Sarmur 42

Yusuf naek vyesi srave Mesir fa skoves pokem

1Fafisu Yakub ryower pokemsya sisya ro Mesir, muraido dawos faro romawa vyansya. “Basbiserya myun kwar, inja mkokain awer! 2Yarower pokemsya sisya ro Mesir; Mkora mko koves pokem no insa komar kuker basbiserya nawer.”1 3Mura naek ri samfur Yusuf vyansya sra skoves pokem ro Mesir. 4Imbape Yakub vyuk fa Benyamin, Yusuf veknik karyer vyanya daksova, snar imkak warek romawa vyanya royo kyur indi.

5Snar basbiser ro sup Kanaan, Yakub romawa vyansya kuker snonkaku vesesya sra skoves pokem ro Mesir. 6Vevov pokem faro kawasa vebor veraker sup nakam isoine Yusuf, faker wairek Mesir ani. Rarirya naek veba vyansya srafa skunem svan suba ro varpon vyedi.2 7Fafisu Yusuf myam naek veba vyansya, ifawi si, imbape ifrur ve vefawi siva. Ifuken kuker samsam yov naek veba vyansya, “Mko nido snonkaku verakero?”

Skarem faro Yusuf i, “Nkoine snonkaku Kanaan. Nkorama fa nkokoves rovean.”

8Yusuf ifawi naek veba vyansya imbape naek veba vyansya sifawi iva. 9Mura Yusuf iswar kaver mafafu vyanna vekur naek veba vyansi. Inja ikofen, “Mkoine ma mampaf si mko; mkorama mkomam epen sup nkovedine mov siwaren warekvaya!”3

10Skokarem faro i, “Orova veri, amber nkovedi au. Nkoine, amber manfyan besi verama vekoves rovean monda. 11Nkoine nkove mambekanaek. Nkoine snonkaku vepyum ma veyawos kakaku, ma mampaf si nko va.” 12Yusuf ikofen faro naek veba vyansya, “Mkankar! Mkorama mkomam epen sup nkovedine mov siwaren warekvaya.”

13Skarem wer, “Nkoine mambekanaek samfur seser di suru, nkonakam sinan kma oser ro sup Kanaan. Naek nkominya imar kwar imboi kasun vepupesya isya so sinan kma inkovedi.”

14Yusuf dawos wer, “Yakofen kaku, mkoine mampaf si mko. 15Ive yasewar fa yafawi mkawos kakuke rova: Yafores kuker snonsnon wairek Mesir, yarir fa mkoburva rofyor vedar kasun vepupes mkovanya mkun i ma ro dine vaim. 16Mkowan oso ro fandu mko fa kyaver ra dun i, evese mkoya sisisen mko ro rum sasisen insa yamamkara pan mkawos kaku ke rova, imboi orovaido, kuker snonsnon Firaun i, mkoine mampaf si mko!” 17Posa naek Yusuf vyansya sun si ra skersisen si ro rum sasisen ras ri kyor.

18Ras eve kyorya Yusuf ikofen faro si, “Ayaine snonkaku veyararyof Allah i. Inja mkofrur rosai nari yakofen faro mko insa mkokenem. 19Insa fyasnai vadir mkoine snonkaku veyawos kaku, mkomindi osero nari ismai ro rum sasisen; imboi vesesya sun pokem mkokoves ansya vo sibur ve kina mkovansya kur ine vero basbiser. 20Raimnaido mkun kaku vedar vepupes mkovanya ve aya. Irya fyasnai vadir wawos mkovanna nkaku, ma nari smun mko fa mkomarva.”

Yusuf naek vyansya sisoyuser wos faker wairek ani. 21Mura skawos yaye ro mankunsko, “Irya vae, kur ine kosmai marindi snar sasar kofrur kwar faro veknik kovanya ro fafisu iwara; dor samsom kaku ve ko vesyavo kovefandun iva. Fafisu anya komam vye kandera ma ifrur saneso kaku. Irya fafis ine kosmai marindi.”

22Ruben ikofen, “Fafis anya yakofen bae, yove kove i ra movo nawer. Imbape mkorower ayava. Inja ras ine kosmai munsu ro veknik kovanya marmar vyedi.”4 23Yusuf ifawi wawos skovena, imbape naek vyansya sifawiva, snar skawos yov Yusuf i insape manperwosya fyarwe wos skovanna faro Yusuf i. 24Yusuf ryower wawos annakam raposa syun bur naek vyansya, ma kyanes. Fafisu sneri iko kwar, kyaver faro naek vyansya, ma iwan fa sun Simeon i fa siyavek i ro varpon naek vyesi.

Yusuf naek vyansya skaver ve Kanaan

25Yusuf iwan fa manfamyan vyesya siser inoken naek veba vyansya sena kuker pokem fnovek kumpan vevak pokem ansya ro inoken sena oser ve oser. Yusuf iwan wer fa svaryam si kuker rovean ro marandan barbur sedi. 26Inoken anna sikanow na fa nbarek ro keledai ansya bo ra posa, simbran sibur. 27Mun rov yanido, ro mov seryar fa senef roya, Yusuf naek vyansya suminya vyas inoken vyeja ma ive fyan keledai vyedi. Fafisu vyas inoken vyanya, myam kumpan vevak pokem vyansya sisya svarek ro pokemsya bonsi. 28Muraido ikofen faro naek min vyansya, “Mkomam kada, kumpan ayansya skaver! Sisya ro inoken ayanya dori!” Sikam sisyasen ma sve virvar, posa sawos yaye faro mankunsi, “Rosaiso Allah ifrur faro ko nine?”

29Fafisu skokaver ra ro Kanaan, skofawar roi vebor skosrow kwar anna faro sinan kma skovani. Skofawar radine, 30“Faker wairek Mesir dawos darmomen faro nko, ma dove nko ido mampaf vemam epen sup vyedi. 31Nkokarem faro i, ‘Nkoine ma snonkaku vepyum si nko, mampaf si nko va. 32Nkoine mambekanaek samfur seser di suru, nkonakam sinan kma oser, ma naek kasun inkoveja oser imar kwar, imboi vedar vepupesya isya so sinan kma nkovedi ro Kanaan.’ 33Faker wairek Mesir anya ikofen, ‘Ive yasewar fa yafawi kaku, mkawos kaku ke rova: Rarirya mkomin oso kyain; vese mkoya mkun pokemno vo mkobur ve kina mkovena fafisu ine vero basbiser. 34Mkokaver muma ido mkun vedar vepupes mkovanya, irya yafawi kaku mampaf si mkova, imboi snonkaku bepyum si mko. Inja nari yakaver naek mkove yakarwarek anya faro mko, insape yavuk fa mkokain ma mkove mkei fa mkofarvavyan ro sup ine.’ ” 35Posa rodiya fafisu skokofek inoken na fa nvebei skomam kumpan sya sisya skaver ro inoken skovanna oser-oser. Fafis skomam kumpan ansya mura Yakub fnovek romawa vyansi simkake. 36Posa Yakub ikofen, “Mko vedar fa romawa ayesya sve fromo kame. Yusuf imar kwar, Simeon kyaver va, ma fafisu ine ive mkun Benyamin i wer. Marindi vekur aya ine ifnakva!”

37Ruben ikofen be kmari, “Kamam, rwir Benyamin i ve aya, nari yun kaver i ve kamam au, imboi orova ido, Kamam mun sadwer romawa snon ayansuya.”

38Imbape Yakub ikofen, “Orova, na mkun Benyamin iva; Naek eba vyeja imar kwar, fafis ine derer monda vedawerya. Imbude royo kyur i ro nyan di bori. Ayaine yave mansar kwar, inja marindi mkofrur yov ayanine nari dun aya ve marmar.”