Sarmur 39

Yusuf ma Potifar swari

1Fafisu snonkaku Ismaelsya sun Yusuf i ra ro Mesir; svov i faro Potifar, snon mamun eve vukor ve manfadwaren vero Firaun aidoran vyedi. 2Manseren Allah isaramper Yusuf i inja roi vebor ifrur nakam namawes pyum kaku. Vyarek ro amber vye snon Mesir ani rum vyedi.1 3Amber ani myam ma Manseren Allah ifnovek Yusuf i inja fararur vebor Yusuf ifrur na namawes pyum kaku. 4Potifar imarisen Yusuf i, inja ikanow i fa duf farmyan vardi i; insape vyuk fa Yusuf fyaduru rum rido ma nana vyenakam. 5Fafisu anya veri, Yusuf vyewari Manseren Allah vye vok snon Mesir ani kina vyedi ma nana vebor vyenakam, ivye ro rum rido ma yaf vyena. 6Roi vebor Potifar nyana ikyar nakam faro Yusuf i. Rarirya Potifar ipok fa kyara user rosai vero rum vyanya werva, iyer monda nanan vyena.

Yusuf baken vyedi ipduk ma idoser kaku. 7Fafisu ri veso nande ido, Potifar swari, sneri isararan kaku faro Yusuf i, inja dembuk i fa suyenef. 8Imbape Yusuf imewer bos kaku inja ikofen be vin ani, “Yor fakman ro vin amber au, amber Potifar ikyar aya kwar fa yafaduru nana vebor vyena. Ipok kyara royo wer va ro rum vyanine. 9Ro rum ine oso fa isyadi Potifar iva, iyer monda aya. Rum ine ma nana vebor vyenakam ikyar na kam kwar faro aya, imboi vin amber auso orovaya snar swa vyediso au. Rariso yave yafrur roi vevyeva ine ma yave sasar faro Allah i?” 10Potifar swari, ras nakam dembuk Yusuf i vesya kwar, imbape Yusuf imewer bos kaku denef kuker indi.

11Ras oso Yusuf syun be rumya dori fa ifrur fararur vyena, fafis anya snonkaku oso isya ro rum anya dori vaveri. 12Potifar swar, pyaw Yusuf i ro sansun vyena ma ikofen, “Rwama kuyenef.” Yusuf pyups i posa ifrar ibur ve bondi, imbape sansun vyedi vin ani iserepeni. 13Fafisu Potifar swar myam ma Yusuf ifrar ve bondi ma sansun vyani ibur i, 14muraido dor manfamyan vyansya vero vondi sya ve rumya dori ma ikofen, “Mkomam kada! Snon Ibrani swa ayani dun ma ro rum ine anya, ifrur fanor ko. Syun ro sim ayedi ma ive vye sasar aya, imbape yafyow naba i. 15Fafisu ryower yafyow naba mura, ifrar ve vondi vo ibur sansun vyedine.”

16Muraido Potifar swar ikram sansun anya ra isof swar ibur. 17Fafis swa vyani ryama kwar, fyawar ve i, ikofen radine, “Snon Ibrani wun ma ro rum ine anya, syun ro sim ayedi ma ive ifrur fanor aya. 18Imbape fafis anya yafyow mura, ifrar ve vondi ma ibur sansun vyedine.”

19Potifar imnaf fawar swar vyena mura imsor fafayava. 20Inja iwan fa sfor Yusuf i ma sve i fa syun ro rum sasisen, mov snonkaku wairek kyersisen sya sisya roya. 21Imbape Manseren Allah isaramper Yusuf i ma vye syowi pdef i vesya kwar, isof snon vukor ro rum sasisen anya imarisen i.2 22Ikyar snonkaku skersisen ansya faro Yusuf i, ma Yusuf iso vyuk fa vekif fararur vebor ro rum sasisen anyani. 23Snon eve vukor ro rum sasisen anya myam warek Yusuf i ro fararur vyenava, snarManseren Allah isaramper i, isof roi vebor ifrur nakam namawes kuker payamyum.