Ananun 16

1Snonkakusya skara monda aw ro sisnesna,

imbape Manseren Allah vevuk wos namukya.

2Frur vebor sena soverada napyum raris mamam sena,

imbape Manseren Allah I monda vemam sane snonkaku.

3Rwir monda faro Manseren Allah I aw vebor bena,

rarirya fararur bena nari namawes.

4Roi vebor Manseren Allah ifrurna fandun naisya ro na oser-oser;

ma fandun vekur snonkaku rari vevyevasya isoine sismai marindi.

5Snonkaku vemararessya Manseren Allah imarisen siva veri;

kakudam, Myam monda sivo sikfis bur marindiyava.

6Snonkaku eve syowi ma veso asuser faro Manseren Allah I nari ismai fakamaman;

ma snonkaku veyararyof faro I nari vyinkwan bur vavyevaya.

7Rofyor kenem bedi ifrur marisen Manseren Allah I,

irya nari mbrov besi Vyuk si fa nwa sive manivov.

8Arasai kermkun kosmai kuker nyan venapes,

ipyum syadi ro nana vebor kosmai kuker nyan ankarkar.

9Snonkaku sifrur aw ro mankunsi,

imbape Manseren Allah I vefaraser ras kenem sena.

10Wairek ismai papoik ro Allah I fa vyuki dawawos,

inja, wos ikofen na nsasarva rofyor dun wos namuk.

11Manseren Allah imarisen kaku insa snonkakusya sfarvavyan kuker napnapes, ma

wankyara sena kako wankyara venapes.

12Varvorna irya roi vefrur ayin faro mampapokya,

vavesasoser vyeja dores nako snar isya ro nyan kakakuya.

13Wosuser vekaku nafrur doryav Mampapok,

vyenavye faro snonkaku veyawos kuker napnapes.

14Masasor wairek vyena namnisra abar veyunbe marmar;

snonkaku veswarnanem nari siwos pamper snerifa ipnunek!

15Rari vepyum wairek vyena nadaw kenem vefo andei-marisen,

namananis rep vesabu mekem rofafisu dares.

16Mundiri vesmai firnanemya irya ipyum syadi ro ismai brawen;

ma ismai fawawi nanemya eve maija syadi ro ismai sarak.

17Snonkaku kenem venapes vyinkwan bur vavyevaya;

snonkaku vemam warek pyum mov ikenem raya irya fyaduru mankundi.

18Mararesya vyedar vave momprafya;

awawowya vyedar farsapiya.

19Korun mankunko fnovek snonkaku sne vekakiva,

ipyum syadi ro koso snonkaku vemararessya ma kosmai rarwas ro nana sfasyarna.

20Mamepen pyum kaku wos farkarkor wasmai kwar, rarirya nari wasmai roi vepyum.

Wakyar faro Manseren Allah I, rarirya nari wasmai aski.

21Snonkaku veswar nanemya kofawi i ro swaruser vesar vyena;

wawos vyena nposer snewar, wos vefrur snekin.

22Swaruser veknon imnis marei vevuk kankenem faro snonkaku vefawi nanem;

snonkaku vefawi nanemba sismai marindi kuker fawawiva sena.

23Snonkaku veswar nanem kyara vepon wawos vyena insape dawos na;

ma wos farkakor vyanna nafrur snekin.

24Wos mayaryer namananis umber;

nmarnden ro sane ma nafrur pararei baken.

25Snonkakusya skara sisya ro neyan veyavyover,

imbape varpurya nyan ani syo yov marmar.1

26Snewar vebiser idif snonkaku fa sifararur;

snar sasop vyedi, idifi fa ifararur.

27Snonkaku vevarvorya ifrowes min vyesi fa sifrur sasar;

wawos vyena namnis for vesber.

28Snonkaku rari vevyeva vyawes rakrok;

mundiri verakafkofen pyer rarwas bati vyesi.

29Snonkaku kenem vekarfiva daw ninyan manivov vyesi,

ma dun si ve nyan vevyeva.

30Swasor au ro snonkaku vemarafrif ma vefnak mkamor,

isya iwasen nyan varvor ro snerido.

31Snonkaku venapes nari ismai ras kenem vekwan kaku;

pik vepyoper vyena namnis wower vedoser.

32Snonkaku vemasasor fasawva isyadi ro snon mambri;

snonkaku veyepen mankundi isyadi ro snonkaku vemun diwer kotaya ma vemerkar mbrov vyesi.

33Snonkakusya simnasen ras varpon sena,

imbape kankarem vekaku ryama ro Manseren Allah I monda.