ol boe,

yufala ol ololfala

wetem ol pikinini tu,

yufala i mas presem hem.

13Yumi evriwan i mas presem nem blong Hae God.

Nem blong hem i hae moa,

i winim ol narafala nem,

mo paoa blong hem i kasem evri ples

long heven mo long wol.

14Yumi ol laen* blong Isrel,*

yumi ol man blong hem,

mo yumi stap klosap moa long hem.

Hem nao i mekem yumi kam strong

blong yumi stap presem hem oltaem.

!Oltaem yumi mas presem Hae God!