Sarmur 41

Yusuf pyer Firaun mafu vyena

1Pasivarek ri suru suyande ido, Firaun myafu isya dores ro marei veba Nil andirya. 2Kniko ido Sapi ri fik vedoser ma vepnok kaku ma kif sesya sisnaper, sisasyar ro marei veba anya dori ma san avris ro andirya. 3Swafo wer ido sapi ri fik saksasyar kako; sapi ansine skakor ma kifsya sikpanepen korsya. Sapi vekakor ansine sores ro ris sapi bedoser ansya ro marei veba anya andirya. 4Posa ido sapi vekakor ansya sanpres sapi vedoser ansi. Mura Firaun vyir ro anenef vyedi. 5Raimnai denef kaver ma myafu wer. Ro mafu eve suru ine myam pokem mor ri fik vekraf ma vepnok kwar skur kam ro kapaw oser. 6Myam wer ido pokem mor ri fik eve pis ma vemaryoi snar wamurem veso skur ro kapaw oser. 7Pokem mor eve pis ansya soren pokem mor ri fik vepnok ansya. Firaun vyir ro anenef vyedi ma vyavir kaku, ine yamafu. 8Arwo fyas ido Firaun vye virvar, inja iwan fa sor snonkaku vena aryawin bekinsasor ma vena mon vero sup Mesirsya. Insape fyawar mafu vyanya faro si, imbape oserova veri fa pyer mafu vyanna.1

9Manfamyan vefasos aninem faro Firaun, ikofen faro i, “Amber yedi, rasine yakofen vadir yasasar snar yave fnder roi oser. 10Fafisu veyande kwar amber warmomen fafayava faro manfamyan vefasos mamami ma kako faro women bedi aya, isof ro kwersisen nu ro rum sasisen snon eve vukor ro manfadwaren aidoran wairek rum vyedi. 11Rov oso numafu ma mafafu nuvena roi nkurna nave sisye. 12Romawa snonkbor Ibrani oso isya so nu ro diwa. Romawa snonkbor anine Potifar manfamyan vyedirya. Nufawar mafafu nuvena faro i, ma ikofen badir roi vekur mafafu anna ni. 13Rarirya nakame namnis raris rosai ikofen na isoine: Amber kwaver aya ve fararur vepon ayani, imboi manfamyan vefasos mamami anya mun i fa imar.”

14Muraido Firaun iwan fa sun Yusuf i, ma fafisu anya veri sisasyar i ro rum sasisen. Yusuf ikapnik urvur ma fyarwe sansun vyena, insape rya ve varpon Firaun i. 15Firaun dawos faro i, “Yamafu, imbape snonkakuyo fa pyer mafafu annava. Snonkaku sikofen vair ve aya, sove au kada nari per mafafu.”

16Yusuf kyarem, “Ayava, wairek ayedi, imboi Allah I nari vevuk kankarem vekaku faro wairek au.

17Posa Firaun ikofen,” Yamafu yores ro marei veba Nil andirya. 18Sapi ri fik vepnok kaku ma kif vesnaper sisasyar ro marei veba anya, ma san avris ro andirya. 19Fyoro va Sapi ri fik vekakor ma kif sesya sikpan epen kor sya saksasyar wer. Ro sup Mesir ine yakmam sapi vevyeva no fa sradisyava. 20Sapi vekakor ansya san pres sapi ri fik vepnok ansi. 21Imbape rariryano sapi vekakor ansya skakor pdef. Inja yavir ro anenef yedi. 22Raimnaido yenef kaver ma yamafu wer, yamam pokem mor ri fik sikraf ma sipnok kaku sisur kam ro kapaw oser. 23Pokem mor ri fik sisur kako ro kapaw oser imboi skafsos ma sve pis monda snar wamurem veso ifrur fa smaryoi. 24Pokem mor ri fik eve pis ansya soren pres pokem mor ri fik bepnok ansi. Yafawar mafu ayesuine faro snonkaku vekinsasor sya imbape oserova veri fa pyer mafu ansuine.

25Yusuf ikofen faro Firaun i, “Mafu ansuya susmai kam wos oser; Allah ikofen badir faro wairek ayedi au, rosai nari Ifrurya. 26Sapi ri fik vepnok ansya simnis pasibarek ri fik, ma pokem mor bepyum sya kako pasibarek ri fik; sumnis kame. 27Sapi vekakor, vesasyar ma pokem mor vekafsos ma eve pis snar wam veso ro sup ve ursva fyasnai vadir fafisu basbiserya nari myun pasibarek ri fik. 28Raris women bedi yakofen faro wairek ayedi au, Allah fyasnai vadir faro wairek ayedi au rosai nari Ifrurya. 29Pasibarek ri fik vefo kuker anvepokem nari ryama ro sup Mesir. 30Posa, pasivarek ri fik vefo kuker basbiser nari dakrama, ma fafisu vefo kuker anvepokem anya nari sve fnderi snar basbiserya ibakaku isof ro sup ine isyorpnas kaku ma myase. 31Posa wer ido basbiser anya vyedar anvepokem ro sup Mesir anya naso naisya nvadirva snar basbiser anya imsinba. 32Wairek ayedi mafu ve rarwan ri suru, irya vyadir roi evesya anna Allah vye asas na kwar ma rarirya fyoro va nari Allah Vye imnis na.

33Rarirya wairek ayedi ivye kada kwinfir snonkaku veswar nanem ma vefirnanemo raimnaido buk faro i papoik fa vyuki fyasos sup ine. 34-35Wairek ayedi wakanow manfamyan onower kako, ma buk farosi papoik fa siryur var rarwas rim ro aninek pokem ro pasibarek ri fik fafisu anya ipokem, posa sikram si ro kota-kota na ma siwaren warek si. 36Pokem ansya sirya fasasos anan ro fafisu basbiser nari vemun pasivarek ri fik ro sup Mesir. Rarirya kawasa veborsya nari simar snar basbiser anyava.”

Firaun ikanow Yusuf i fa vye faker wairek ve i ro Mesir

37Firaun ma faker vyansya kam simarisen Yusuf au vyanna. 38Muraido ikofen faro faker vyansya, “Nari kosmai snonkaku veseyo va fa imnis Yusuf i, snar Rur Allah vyedi verfakin inya.” 39Inja Firaun ikofen faro Yusuf i, “Allah ikofen vadir roi vebor nane kam faro au, rarirya fawawi nanem ma kakara vepyum bena oso fa isyadi au va. 40Nari yakanow au fa be faker wairek ve aya, ma kawasa sya kam nari skunem ma sisoyuser wos bena. Yemir monda ayaiso vekaki syadi auya.”2 41-42Posa ro diya Firaun pyanar bur vrapar vyedi sarak vrampin eve fasfas kakop vave sasoser Mesirya ma isyuni ro Yusuf vrapar vyeja vo ikofen, “Kuker sarak vrampin ine, yakanow au fa be faker wairek ve aya ro sup Mesir kasiper.” Vyuk kako syatu worem vemawai kakuya fa syansun, ma irai brawen sya fa isron ro sasukor vyedi.3 43Ramnai Firaun vyuk kereta wairek eve suruya fa kyain ro ma dun farma i, ma manfadwaren wairek vyesya simbran ro varpon kereta anya vo svaryas, “Are mkokanden! Mkovuk nyan! Mkovuk nyan!” Rarirya Yusuf vye ve kanow fa vye faker wairek be Firaun i ro sup Mesir kasiper. 44Firaun ikofen faro Yusuf i, “Ayaiso eve wairek ma yavuk sasoser insa ro sup Mesir kasiper snonkaku osero vaveri fa ipok ifrur royo rofyor kwarem vaim.” 45-46Posa Firaun vyuk snonsnon Mesirya faro Yusuf i, isoine Safnat-Paaneah. Vyuk kako Asnat, Potifera eve imam ro Heliopolis inai vyedi fa Yusuf nya ve swa.

Yusuf ras kenem vyeja vye pasibarek samfur di kyor ro fafisu ifararur faro wairek Mesir. Rarirya Yusuf isasyar ro aidoran Firaun vyeja ma iyar sup Mesir kasiper. 47Pasibarek ri fik fafisu anvepokem anya, sapropya idufen ma isasyar anvepokem. 48Yusuf iryur pokem sya posa ikram si ro sar vero kota-kota na. Pokem sinek ro yaf vero kota anna vandivar na ikram si ro sar vyawes kwar ro kota anna. 49Pokem iryur ansya sibor rape isof Yusuf kyor napok siva snar barborya imnis yenmorem ro yendisare.

50Fafisu basbiserya myun vaim, Yusuf swa vye Asnat i ikapar romawa snon di suru. 51Yusuf ikofen, “Allah ifrur fa yave farander marindi vebor venyanem aya, ma faro naek srar ayesi vero kamam rum vyedi.” Rarirya romawa rak vyanya nyir ive “Manasye”.4 52Ikofen wer Romawa, “Allah vyuk romawasya ve aya ro fafisu ayaisya ro awau ananjar.” Inja nyir i ve “Efraim.”5

53Pasibarek ri fik vefo kuker anvepokem ro sup Mesir anya isyonde. 54Posa pasibarek ri fik basbiserya ifyafer, raris rosai Yusuf ikofen kwar. Basbiserya myun ro sup swan kasiper, imbape ro sup Mesir fasasos rovean naisya kaker.6 55Fafisu kawasa Mesir sisya ro basbiser, sor rovean faro Firaun i. Mura Firaun iwan fa kawasa ansya sra ve Yusuf i ma sifrur rosai Yusuf nari ikofen faro si.7 56Fafisu basbiser anya iba kaku ma iryer sup anya kasiper, Yusuf vyas sayar veser pokem anna ma vyov pokem ansya faro kawasa Mesir ansya. 57Kawasa vero sup swan kasiper srave Mesir fa skoves pokem ro Yusuf i, snar basbiser anya iba namsinba ma myun ro mov-mov nakame.