Sarmur 3

Adam ma Hawa susapi ro sasar

1Ikakya irya aiwan vefawi nanem syadi ro aiwan vebor Manseren Allah ifrur kwar ansi. Ikak anya ifuken faro vin ani, “Kaku ke Allah dove muyan awer aibon ro aiknam vebor vero yaf ine nna?” 1

2Vin ani kyarem ve ikak anya, “Aibon ro aiknam vebor vero yaf ine nna nuyan nakame, 3imboi aiknam vero yaf ine faduri, Allah dove bon vyena nuyan awer rova nupan awer; snar nuveyuk ido, nari numar.”

4Ikak ani kyarem ve i, “Ryarisyava; nari mumarva. 5Allah ikofen radirya snar Ifawi rofyor muyan aibon ani, swaruser muvena nari nbase; ma nari mumnis raris Allah I2 ma mufawi roi vepyum ma roi vevyeva.”3

6Vin ani myam aiknam anya ipyum kaku, ma bon vyedi nari danpyum kaku. Kyara ro sneri, ipyum syadi insa dakfawi nanem. Inja dinek aibon ani, ma dan i, ma vyuk aibon anya kako ve swari fa dakan. 7Suyan aibon anyara posa ido, swaruser suvena nbase vo sumam ma suvaver. Mura su kum ara ramna fa sufmar.

8Fyor mandira murvav ido surower Manseren Allah imbran ro yaf anya dori, mura suyofek ro ai fuwar anna insa Manseren Allah myam awer su. 9Imbape Manseren Allah dor snon anya ma Ikofen, “Mov risai ausya roya?”

10Snon ani kyarem, “Yarower Ausya wambran ro yaf ine dori; imboi yamkake, inja yayofek snar yavaver.”

11Allah ifuken i, “Mansei vekofen ve au vo veyove baverya? Imbude ausya wan aibon Yove wan awer anya ndi?”

12Snon ani kyarem, “Vin Buk fa eve kari aya nanya, vyuk aibon anya ve aya, mura ido yakan i.”

13Manseren Allah ifuken faro vin ani, “Wafrur radirya kukro?”

Vin ani kyarem, “Ikak anya i veyankar aya, isof yan aibon anyani.”4

Allah Vyuk fras faro ikakya, Hawa i ma Adam i.

14Mura Manseren Allah ikofen faro ikak ani, “Nari wasmai fras5 snar frur banine; ro aiwan vebor sya kam wemir monda nari vebar fras ine: Randak ro kur ine nari wasyaves kuker snevav bedi, ma wan oref saprop ro ras kenem bena kasiper. 15Au kuker vin anine nari muve mbrov yaye mu, up vyesya ma up besya nari sembrov si vesyakwar, up vyesya nari saref epen vrumri, ma nari au kako wasos wekuver sena.”6

16Insape Manseren Allah ikofen faro vin ani, “Nari Yafanfon dafduf faro au rofyor fadores ma fafisu waven romawa besi. Imbape rariryano, nari snembri vyenamu kaku7 faro swambri, mboi nari kwunem faro i.”

17Insape Manseren Allah ikofen faro snon ani, “Snar wamnaf wos ro swambri mura wan aibon yave warek insa wan awer anya, ifnai vedar sapropya ismai fras. Nari wafararur ra bekandera kaku ro ras kenem bena kasiper insape sapropya vyuk nanan vemawes ve au.8 18Avris ma kavrai borek nari nasur ro sapropya faro au, ma rokaker vesur famfnom nari ne rovean ve au. 19Nari wafararur bekandera kaku rao domes bena nadai insape saprop ine vyuk royo ve au, isof kwaver wer ve saprop, snar be veyofer ro saprop. Yafrur au ro saprop, ma nari kwaver wer ve saprop.”

20Adam9 nyir swari ve Hawa,10 snar vin anine irya up ro snonkaku sya kam vekenem ro supswan ine bori. 21Manseren Allah ifrur sansun ro aiwan kifsya faro Adam i ma swari, insape Vye fa susansun.

Allah Iyau Adam ma Hawa fa subur yaf Eden

22Manseren Allah ikofen, “Fafis ine snon anya imnis kuker Ko kwar ma ismai fawawi vekur roi vepyumya ma roi vevyevaya. Inja vye vedwarek insa dan awer aibon ro aiknam vevuk kankenem vemnaiva anya insa ikenem fioro-fioro awer.”11 23Mura Manseren Allah iyau su bur yaf Eden ma iwan su fa sufararur ro saprop mov suve knam muma roya. 24Insape ro var wamurem ro yaf anya ro kedwai vesunya varpondi, Manseren Allah ryir manakyasya,12 ma rorabi vefadameser vesaravreves farma fa idwarek nyan veso yov aiknam vevuk kankenem ani. Rarirya osero vaveri fa nari syun mundum fa fyanam aiknam ani.