Ananun 14

1Vin vefawi nanem vyawes rum ma kina vyedi,

mbape vin vefawi nanemba vramin vyesuya susyov kakek.

2Snonkaku rari veyavyover iraryof ma kyunem faro Manseren Allah I;

Snonkaku kenem veyavyoverva irya donef I.

3Snonkaku vefawi rorovaya imarares ma dow mankundi;

Snonkaku vefirnanem ismai kadaun ro wos vyena.

4Snonkaku vemananon imewer fyan sapiri insa ifron awer padwar;

mbape kuker sapi vesambrav, nari pokem sibor kaku.

5Snonkaku vemam karyer ma rari veyavyover ikada dawos kakaku ro varpon mankakara,

snonkaku vemam karyer imboi veyawos sararer ismai kayaryarva.

6Snonkaku vemarares syewar firnanemya, fama ismaiva,

mbape snonkaku veswar nanem ipyan kaku fa ismai fawawiya.

7Vinkwanbur snonkaku venawnowerya;

snar nari wasmai farkarkor vepyumno ro iva.

8Snonkaku vefirnanem ifawi rosai nari ifrurya,

snonkaku venawnower ivor famfnom snar fawi nanemba vyena.

9Snonkaku vefawi nanemba sasar vyena ne vefakman ke rova vye fandunva;

snonkaku kenem venapes imarisen sasar vyena ne vefakman.

10Marisen rova marindi nakam nevekram ro sane;

snonkaku vesesya sakfawinava.

11Snonkaku venapes rum vyedi kyain nadworem pdef;

snonkaku vevarvor rum vyedi nari kyarvaken.

12Nyanya isya komam ido davyover,

vape varpurya syo yov mun aivuiya.1

13Sava vembrif fyorno ido ikram kanes ro sane;

marasrisenya fyorno ido fyarwe kako ve marindi.

14Snonkaku vevarvor nari dinek bon vevyeva ro varvor vyena,

snonkaku venapes nari dinek bon vepyum ro frurpyum vyena.

15Snonkaku vefawi karyonba ikyar wos snonkakusya,

snonkaku swaruser veknon kyara user rosai ifrurna.

16Snonkaku vefirnanem syasor i ma vyinkwan bur varvorna,

vape snonkaku venawnower fyasnai beri dormomen vyena ma kyara roi ifrurna napyum.

17Snonkaku vemasasor fasawya ifawi napyomba;

snonkaku swaruser veknonya vye avaven.

18Snonkaku vefawi karyonbaya nari ifawi nanemba;

snonkaku swaruser veknon nari fawawi vyena nfanfanfon.

19Snonkaku vevarvor nari kyunem faro snonkaku kenem venapesya,

ma dor insa ismai syowi ro i.

20Snonkaku vesavarar, manivov vyesya monda simarisen iva;

imboi snonkaku venana bati vyesya sibor kaku.

21Mundiri vekoryaye snonkaku vese, ifrur sasar;

Mundiri vefrur pyum faro snonkaku vesavarar, nari ismai aski.

22Mundiri vekara fa vefrur roi vepyum, nari ismai kayaryar ma sve syowi i;

mundiri vekara frur vevyeva isya ro neyan sunkarkir.

23Ro sasewar ma marmor kanderana nari kosmai bon;

mbape wawos eve beidi nadaw ananjar ma sovarar.

24Snonkaku vefirnanem ismai ararer ro kawasa vebor snar fawawi nanem vyena,

snonkaku venawnowerya sifawi bos i ro fawiroyova vyena.

25Snonkaku vemam karyer ma veyawos kakaku ro varpon mankakara, fyaspar kenem;

imbo iwos sararer ido irya vye ninyan min vyesi.

26Snonkaku veyararyof faro Manseren Allah I ikenem kuker kananon,

ma kina vyedi ismai kadaun.

27Araryof faro Manseren Allah I irya rakrak ro vave aski;

ma neyan veyun fa kovoyar bur marmari.

28Wairekya isma ararer ma syowi snar fyarkin kawasa sibor;

imboi kawasa nova ido isma papoik fa vyuki vye parensava.

29Snokaku veswar nanem imsor sawsawva;

Snonkaku vemsor sawsaw irya ifawi rorova.

30Sane veknon vyuk pararei faro bakenya;

Sne vevyeva imnis dafduf veyun marmar.

31Mundiri vefrur pyum faro snonkaku vesavarar, irya vye syowi Allah I;

mundiri veyarefepen snonkaku veryarva, irya kyoryaye Allah vesarmurinya.

32Snonkaku vevarvor ryo ra idawer snar frur vevyeva vyena,

snonkaku venapes ismai kadaun ro kenem venapes vyena.

33Firnanemya isya ro sane snonkaku veswar nanem;

mbape isyava ro swaruser snonkaku venawnowerya.

34Kakaku ma payamyumya ikanow sif er vebaya,

imboi sasarna nafrur fa er veba ani isma anonef.

35Wairek imarisen faro manfamyan vesbik, veyuf farmyani kuker pyum;

imboi imsor faro manfamyan vefararur pyumba.