Sarmur 40

Yusuf pyer mafu ri suru

1Fafisu ri veso nande ido, manfamyan ri suru veyuf farmyan wairek Mesir, susoine manfamyan vefasos aninem ma manfamyan vefasos mamami sufrur sasar ro fararur suvena faro wairek ani. 2Muraido Firaun imsor su, 3inja vye su fa susun ro sim sasisen vero rum snonvukor manfadwaren aidoran wairek vyedi, mov Yusuf sisisen i ro. 4Sukain fyoro ro rum sasisen ani, ma snonvukor manfadwaren aidoran wairek anya iwan fa Yusuf duf farmyan su.

5Rov oso manfamyan vefasos aninemya ma manfamyan vefasos mamamiya sumafu vesisye. Imbape mafafu suvannane namnis ra mov oserva. 6Arwori fyas ido Yusuf ryakaki su, mboi myam ido sufafardun fafayava. 7Inja ifuken, “Rosai evewar mumam saswar ro mun arwo inenya?”

8Sukarem be i, “Rovanja numafu, imboi snonkakuyo fa nari pyer mafafu annava.”

Inja Yusuf ikofen, “Iyer monda Allah i nari vevuk fawawi faro snonkaku fa sper mafafu annane ni. Indo mufawar mafafu muvanna ve aya.”

9Manfamyan vefasos aninem anya ikofen, “Ro do mafu ayedi, yamam anggur knamya ro varpon ayedi. 10Anggur knam anine vye snaw ri kyor. Ram vyena insape nkakyei babo, pampen vyena nkambreres ma ne bon veyapar kaku. 11Fafisu anya yuf syobis aninem Firaun vyedi, inja yapauk anggur bon ansya fa yakafos ro syobis Firaun vyanya, posa yavuk syobis anya faro Firaun i.”

12Yusuf ikofen ve i, “Per vyedi ryadine: Snaw ri kyor anskoiya isoine ras ri kyor. 13Ro ras ri kyor ine Firaun nari isasyar au bur rum sasisen, nari vyuk fakamaman ve au ma nari vyuk fa wakif kaver fararur bani. Nari wakif syobis aninem wairek vyani ma wuf farmyan i imnis ras vepondi. 14Imboi waswarepen aya fyor wakenem pyum kwarya. Wakofen vadir ro venyanem aya ine ve Firaun i, insa fyaspar aya bur rum sasisen ine. 15Snar, ras nawara sfor aya ma sun aya ve women ro sup Ibrani ma ro sup Mesir ine yafrur sasarova efnai vedar sve aya fa yasun ro rum sasisen ine.”

16Fafis manfamyan vefasos mamami anya imnaf per vero mafu anya ipyum kaku muraido, ikofen faro Yusuf i, “Yamafu kako radine, Yasor aram mamami ri kyor ro vruri. 17Aram vero boya iser mamami syos min di veso faro Firaun i, vape man sya sirwai ma san mamami anna.”

18Yusuf kyarem be i, “Ine irya per ro mafu bani: Aram ri kyor anya irya ras ri kyor. 19Ras ri kyor wer Firaun nari iwan snonkakuno fa skaruk sasukor bedi insape skaf baken bedi ro adir oso, ma mansya nari san kraf bena.”

20Ras ri kyor ve varponya irya ras swarapepen Firaun vye veyavenya, inja ifrur munara veba kaku faro faker vyansi. Vyuk sasoser fa manfamyan vefasos aninem ma manfamyan vefasos mamami sisasyar su ro rum sasisen ma sun su ve varpon faker vyansi. 21Manfamyan vefasos aninem anya vyuk fa duf kaver fararur vepon vyanya. 22Imbape manfamyan vefasos mamami anya iwan fa smuni ra imar. Nane kam namnis raris mov Yusuf ikofen kwar raya. 23Imbape Manfamyan vefasos aninem anya iwasen Yusuf i werva. Vye fnder bos kaku i.