Ananun 17

1Mamami ker vepnasya kuker sne veknon,

ipyum syadi ro rovean ma manfnai vemafen vesararir kuker rakrok.

2Manfamyan vefawi nanem nari fyara epen amber vyedi romawa karyer vyedi vefrur mamyai;

ma manfamyan ani nari ismai kako var rarwas arasai warpu romawa ani naek vyesi.

3Brawen ma sarak sikunsi fa sijaren ro for insa sisren,

imbape Manseren Allah I myam fafewa rari vepyum ma vevyeva ro snonkakusya sisnesna.

4Snonkaku vevarvorya iso monda wawos vevyevana,

snonkaku vekofen rokakuva imarisen imnaf wos ankarkar.

5Mundiri vekoryaye snonkaku vesavarar,

irya donef Allah vefanir inya.

Mundiri veryav vemarisen ro bo snonkaku vesmai marindi,

nari ismai vave ninyan.

6Wower ro sinansya isoine romawa kpu sesi;

romawasya sararer up sesi.

7Snonkaku venawnower isyusva fa dawos wos vekaku;

isyadadi snonkaku vesmai syowi isyusva fa dawos wos ankarkar.

8Faferes fasasisya imnis keru brawen;

kuker faferes fasasis anna roi vebor nakam nari namawes.

9Insa snonkakusya sesyowi au ido

fakman sasar sifrurna.

Imbape mundiri vefawarker sasar snonkaku

irya kyaruk vave manivovya.

10Wos sansonek oser monda faro snonkaku veswar nanem vye fainda syadi

ro aprer usin oser faro snonkaku venawnower.

11Snonkaku rari vevyeva isampampum vebararaya vesyakwar,

imbape nari vebarara anya iwan snonkaku vesambrav kaku oso fa rya vyeninyan snonkaku ani kuker vaveninyan vemarvak kaku.

12Ipyum syadi kosrow aiwan verafdi vevrikaku snar mkun vyedi idawer,

isyadi ro kosrow snonkaku venawnower imboi vesombirek kuker fawi royova vyena.

13Mundiri vemunsu payamyumya kuker vavyeva,

irya vavyevaya nari syae bur rum vyejava.

14Mundiri eve randak rakrok irya vyas nyan faro marei vedaf;

rarirya wasusu rofyor rakrokya isya vaim.

15Manseren Allah vyembrov snonkaku vevuk kakaku faro snonkaku vevarvor,

ma kako vevuk sasar faro snonkaku venapes.

16Snonkaku venawnower syewar firnanem kuker kumpan vebor vyesya imboi nari vye fromo monda,

snar ismai swaruser vepyum nova.

17Bati vekaku iswar vesyakwar faro manivov vyedi,

ma vye naek fa isonem fafisu marindi.

18Snonkaku vefrur ap fa nari vevak pyan nyaki min vyedi

irya ifawi nanemba veri.

19Mundiri vemarisen vefrur mbris,

imarisen kako fanfavriya.

Mundiri vemarares,

syeref vave momprafya.

20Snonkaku veyankarkarya ismai payamyumova ,

snonkaku vepambarmbar wose nari ismai marindi.

21Mundiri vekapar romawa venawnower ismai fafardun;

sinan kma vena romawa vefawi nanemba, sane veryav isya ro iva.

22Sane vefo doryav irya aryawin vevuk pararei;

sane vefafardun vyedar dafduf.

23Mananwir vena swaruser vevyeva ismai faferes fasasis

insa imbran napnapesyava.

24Snonkaku vena swar nanem vyesewar monda fa ismai firnanem,

imbape snonkaku venawnower kyara famfnom monda.

25Romawa venawnower ifrur sneduf kmari,

ma ifrur sne fafardun snari.

26Snonkaku vesasarva

ipok vyavyak fromo;

rarirya kako snonkaku veswar nanem kopok kopreri.

27Snonkaku vena fawawi, dawos naborva.

Snonkaku swaruser veknon, rari vyedi iknon.

28Snonkaku vefawi nanembaya nari skara i ve snonkaku vefawi nanem fyor vye fasis

ma skara kako i ve snonkaku veswar nanem fyor depen svari.