Sarmur 33

Yakub isrow kuker Esau i

1Yakub myam ido Esau isyama kuker snonkaku vyesya usin di fyak. Inja irwas romawa vyansya fandu Lea, Rahel ma kya vyansuya. 2Ryir kya vyansuya kuker romawa suvesya fa sro varpon, posa Lea i kuker romawa vyesya, insape Rahel ma Yusuf suro varpur kaku. 3Yakub imbran ro varpon, ma fafisu imbran anya vyan suba rarwan ri fik isof fyanam eba vyani. 4Imbape Esau ifrar fa isrow kuker Yakub i, insape fyori ma isyumi. Ma sukanes yaye su. 5Fafisu Esau myam vin ma romawa ansya mura ifuken, “Veso au sinenido mansesirya?”

Yakub kyarem be i “Sinido romawa ayesirya, Allah vyuk kwar romawa sine ve aya.” 6Raimnai kya vyansuya kuker romawa suvesya simbran ve varpon insape skunem ma svan suba. 7Posa Lea kuker romawa vyesya, ma varpur Yusuf ma Rahel simbran fanam fa svan suba kako ve Esau i.

8Esau ifuken, “Snonkaku safsofer vembran vesisye insanja yasrow ansya ido rosai evedar warwas si ra diryani?”

Yakub kyarem, “Yafarem si fa spon mufa insa sifrur sneprei naek au.”

9Imbape Esau ikofen, “Nana ayena nabor kwar, inja buk awer faferes ve aya.”

10Yakub ikofen wer, “Wamewer awer! Yafrur sneprei snembri kwar ido, wun faferes yavuk nane. Snar fafisu yamam varpon naek bedi irya imnis yamam varpon Allah vyedi, snar naek benavye aya kwar. 11Yor samsom kaku, ivyekada wun faferes yavuk kwar nane. Snar Allah vye navye aya kwar ma vyuk ve aya roi vebor yave fandun na.” Yakub dor vesyakwar isof varpurya Esau dun faferes vyuk anna.

12Insape Esau ikofen, “Indo mkosanson insa kombran pdef, nari yambran so au ro varpon.”

13Imbape Yakub kyarem be i: “Naek mam kada romawa sine ssambrav mankunba, ma kako na yave fawas kaku snar rofanfan sine siya ssasus kaker, kombran sawsaw ido nari rofanfan sine simarkam. 14Naek wambran vepon mura, nari yambran fawas kuker rofanfan ma romawa ayesine ra varpur isof yasrow kuker naek au ro Edom.”

15Mura Esau ikofen, “Rarirya ido yarir snonkaku ayansine veso fa simbranso au.”

Imbape Yakub ikofen wer, “Bekandera awer, ivye yasmai syowi monda ro au.” 16Rarirya ro ras anya Esau ibur kaver ve Edom. 17Imbape Yakub imbran be Sukot, rodiwa vyawes rumya ve i ma avdares kadaun faro rofanfan vyesi. Evedar mov anya snir i ve Sukot1

18Fafisu ri veso nawas ido, Yakub isasyar bur Sukot ma imbran be sup Kanaan. Syuver ro kota Sikhem kuker payamyum ma vyawes soyai vyedi ro maper fanam kota anya. Irya marandan Yakub vyedi vekaver ker Padan Aram. 19Maper mov syoyai ro anya kyoves i ro Hemor romawa vyesi, isoine Sikhem kmari, kuker kumpan sarak usin oser.2 20Posa ido vyawes apen farsarser oso ro diya ma nyir mov anya ve “El, isoine, Allah irya Allah Israel.”