Ananun 15

1Kankarem vemyaren, vyedar dormomen na namyomen;

imboi wos vesam nbawes masasor.

2Snonkaku vefirnanem wos vyena nasasyar fawawi;

mbape wawos snonkaku venawnower ne fromo monda.

3Manseren Allah myam fafewa roi vebor ro mov nakam;

Myamepen snonkaku rari venapes ma snonkaku rari vevyeva.

4Wawos vepyum namnis raris aiknam vevuk kankenem,

imboi ramar veyankarkar nafrur sneduf.

5Romawa vefawinanemba kyurpum kmar wos farkarkor vyena,

romawa swaruser veknon imarisen imnaf wos farkarkor.

6Ro rum snonkaku rari venapes arasai naisya nabor kaku;

imboi snonkaku rari vevyeva nana ismaina nadaw payamyumba.

7Wawos snonkaku vefirnanem nafo kuker fawawi,

imboi swaruser snonkaku venawnower ne fromo monda.

8Manseren Allah imarisen imnaf nadi snonkaku venapessya,

imboi aiwan farsarser snonkaku rari vevyevasya sena Imarisen nava.

9Manseren Allah vye mbrov snonkaku rari vevyevasya,

imboi Vye syowi snonkaku evesewar fa vefrur kakakuya.

10Snonkaku vefrur roi vevyeva nari sve ninyan si;

snonkaku vemewer vemnaf farkarkorsya nari simar.

11Manseren Allah ifawi pres roi vebor kam vero mun aivuiya;

isyadadi ifawi kako roi kokara ro kosnesna.

12Snonkaku vemarares imewer sisonek indi;

imewer ismai farkarkor ro snonkaku veswar nanemsya ndi.

13Sane veryav ifnai vedar mkamor vemam mayar;

imboi sane vefafardun pyankar sasbik.

14Snonkaku veswar nanem vyesewar monda fa ismai fawawiya;

snonkaku venawnower syombirek kuker fawi nanemba vyena.

15Snonkaku vesinanjarsya sikenem ro do marindi vesyakwar,

imbape snonkaku sane veryav kenem vyedi ifo aski vesyakwar.

16Arasai kermkun nasosif araryof faro Manseren Allah I,

ipyum syadi ro arasai nabor imboi kenemya ifo kuker virvar.

17Ipyum syadi wan wei ram monda kuker vave syowi,

ivye ro wan manfnai kraf vemafen kuker vave mbrov.

18Snonkaku vemasasor fasaw vyawes wos fanfavri,

snonkaku sane vekwan fyasye mbris.

19Snonkaku vemananon nari ismai ker awaw ananjar;

imboi snonkaku venapes imbran ro nyan vepyom.

20Romawa veswarnanem, ifrur doryav kmari;

imboi romawa venawnower vye syowi snariva.

21Snonkaku vefawi nanembaya imarisen ifrur roi eve faindava,

imbape snonkaku vefawinanem, kenem vyeja davyover.

22Aw snonkaku nari nefromo, fyor naser karkara asuser ro snonkaku veseva;

imboi nari navye napyum rofyor snonkaku sibor svuk swaruser.

23Snonkakuyo imarisen kaku snar kankarem vyukna nkaku,

wawos vyena vekyuk ro fafisu anna napyum fafayava.

24Snonkaku veswarnanem imbran ro neyan vesoyov kankenem fioro;

imboi imbran ro nyan veso murvav ve marmaryava.

25Manseren Allah nari Imkok rum snonkaku vemararessya,

imboi Fyadiren was saprop vin kabomya vyeja.

26Aw vevyevana Manseren Allah imarisen nava;

imboi wawos vepyumna nafrur marisen I.

27Snonkaku vesewar arasai vesyadadi kuker nyan vevyeva,

ifrur fa kina vyedi syampurnak.

Mansei vekurpum faferes fasasisna, nari ikenem kuker payamyum.

28Snonkaku rari venapes kyara user wawos vyena;

snonkaku vevarvor dawos wos vevyeva.

29Manseren Allah imnaf nadi ro snonkaku rari venapessya,

imbape Vyinkwan bur snonkaku rari vevarvorsya.

30Maka vemam mayar ifrur sne marisen snonkaku,

abar veyun marisen ifrur sneprei rurya.

31Snonkaku vemnaf pyum wos sansonek veyun faro kankenem

nari skor ive snonkaku vefirnanem.

32Snonkaku vemewer verower wos farkarkor, vye syowi mankundiva ;

snonkaku vemarisen vemnaf wos sansonek vepyum, nari ismai firnanem.

33Araryof faro Manseren Allah I irya farkarkor vedaw firnanem;

snonkaku verun mankundi nari isma som.