Ananun 13

1Romawa vefawi nanem imnaf ma vye asuser farkarkor ro kmari;

snonkaku vemararesya imewer imnaf wos farkarkordi.

2Wawos snonkaku rari vepyum nun faro payamyum;

imbape snonkaku veyawos ankarkar imarisen ifrur roi vekarfiva.

3Snonkaku vesasorpyum wawos vyena nari ikenem kuker kananon;

snonkaku veyawos pusmar nari ismai marindi nabor kaku.

4Snonkaku vemyarenba, fandun vyena nabor kaku imbape ismai osova veri;

Snonkaku vefararur nasrawen kaku ismai roi vevor vye fandun na.

5Snonkaku venapes imarisen wos ankarkar nava,

snonkaku vevarvor ifrur mamyai ma ifrur anonef mankundi.

6Kakakuya ikadaun snonkaku kenem veyavyoversya;

vavyevaya ifrurfa snonkaku vesasarsya se mompraf.

7Snonkaku ono sisya sifrur ve snonkaku venana, imbape sna rorova,

ono sisya kako sifrurve snonkaku vesavarar, imbape nana sena nabor kaku.

8Snonkaku vesmai nana nabor ivye isasyar kumpan sibor infa vyak snonkaku eve mbrov i insamaido kenem vyedi iknon;

snonkaku vesavarar semkei ro faimakakna.

9Snonkaku venapes imnis sonai vefadameser;

snonkaku vevarvor imnis padamara vembrer.

10Awowya idaw monda rakrok;

imbape snonkaku vefirnanemya imarisen imnaf wos farkarkor.

11Nana kosmai fasaw kuker nyan vepyan nari namyomen fasawdam monda;

mbape nana kermkun koryur fawas na fyoro muma ido nari nfanfanfon ra nabor kaku.

12Roi kove fandun kakuna kosmai fasawnava ido nafrur sne fafardun,

mboi roi kove fandun anna naisya kwarido kosnesna namarisen.

13Snonkaku vekorwef ananun Manseren Allah vyena, ifrur ninyan mankundi;

snonkaku vesoyuser faro sasoser Allah Vyena nari sismai sasuref.

14Farkarkor snonkaku vefirnanem irya knam vave aski;

fafis sismai roi vevyeva nari venyanemsi, wos ananun anna nfaspar si.

15Snonkaku veswar nanem nari sismai ararer;

snonkaku veyankarkar nari ismai marindi.

16Snonkaku kakara veknon kyara vepon fafisu ifrur vaim;

snonkaku venawnower vyavdas fawi nanemba vyena.

17Manwawan evarvor ifnai vedar vavyeva;

manwawan vesmai kayaryarya ifrur fa roi vebor nakam napyum navye.

18Snonkaku vemewer vesmai farkarkor sisavarar ma sismai anonef;

snonkaku veyaser wos farkarkor nari sismai ararer.

19Marisen vefnakva rofyor mkosmai rosai mkovefandun na!

Snonkaku venawnower imewer vyoyarbur vavyevayandi.

20Mundiri vekenemso snonkaku swaruser veknon, nari ismai swaruser veknon;

Mundiri eve manivov kuker snonkaku venawnower, nari ismai marindi.

21Snonkaku vesasarya ananjarya iyom i vesyakwar

snonkaku kenem venapesya isma aski vesyakwar.

22Snonkaku kenem venapes fyasos arasai faro romawa ma kpu vyesi;

nana snonkaku vesasar ne vekram faro snonkaku kenem veyavyoversya.

23Rovean nabor kaku sismai na ro saprop snonkaku vesavarar;

mbape snonkaku vesesya sfasyarker na.

24Snonkakuyo fyarkor romawa vyejava ido, irya iswar iva;

imboi iswar i nido nari fyarkor i ma isonek i.

25Snonkaku venapes ipok dananjarva;

Snonkaku vevarvor dananjar vesyakwar.