Sarmur 35

Allah iwan Yakub kuker kina vyesi fa sra ve Betel

1Ro ras oso Allah ikofen ve Yakub i, “Aya Allah vefasnai Mankunkwar faro au fafisu wafrar wabur naek bedi Esau i. Fasos ma rwa ve Betel. Barek ro diya ma bawes apen farsarsero ve Aya.”1

2-3Mura Yakub ikofen be kina vyansi ma snonkaku vekainso insya, “Ive kora ve Betel. Ro diwa nari yavawes apen farsarsero faro Allah vefnovek ayakwar fafisu ayaisya ro ananjar ma Vefadiren ayakwar ro nyan marandan ayena. Inja mkosawen pres amfyanir mkokramsya; mkofasren mankun mko ma mkosansun sansun vesren.” 4Mura siryur amfyanir vebor sikramsya ma kako rofafyai sesya2. Roi vebor annanekam Yakub derak na ro ai vebaya fuarya fanam kota Sikhem.

5Fafisu Yakub kuker kina ma kawasa vyansi sisasyarya, Allah ikawef kawasa vero kota vebor vero diyanna kuker makakak veba isof siyom Yakub i kuker kawasa vyansyava. 6Rarirya Yakub ma kawasa vyansya simbran ra ssuver ro sup Kanaan ro kota Betel kur iwara venirve Lus. 7Ro mov anya Yakub vyawes apen farsarserya ma nyir mov anya ve “El-Betel”, snar Allah fyasnai mankundi kwar faro i ro mov anya fafisu ifrar ibur naek vyani. 8Ro mov anya kako Debora, vin veyuf farmyan Ribka imar ma sikrir i ro ai vebaya fuarya ro var wamires ro kota ani. Evedar aiknam ani snir i ve “Aiknam Kankanes”.

Allah vye vok Yakub i ro Betel

9Fafisu Yakub kyaver ker Padan-Aram ma rya ve Betel, Allah fyasnai mankundi wer faro i ma vye vok i. 10Allah ikofen faro i, “Nari sap au ve Yakub wer va, imboi Israel.” Rarirya Allah nyir i ve Israel.3 11Insape Allah ikofen wer, “Aya Allah Vepoik Syadi. Ivyekada wakapar insa kpu besya sibor kaku! Romawa besya nari sikapar er sibor kaku, ma kpu besya nari ono sve wairek.4 12Sup yavuk kwar faro Abraham ma Ishak, nari yavuki ve au ma kpu besya.” 13Posa ido Allah ibur Yakub i. 14Ro mov Allah dawos faro i anya, Yakub vyawes karui swarapepenya. Karui anya fyarser i faro Allah i inja isar maniy saitun ma war anggur ro bori.5 15Mov anya nyir i ve “Betel”.

Rahel imar

16Posa rodiya Yakub kuker kawasa vyansi sisasyar bur Betel. Fafisu sfanam be Efrata vaim, Rahel ras vyena namnis fa daven romawa. Imbape nana romawa anya syamswen kaku. 17Dafduf nana romawa anya isyun bos kaku i, vin vesaramper kapapar anya ikofen ve i, “Rahel, snembri idworem, romawa wavenya snon dirya wer.” 18Rahel fanam kwar fa imar, ma ro fafisu mananai papupes vyena, nyir romawa vyanya ve Ben-Oni6 imbape kmar nyir i ve Benyamin.7

19Irya Rahel marmar vyedi, inja sikrir i ro ris nyan vesoyov Efrata, mov fafis ine venirve Betlehem. 20Yakub vyawes karui swarapepenya ro mov ani, ma isof ras ine karui kakop ani isya kaker ro rus Rahel vyani. 21Posa rodiya maran Yakub vyani simbran pdef, insape vyawes soyai vyedi fanam Migdal-Eder.8 22Fafisu sisya kaker ro mov anya, Ruben denef kuker Bilha, kmar kya vyani. Yakub imnaf frur anine mura imsor bos kaku.9

Yakub Romawa vyesi

(1Taw. 2:1-2)

Yakub nya romawa samfur seser ri suru. 23Lea romawa vyesi sisoine Ruben (Yakub romawa rakya), Simeon, Lewi, Yehuda, Isakhar ma Sebulon. 24Rahel romawa vyesuya susoine Yusuf ma Benyamin. 25Rahel vinfyan vye Bilha i romawa vyesi sisoine Dan ma Naftali. 26Lea vinfyan vye Silpa i romawa vyesuya susoine Gad ma Asyer. Romawa ansine sikaparsi ro Padan-Aram.

Ishak imar

27Yakub ibur kaver ve kmar Ishak i ro mov vyarek ro isoine Mamre fanam Hebron. (Fyor iwara up vyedi Abraham vyarek ro mov anya kako).10 28-29Fafisu vye mansar bos kaku, ras kenem vyedi vye pasivarek usin oser samfur di war, Ishak imar, muraido romawa vyansuya isoine Esau ma Yakub sukrir i.