Sarmur 34

Dina ma Sikhem

1Ras oso, Yakub ma Lea inai suve Dina i rya fa vye dakam vin Kanaan sya.

2Wairek ro sup mnuk ani isoine Hemor snon Hewi anya. Fafisu romawa vye Sikhem myam Dina i mura ismeri ma duni fa vye sonei i. 3Snerimuk kaku faro Dina i, isof dembuk i insa imarisen faro i. 4Sikhem ikofen ve kmari, “Kamam vesewar kaku insa wun vinkbor anya ve aya fa yana ve swa.”

5Yakub ryower inai inkbor vyanya Sikhem vye mamas i kwar, imboi snar romawa vyesya sisya smamwarek rofanfan kaker ro maper, inja vyefasis monda isof sibur kaver.

6Sikhem kmar Hemor i rya yov Yakub i fa dawawos yov i. 7Rofafisu anya kako Yakub romawa vyansya sibur ker maper. Simnaf frur vevyeva anya inja sikandor ma simsor bos kaku. Snar frur mamas faro Yakub inai vyani, irya anonef Sikhem ifrur faro kawasa Israel syakam. Snar frur vera dine sipok sifrur i vaveri. 8Hemor ikofen ve Yakub i, “Romawa ayani Sikhem i sneri ryo naek inai bani; yor syowi ro au, ivye ido wamarisen fa romawa ayani fyarvuk kuker i. 9Ivye kona wos oser infa romawa snon inkovesya sfarvuk kuker inai mkovesi ma romawa snon mkovesya sfarvuk kuker inai nkovesi. 10Mkokenem so inko ro dine; ro mov risai mkomarisenya. Mkosma mkei kako fa mkora mura muma kuker rofanfan mkovesya ro sup ine. Mko kako na mkakna saprop ro dine.”

11Posa ido Sikhem ikofen ve Dina kmari ma srar vyesi, “Mkokarem fararyor ayedine nido, rosai mkor na nari yavukna. 12Mkokofen rosai mkomarisenya, ma mkap kako ararem i. Nari yavuk rosai mkor na, imboi mkomarisen fa yavuk vin ani.”

13Romawa yakub vyansi siwasen mura ro frur vevyeva Sikhem ifrur faro srar skove Dina i, inja skara fa skankar frowes Sikhem ma kmar Hemor su. 14Skokofen ve mambekma ansuya, “Nkovuk srar nkovanya fa fyarvuk kuker snon eve sunat va ido mnuk anya nari ifrur mamyai inko. 15Roi oser monda eve fandun kaku ine, mkofrur veponi resari, isoine snon vebor ro fandu mko ivyekada sve sunat kam raris inko. 16Posa kwar ido insape nari nkove user wos mkovani fa mkofarvuk kuker inai nkovesya ma nkofarvuk kuker inai mkovesi; nari nkokenem ro fandu mko ma nkove er oser kuker mko. 17Imboi mkoveyuser fararyor nkovedine va, ma mkomewer mkove sunat ri, nari nkun inai nkovanine ma nkobur.”

18Hemor ma Sikhem suveyuser fararyor ani. 19Sikhem fyasos fa vye asuser fararyor ani snar snerimuk kaku faro Dina i. Sikhem i irya snopor sve syowi ro fandu er ma kina vyesi.

20Rarirya Hemor ma Sikhem sura ve mov fananjur ro kedwai veba kota anya ma suyawos faro kawasa vero kota anyansya radine, 21“Snonkaku Israel ansiwa manivov kovesirya. Inja korir fa skain so ko ro sup fyor anine ma semkei fa sra mura muma ve mov risai simarisenya. Sup ine imkei faro si kako. Nari kofarvuk kuker inai sesya ma sikako sfarvuk kuker inai kovansi. 22Imboi roi oser monda i sor ro ko insa kofrurya insa simarisen fa sikenemso ko ro dine isoine: snon vebor vero er kovaninensya ivyekada kakve sunat imnis raris mov sve sunat raya. 23Rofanfan sesya ma nana vebor sena kam nari kona na kako. Inja ivye kove user fararyor sedi insa sikenemso ko,” 24Kankain kota anya veryur syakam simarisen ma sve user wawos ro Hemor ma Sikhem su, mura snon vero kota anya sve sunat si.

25Ras ri kyor nawas ido, fafis snon ansya siduf kaker snar sve sunat, Yakub romawa vyesuya isoine Dina srar vye venirve Simeon ma Lewi, suyun rorabi suvena vo susun fasis ve kota anya dori. Insape sumun pres snon vebor vero kota anya nsi, 26Hemor ma Sikhem sukako. Insape suyun Dina i ro Sikhem rumya vo skobur. 27Posa ro mamun anya ido Yakub romawa vyansya srama sfasyar pres nana vebor vekakur ro kota ani. Sifrur radirya fa smunsu sasar veba Sikhem ifrur kwar yov srar sedi Dina i. 28Sun rofanfan kambing domba, sapi, keledai roi vebor vero kota anya dori ma vandiri. 29Sun pres roi vekakur, vin ma romawa sesya ma sfasyar pres nana vebor ro rum sena vero kota ani.

30Yakub ikofen ve Simeon ma Lewi su, “Mufrur fa yasrosen. Kur ine kawasa Kanaan ma kawasa Feris ma kawasa vebor ro sup ine nari sembrov aya. Koine koborva; inja siryur vo srama smun ko ido nari komindi ikenem va.”

31Imbape sukarem ve i, “Nari nkomam monda vo srar inkovedi sifrur mamas i ve vin vekakuva?”