Sarmur 38

Yehuda ma Tamar

1Ro fafis anya Yehuda ibur naek vyesya ma vyarek so Hira, snon oso veraker kota Adulam. 2Rodiwa sneri pyoser bos kaku faro vinkbor Kanaan oso, kmar snori Sua, inja sufarvuk. 3Romawa rak suveja snon dirya, inja kmar nyir i ve Er. 4Romawa eve suruya snon dirya kako, inja nyir i ve Onan. 5Romawa eve kyorya snon dirya wer, ma snar nyir i ve Syela. Fafis Syela vye veyaven Yehuda isya ro Kesib.

6Varpur muma ido Yehuda dun vin oso fa romawa rak vye Er vyuk, vin anya snoriso Tamar. 7Er rari vyedi ivarvor fafayava, isof Manseren Allah imsor i ma myuni fa imar. 8Mura Yehuda ikofen ve Onan i, “Rwamura wun vin kabom veba bedi imar bur ani, ma farvuk kuker i. Wafrur ra dirya yov i, snar swa vyani veknik vyediso au; rarirya nari romawano sisya ve veba bani.”1 9Imbape Onan ifawi nari romawa ansya ido romawa vyesisyava. Inja, rofyor denef kuker vin kabom anya ido isawen dur vyena ra vondi insa nve romawa awer. 10Frur evesya anna newar fa Manseren Allah imsor kaku, ma myuni kako. 11Insape Yehuda ikofen ve imbikin vye Tamar i, dove, “Wabur kaver ve sinan bansya ma wakenem so si rawo romawa yedi Syela iba resari.” Ikofen radirya kuker imkak bude Manseren Allah dakmun Syela i ra naek veba vyansuya werdi. Inja Tamar ibur ra ikenem so sinan vyesuya.

12Fafis ri veso nande ido, Yehuda swar imar. Fafisu mandak nande kwar Yehuda idif manivov vye Hira i vero Adulam ani fa sura ve Timna, mov domba vyesya skaruk bur sesya ro. 13Tamar imnaf abar veyove mambanyor Yehuda ive rya ve Timna fa kyaruk domba vyesya bur sesi. 14Mura syadwer mar farbabe vyena vo syansun sansun evese na. Ikawef vruri ma varpon vyeja kuker kruven, ma kyain ro kedwai veba ro kota Enaim ro nyan mor veso yov Timna. Tamar ifawi kaku Syela, Yehuda mandaven vefes kawek vyani iba kwar, vesyavo sun i fa vyuk i va kaker.

15Fafisu Yehuda myam Tamar i, kyara vo dove vin vevov vinkun dirya, snar ikawef vruri ma varpon vyedi kuker kruven. 16Yehuda isnefer i ma ikofen, “Rwama. Ive yenef kuker au,” imboi ifawiva imbikin vyanya irya.

Vin anya ifuken, “Rosai nari yasmai ve sasurefya?”

17Yehuda ikofen wer, “Nari yavuk kambing osero ve au.”

Yamarisen, imboi buk royo ma vye avyair vevuk snekyar ve aya isof amber farem kambing wakofenya.

18Yehuda ifuken wer, “Rosai nari yavuk fa vevuk snekyar ve auya?”

Vin ani kyarem, “Buk muma ve aya, kakop veve irai wasron iya ma ankyon wuf iya.” Muraido Yehuda vyukna raris fararyor vyedi. Insape Yehuda denef kuker i, mura vin ani fyadores. 19Tamar ibur ve rum vyeja ma pyer sansun ma kruven vekawef vruri posa syansun mar farbabe vyanna wer.

20Fafis ri veso nasyonde, Yehuda iwan manivov vye Hira i fa dun kambing anya mura ve vin ani ma dun kaver roi vebor vyuk kwar fa eve avyair anna, imbape Hira isrow vin anyava. 21Hira ifuken ve kawasa Enaimsya, “Mov risai vin vevov vinkundi vovekain ro nyan andir anya ryoroya?”

Skarem be i, “Vin vevov vinkuno dakro dineva.”

22Mura Hira ibur kaver ma ikofen faro Yehuda i, “Yasrow vin anyava. Kawasa ansiwa sove, vin vevov vinkunsya oso isya ro diwa vaveri.” 23Inja Yehuda ikofen, “Rarirya ido roi vebor anna nyana mura kwar, imboi insa kosmai wos mamyai awer. Yavesewar fa ive yavak i, fama wasrow vin anyava.”

24Paek ri kyor nawas ido Yehuda ismai ankinem vekur imbikin vye Tamar i, veyove vyov vinkundi ra fyadores kwar.

Inja Yehuda ikofen, “Mkora mkun vin anya ma mkorap i kuker for ra imar.”

25Rofyor sun ive vandi, Tamar fyarem wos ankinem ve mambanyori radine, “Snonkaku vena roi vebor nane iso vefrur fa yafadoresya. Mkokuvek sewar mansei vena kakop irai sine ma ankyon ine nya.”

26Yehuda myambir roi vebor anna mura ikofen, “Vin ani kyaku, snar yave i fa romawa kasun ayani Syela vyukiva.” Inja Yehuda denef kuker Tamar i werva.

27Fafisu ive daven romawaya imnis kwar ido insape sifawi romawa vesaper suirya. 28Fafisu daven anya ido romawa iya isu vramin vyeja ve vondi, vin veyuf farmyan kapapar anya iserepen vraminya ma fyes kavrai bines verikya ro i. Ma ikofen, “Romawa ine i nari vesasyar veponya.” 29Imbape romawa anya iyer kaver vramin vyedi, ma romawa suminya iso daven veponya. Muraido vin veyuf farmyan kapapar ani ikofen, “Swamvrav fafayava fafis sweser fa wasasyarya!” Inja mkun vepon anya snir i ve Peres.2 30Insape veknik vyedi vramin vefes kuker kavrai bines verik anya vye veyaven ra varpur. Snonsnon svuk ve i isoine Serah.3